Footer

Kotse, dimmungpar iti truck, 3 pasahero naipit, DOA iti ospital

BANTAY, Ilocos Sur – Tallo a pasahero ti natay kalpasan a dinungpar ti kotse a naglugananda ti maysa a truck iti national highway ti Barangay Guimod ditoy nga ili idi parbangon ti Disiembre 16.

Naideklara a dead on arrival iti Northside Doctors Hospital  da  Antonio Pamo y Madriaga, 41, nagmaneho iti Nissan Sentra sedan; ken dagiti pasaherona a da  Jaymark Pamo y Tugas, 19, estudiante; ken Rudolph Valentino Sistosa y Satumba, 36, security guard, agpapadada amin a residente iti Arnap, San Ildefonso, Ilocos Sur.

Kas maibasar iti salaysay ni Jayson Gali y Julian, 26,  helper, kalpasan ti panagideliberda iti bodega ni Marvin Ross, insanud ni Marlon Brando Nieto y Lim, 32, ti minanehona nga Isuzu Forward truck babaen ti panagiyana ket agabante koman ti lugan idi simmungad ti Nissan Sentra.

Pinakdaaran ni Gali ti kotse babaen iti flashlight ngem nagtuloy ti panagtaray ti kotse ket dinungparna ti makannawan a paset ti truck a puon ti simmirokanna ken ti pannakaipit dagiti naglugan.

Nagpaarayat dagiti nagresponde a polis iti PDRRMC ken MDRRMC ti Bantay para iti pannakaakkal dagiti naglugan iti kotse.

Sabali pay a pasahero ti kotse, ni Wilson Tapiceria, ti naitaray iti Metro Vigan Cooperative Hospital para iti pannakaagas dagiti sugatna iti nadumaduma a paset ti bagina idinto a naipan ti drayber ti truck iti Gabriela Silang General Hospital, Tamag, Vigan para iti pannakaeksamenna nupay saan a naan-ano.

Daytoy ti maikadua a gundaway nga adda napasamak a nakaam-ames a disgrasia ti lugan iti Ilocos Sur iti las-ud ti nakurang makabulan.

Idi Nobiembre 30, dinungpar ti maysa a Toyota Corolla ti maysa nga armored car sadiay Barangay Bantay Abot, Narvacan a nakaipitan dagiti uppat a naglugan iti kotse. (Tawid News)

                                    

Comments are closed.