Footer

Utility worker, nakumpiskaan iti paltog

STO. DOMINGO, Ilocos Sur – Agsakit la ketdi ti ulo daytoy a utility worker, saan a gapu iti nainumna nga arak no di gapu ta makasuan la ketdi gapu ta nakasamsam dagiti polis iti ikut ti maysa.

Iti pannakaisurat daytoy, naiyendorson iti opisina ti provincial prosecutor, Vigan City ti kaso a panaglabsing iti RA 10591 maikontra ken ni Regie Gano y Posadas, 27, utility personnel iti Philippine Science High School, ken residente iti Barangay East, San Ildefonso, Ilocos Sur.

Timmawag iti police station ti maysa a maseknan nga umili iti polis ket intimbrena ni Gano gapu iti nakadidillaw a tignayna bayat ti panaginumna iti Thorsky Videoke Bar and Grill a masarakan iti igid ti kalsada a sakup ti Barangay Camestizoan, Sto. Domingo.

Nagresponde dagiti polis ket iti panangipakatda iti Oplan Boga iti nasao a paginuman, nasukainanda nga adda ikut ni Gano a Cal. 45 pistol a nagmarka iti Colt Mk IV nga addaan iti naisulbong a magasin a nagkarga iti pito a bala. (Tawid News)