Footer

Regional coordinator ti Defend-Ilocos, naaresto

ILOCOS SUR – Inaresto dagiti polis ti maysa a human rights ken environmental activist iti checkpoint a naipasdek iti sanguanan ti Provincial Police Office idi rabii ti Disiembre 12 gapu iti mapapati a pannakainbolbarna iti rebellion.

Inaresto ti nagtitipon nga elemento ti kapolisan manipud iti PIB-Ilocos Sur PPO, PMFC-Ilocos Sur PPO, Bantay MPS, RMFB1, RIU1, CIDG Ilocos Sur ken CIDG Abra, 81st IB, Phil. Army, MIG1 ken MICO ni Sherwin De Vera y Gedalanga, 37, naasawaan, residente iti 90 Via Crusis St., Zone 1, Bantay, Ilocos Sur idi agarup 5:50 ti malem ti Disiembre 12.

Idi maaresto, nakalugan ni De Vera iti maysa a bus ket aggawid iti Bantay manipud iti Candon City.

Segun iti report, napasardeng ti bus a nagluganan ni De Vera iti checkpoint iti sango ti kalsada a sumrek iti Provincial Police Office, immuli ti maysa a polis a nakamarka ti Medrano iti patse ti unipormena ket inimbitaranna a sumurot iti police station ni De Vera, regional coordinator ti Defend-Ilocos ken kolumnista iti Northern Dispatch, aglinawas a community paper.

Mapapati nga imbaga ni De Vera a sumurot laeng no adda warrant of arrest nga iggem ti polis. Ngem idi pilitenda a bumaba, nagariwawa ni De Vera ket imbagana a maysa nga aktibista ken regional coordinator ti Defend Ilocos.

Iti text ni De Vera a naiposte iti Facebookna, sa laeng imbaga dagiti polis nga adda warrant of arrest maikontra kenkuana idi nagariwawa ngem saanda nga inted.

Mapapati a nabasana laeng idi addan iti police station ti linaon ti warrant of arrest mainaig iti kaso a rebellion a naipila maikontra kenkuana sadiay Abra .

Ngem iti report manipud iti ABS-CBN, kinuna ni Bantay COP Chief Inspector Edgardo Medrano a legal ken awan ti linabsingda iti pannakaaresto ni De Vera.

Ni Judge Corpuz B. Alzate ti RTC Branch 2, Bangued Abra ti nagpirma iti warrant of arrest ni De Vera gapu iti krimen a rebellion a nai-docket iti babaen ti Criminal Case No. 2014-155 a napetsaan Septiembre 4, 2014.

Naikustodia ni De Vera iti PIB-Ilocos Sur PPO para iti dokumentasion ken disposision sa naipaima iti CIDG-Abra.

Mapapati a nakita ni De Vera iti maysa nga engkuentro iti nagbaetan ti New People’s Army ken Philippine Army a napasamak iti Barangay Malibcong, Abra.

Awan ti nairekomenda a piansa ni De Vera ket maaramid ti arraignment inton Enero 4, 2018.

Ni De Vera ti umuna nga aktibista a  naireport a naaresto mainaig iti rebellion kalpasan ti panangibilin ni Presidente Rodrigo R. Duterte a saanen a matuloy ti peace process iti nagbaetan ti gobierno ken dagiti rebelde a komunista ken panangpirmana iti Proclamation No. 374 a nangideklara iti Communist Party of the Philippines (CPPA) ken New People’s Army (NPA) kas terorista a grupo. (Tawid News)

Comments are closed.