Footer

EDITORIAL: Kaipapanan ti Panawen ti Paskua

MANGRUGIN ti Panawen ti Paskua wenno Adviento iti umuna a Domingo ti Disiembre. Ngem uray idi pay laeng apagtapog ti Setiembre ket addan dagiti agpatpatokar kadagiti sonata ti Paskua ken addan dagiti agar-arkos kadagiti dekorasion ti Paskua kadagiti balay ken pasdek a pakakitaan ti idadateng daytoy kaindaklan a panagrambak iti na-Kristianuan a lubong.

Rambakan dagiti Kristiano nangruna dagiti Katoliko iti intero a lubong ti Paskua kas  panangilagip ti pannakaito ni Niño Jesus babaen ken ni Birhen Maria iti nanumo a kulloong dagiti karnero tapno ispalenna iti basol dagiti tattao iti lubong.

Iti panaglabas dagiti rinibu a tawen manipud iti daydi umuna a Paskua, in-inut metten a nagbaliw ti kaipapanan daytoy a panawen kadagiti tattao. In-inuten a narimbawan ti nauneg nga anag ti pannakaitao ti Mesia kas ipakita dagiti agdama ken kadawyan a wagas ti panagrambak iti Paskua.

Iti Pilipinas a mabigbig a kangrunaan a Kristiano a pagilian iti Asia ket isu ti kapautan ken kangayedan a marambakan ti Panawen ti Paskua. Maisaysayangkat ti siam nga aldaw a Nobena a Misa iti parbangon wenno rabii a mangrugi iti Disiembre 16 agingga iti Bisperas ti kaaldawan ti Paskua. Maitultuloy ti panagrambak agingga iti Baro a Tawen ken Epifania wenno ti aldaw nga isasarungkar dagiti tallo a mamasirib ken ni Niño Jesus a nangitugotanda kadagiti sagutda.

Nasayaat dagiti naespirituan a wagas ti panagrambak ti Paskua. Ngem iti agdama a panawen, mapukpukawen ti kinapateg dagiti naespirituan a panagrambak ta maipangpangrunan dagiti nailubongan a banag. Napagbalinen ti Paskua a puon ken gapu dagiti dadduma a tattao nga agaaramid iti kinadakes wenno krimen. Nakaro unayen ti pannakapagbalin a komersio ti panawen ti Paskua a mangapektar ti biag dagiti tattao gapu ti yaadu ken ingingina dagiti mailaklako a produkto.

No dimtengen ti Panawen ti Paskua, mangrugin dagiti adu a padaya ken panagpasken. Masegseggaanen dagiti Christmas bonus, 13th Month Pay wenno 14th Month Pay. Maganatan met dagiti ubbing ken nataengan a makaawat kadagiti namnamaenda a regalo. Mangrugin a makita dagiti adu nga agpalimos wenno ag-caroling kadagiti kalsada kas kadagiti adu a Badjao ken Aeta.

Para kadagiti Pilipino nga adda mabalinna, ti panagrambak ti Paskua ket kaipapananna ti tiempo dagiti agrurutap a panagraragsak a pasken, aglaplapusanan a taraon ken mainum, ken adu a regalo. Kadagiti napanglaw ken awanan, ti Panawen ti Pasken ket gundawayda ti makiranud uray bassit laeng kadagiti nabuslon a grasia nga adda kadagiti nasaysayaat ti panagbiagna. Para kadagiti dakes ti panagpampanunotna, tiempo daytoy tapno agisayangkatda kadagiti kinadakes ket magun-odda dagiti ap-apalanda a wagas ti nagarbo a panagrambak.

No umasideg ti Paskua, umadu dagiti kaso ti panagtakaw ken panagholdap gapu ta uray dagiti awan-mabalinna ket agaramidda iti krimen tapno adda pagsaganada wenno igatangda iti nangina a regalo. Kumaron ti trapiko dagiti lugan kadagiti kalsada nangruna kadagiti dadakkel a siudad kas sadiay Metro Manila. Umadu dagiti agaapa a motorista ta saanda a makapagpipinnasensia iti nakiro a trapiko. Umadu met dagiti agsakit ket maatake gapu kadagiti aglablabes a maipauneg a taraon ken mainum a makabartek.

Iti agdama a Panawen ti Paskua iti Pilipinas, nakalkaldaang dagiti mapaspasamak a krimen, terorismo ken saan a panagaapa dagiti nangato nga opisial ti gobierno. Agtultuloy dagiti adu a pammapatay nga isaysayangkat dagiti kriminal a saan a malapdan dagiti polis a napusgan a mangsaluad ti urnos, kappia ken talna. Agtultuloy manen ti panagranget dagiti soldado ken polis kontra kadagiti puersa dagiti rebelde a komunista kalpasan a saanen a naituloy ti peace talk.

Sadiay House of Representatives, agtultuloy ti pannakatratar ti Impeachment Complaint kontra ken ni Chief Justice Ma. Lourdes Sereno gapu kadagiti pammabasol kenkuana. Trattrataren dagiti kongresista dagiti reklamo ti kurapsion kontra iti Chief Justice uray ad-adu nga amang iti pakadagupanda dagiti immoral ken nadakdakes nga amang ti aramidda.

Uray Panawenen ti Paskua, iti laksid ti nainget ken nadara a kampania ti gobierno kontra iti panagraira ti illegal a droga, agtultuloy latta ti panagnegosio dagiti drug lord gapu ti pannakikumplot kadakuada dagiti rinuker nga opisial ken agserserbi iti gobierno.

Agtultuloy ti binnato ti pammabasol dagiti agdama ken sigud nga opisial ti Department of Transportation kadagiti mapaspasanmak a panagdadael dagiti metro rail sadiay Metro Manila a mangpakaro ti parikut dagiti commuters iti siudad. Nakalkaldaang met ti kasasaad dagiti agindeg iti Marawi City a kaaduanna ket dagiti Muslim ta uray nalpasen ti gubat sadiay, ngem nadadael metten dagiti pagtaenganda.

Iti kaadu dagiti kinadakes a mapaspasamak iti Panawen ti Paskua, Ayanna ti konsensia ken puso dagiti adu a Pilipino nangruna dagiti nangato nga opisial ti gobierno nga imbes nga ipamaysada ti sapasap a pagimbagan ket dagiti met bukodda a pagsayaatan ti ipangpangrunada. Apay nga laksid a 98 a porsiento iti kadagupan dagiti agarupen 105 a Million a Pilipino ket saanda a maibiag ti panursuro ni Kristo? Apay nga adu dagiti agbibiag nga aglaplapusanan ken adu met dagiti makurkurangan?

Uray dagiti dagiti agserserbi iti gobierno ket kaaduanna ket Katoliko a nagadal kadagiti eskuela Katolika ket agbalinda a sentro ti kritisismo kas ken ni Presidente Rodrigo Duterte gapu kadagiti pammabasol kenkuana ti pannakaabusar iti kalintegan ti tao. Apay ngata nga uray dagiti lider ti Pammati ket saanda a makapudno a mangibiag ken tagapaneknek ti Ebanghelio ni Kristo?

Iti sango dagitoy a dakes a pagteng iti pagilian iti Panawen ti Paskua, lagipen ken pagarien koma dagiti amin a Pilipino nangruna dagiti Kristiano ti espiritu ti umuna a Paskua, ti pannakayanak ni maladaga a ni Jesucristo gapu iti nalaus a panagayat ti Dios kadagiti tattao a parsuana. (Eden A. Alviar)

 

Comments are closed.