Footer

BANNER: ACOP compliance, saanen a kasapulan tapno di agpulsot SSS retirees’ pension

Saanen a kasapulan nga agreport pay dagiti agarup 1.32 million a retirado a pensioner iti imatmatonan ti gobierno a Social Security System para iti Annual Confirmation of Pensioners Program (ACOP) wenno tinawen a panagreport iti SSS tapno masigurado a saan nga agpulsot ti pannakaited ti binulan a pensionda.

Daytoy ti kinuna ni SSS President ken Chief Executive Officer Emmanuel F. Dooc idinto nga innayonna a mabenepisiaran ti 59.64 a porsiento iti 2.3 million a pensionado iti pannakaikkat ti ACOP compliance requirement para kadagiti retirado a pensioner iti pagilian.

Kas panagtungpalmi iti annongenmi a mangited iti nasaysayaat ti kalidadna a serbisio kadagiti patpatgentayo a pensionado, maragsakankami a mangiwaragawag kadagiti retirado a pensionado nga agindeg iti Pilipinas a saanen a kasapulan a mapanda pay iti aniaman a sanga ti SSS iti bulan ti pannakayanakda para iti ACOP mangrugi iti Oktubre 30 daytoy a tawen,” kinuna ni Dooc idinto nga innayonna a mangiwayat ti SSS iti verification procedure tapno makumpirma no sibibiag pay ti pensionado ken karbenganna iti benepisio manipud iti SSS.

Ibilbilin ti ACOP kadagiti pensionado a tinawenda nga agreport iti SSS tapno masigurado ti agtultuloy a pannakabayad dagiti benepisioda. Nayimplementar daytoy idi 2012 tapno malapdan dagiti sirkumstansia a saan a talaga a ti resipiente ti agaw-awat iti binulan a benepisioda.

Ngem kasapulan pay dagiti amin a retirado nga agnanaed iti ruar ti pagilian, total disability, survivor pensioners, ken dependent nga annak, ken dagiti agaywan kadakuada nga agtungpal iti ACOP, segun iti SSS.

Kas maibatay iti SSS Circular No. 2017-012, nakaiskediul nga agtungpal nga agreport iti bulan a pannakayanakda dagiti retirado a pensionado nga agnanaed iti ballasiw-taaw ken total disability pensioners; iti bulan ti pannakayanak ti pimmusay a miembro kadagiti survivor pensioners idinto a dagiti menor de edad wenno baldado a dependent pensioners, kaduada nga agreport iti bulan a pannakayanak ti miembro wenno ti pimmusay a miembro.

Maipalubos ti panagtungpal innem a bulan sakbay ti iskediul ken maikonsidera nga early compliance no nagtungpal ti pensionado iti ACOP iti napalabas a tawen,” kuna ti circular.

Inlawlawag ni Dooc a maipakatan iti mandatory home visit babaen dagiti empleado ti SSS kadagiti retirado a pensionado nga aggigian iti Pilipinas nga agtawen iti 85 ken nangatngato ken survivor pensioners a saanen a makapagreport a personal agsipud iti sakit, sagubanit, wenno injury.

Innayonna a mangipaay pay dagiti doktor ti SSS iti Medical Fieldwork Service wenno home visit kadagiti total disability pensioners.

Impalagip ti SSS kadagiti pensionado nga agresulta iti saan a panagtungpal iti ACOP iti automatiko a pannakasuspender iti pensionda iti bulan kalpasan ti birth month ti pensionado wenno SSS member.

Maituloy met la ti pension iti las-ud ti dua a bulan panagtungpal ti pensionado. Amin a naakkal a pension manipud iti banko a nakaideposituan ti pensionna, ket maisubli met laeng iti account ti pensionado,” kinuna ti SSS.

Idi aggibus ti Septiembre ita a tawen, agdagup iti 2.31 million dagiti pensionado iti SSS. (Manipud iti report ti SSS)

Comments are closed.