Footer

Awan nakalugan a bangka, nasalamaan mangngalap kabaybayan ti Cabugao

CABUGAO, Ilocos Sur – Di pay ammo no asino ti naglugan iti maysa a bangka a nasarakan nga agkatangkatang iti kabaybayan ditoy nga ili idi Disiembre 11.

Kas maibatay iti report a naawat ti kapolisan ditoy, idi agarup 12:15 ti parbangon ti Disiembre 11, naireport iti police station a maysa a bangka nga awan ti nakalugan ti insanglad dagiti tallo a mangngalap a taga-Barangay Daclapan.

Nasalamaan da Edbert Saniatan Sabugo; Cristobal Saniatan Sabugo ken Danny Sarande Torrate, agpapada a mangngalap, ti nasao a bangka nga agtatapaw iti kabaybayan, 14 milia ti kaadayona manipud iti barangayda a Daclapan ngem gapu ta awan ti nakalugan, insangladda tapno tuntonen ti asinoman nga akinkukua.

Nakikoordinaren ti kapolisan ditoy iti police station ti Sta. Cruz a mapapati a naggapuan ti bangka kas maibatay ti color coding a naituding para iti nasao nga ili.

Kas pakabigbigan, napintaan ti bangka iti amarilio ken asul, namarkaan iti Carl, Joseph ken Crizha 1 ken addaan iti body number ILS-08.

Suspetsaen dagiti polis nga adda dakes a napagteng ti di ammo a mangngalap a naglugan iti naitawtaw a bangka. (Tawid News)