Footer

Empleado ti munisipio, naiwalang iti kataltalonan

STA. CRUZ, Ilocos Sur – Nasarakan a bangkayen idi agsapa ti Disiembre 9 ti maysa nga empleado ti lokal a gobierno ditoy a mapapati a namalmalo sa naibuntog iti kataltalonan sadiay Barangay Sidaoen, ditoy nga ili.

Nabigbig ti biktima a ni Carlito Ramos y Duran, 48, naasawaan, administrative aide ti LGU ditoy ken residente iti Barangay Gabor Norte ditoy met laeng nga ili a mapapati a biktima ti salvage idi rabii ti Disiembre 8.

Maysa a Godofredo Salacal y Mangay-ayam ti nangireport iti polis idi agarup 7:52 ti bigat ti Disiembre 9 nga aksidente a nakitana ti bangkay ni Ramos iti kataltalonan idi insardengna ti traysikelna iti igid ti highway ti nadakamat a barangay tapno umisbo iti asideg ti akasia.

Awan pay ti pinidut ti polis a suspek a mapapati a nangmalmalo ken ni Ramos a puon ti ipapatayna.

Iti inisial a panagimbestiga dagiti polis, idi agarup 12:30 ti parbangon ti nadakamat a petsa, minaneho ni Ramos ti garbage truck a kukua ti munisipio a nagluganan dagiti sumagmamano a nagbuya kadagiti aktibidad ti piesta sana inyawid ida iti Barangay Daligan.

Idi agsublin ti biktima, mapapati a binangenan ti sumagmamano a suspek ti dalanna sadiay Barangay Turod.

Dimsaag ni Ramos iti luganna ngem mapapati a pinang-or dagiti di nabigbig a suspek iti sumagmamano a beses sada inkarga iti di pay ammo a lugan ket imbuntogda iti kataltalonan.

Naitaray ni Ramos iti Sta. Lucia District Hospital ngem indeklara ti doktor a nangtaming kenkuana nga awanen ti biagna.

Agtultuloy ti panagimbestiga dagiti polis mainaig iti nasao nga krimen. (Tawid News)

Comments are closed.