Footer

BANNER: Barangay captain, 5 pay, naaresto gapu iti panaglabsing iti RA 10591

SINAIT, Ilocos Sur – Innem a tattao a pakairamanan ti maysa a barangay captain ti naaresto sadiay Vigan City ken ditoy nga ili mainaig iti kampania ti kapolisan maikontra iti panagraira iti kolorum a paltog.

Inaresto dagiti polis ni Barangay Captain Charito Bonifacio, 46, naasawaan, ken ni Froilan Yadao y Sablay, 39, naasawaan, mannalon, agpada a residente iti Barangay Nagongburan, ditoy nga ili, a nakakumpiskaanda iti dua a paltog a nagramut iti riribuk a napasamak iti maysa a natayan iti lugarda idi rabii ti Disiembre 15 .

Nagresponde dagiti polis apaman a naireport kadakuada nga agprobprobokar  ti maysa a Froilan Yadao iti massayag iti barangayda ken nangiruar pay iti paltog manipud iti bagna.

Segun iti report, pinagtalna da Kapitan Bonifacio ken dadduma pay nga opisial ti barangay ni Yadao ngem napaayda.

Nupay kasta, nakumpiskada ti paltog ni Yadao a maysa nga Armscor revolver a nagkarga iti innem a bala.

Ngem idi simmangpet dagiti polis, nadatnganda a nakaiggem ni Kapitan Bonifacio iti maysa a 12-gauge shotgun, Akkar Altay, nga addaan 5 a bala a naikarga iti tubona.

Inaresto dagiti polis ti kapitan idi awan ti naipakita daytoy a dokumento nga agikut iti nasao a paltog.

Iti pannakaisurat daytoy, naiyumanen iti Opisina ti Provincial Prosecutor, Vigan City ti kaso a panaglabsing iti RA iti 10591 maikontra kada Bonifacio ken Yadao.

Kabayatanna, tiniliw met dagiti polis ni Melvin Asia y Manuel, 22, awanan asawa, laborer ken residente iti Barangay Bulala Centro, Vigan City ken tallo a kakaduana a nabigbig a da John Mark Ballalo y Salvacion, 21, awanan asawa; ken Arjay Alarca y Manuel, 22,   agpada a residente iti Brgy. Bulala, Vigan City, Ilocos Sur; ken Joseph Marky Paz y Gamlot, 26, awanan asawa, beautician ken residente Brgy. Naglaoan, Sto. Domingo, Ilocos Sur gapu iti panangriribukda iti maysa a resto bar iti Vigan City idi parbangon ti Disiembre 17 a nagresulta iti pannakasamsam iti paltog iti sling bag ni Asia.

Nagturong dagiti polis iti EE Kampai Resto Bar a masarakan iti Florentino Street, Barangay III, Vigan City gapu iti naitimbre kadakuada a panangriribuk ti maysa a grupo dagiti lalaki iti paginuman idi agarup 1:50 ti bigat ti nadakamat a petsa.

Iti panagsukain dagiti polis iti sling bag ni Asia, nasukalanda ti maysa a homemade Cal. 45 pistol a nagkarga iti maysa a bala ken 4 a bala iti uneg ti pouch ti suspek.

Kalpasan ti medico-legal examination, naipan dagiti suspek agraman ti nakumpiska a paltog ken balbala iti police station para iti dokumentasion ken disposision.

Maisagsagana metten ti kaso a panaglabsing iti RA 10591 maikontra ken ni Asia. (Tawid News)

 

Comments are closed.