Footer

Ti Paskua, Dagiti Ubbing, ken Dandaniw a Para Ubbing

Sinursuran: Kolum ni Jobert M. Pacnis

(Umuna a paset)

 

DAYTOY a balay ti naturongmi/ Balay da nana nga am-ammomi/ Daytoy ngatan ti pangulpianmi…

Malaglagipko ita daytoy a samiweng ti Paskua ta idi ubingak, naynay a kantaenmi nga agkaroling, nataengan man wenno ub-ubbing. No saan, ti Joy to the World wenno O, Holy Night.

Napno ti ragragsak idi no ubbing ti agkanta iti Ingles ta agsabalin dagiti sasawenda. Basta agbalikas. Berking… berking… kunami pay idin kadayta dadduma a linia ti Joy to the World.

Ngem no nataengan ti agbiddut nga agkanta, adda daytay pannakakatkatawa wenno pannakaumsi kadakuada. Pagangayanna, nakamisuotton ti uneg ti agpapaskua.

Nupay kasano idi ti kabassit ti maawat iti tunggal pagtaengan, adda daytay pannakapnek kadakami. Uray pay kankanen a mayawat wenno binbinting a kunada.

Naragsak latta ti bunggoy a mangunor kadagiti lipit, kanto ken haywey a mangiyeg iti ayug-Pamaskua iti tunggal pagtaengan.

Ketdi, saan nga amin idi a papananmi, mailukat ti ridaw. Addada met dagiti mangiranta a mangiddep iti silawda no kasta nga agkankantakamin iti asidegda. A sa met la magangtan inton makaadayokamin.

Ngem saan a nagbalin a rason tapno agkantakami iti Bulong ti Apatot kas pangrurod iti naimut a bumalay. Inyunay-unay dagiti dadakkelmi a dakes dayta. Mabalin nga adda napateg a rason no apay a di kano manglukat ti maysa a pagtaengan.

Ngem naammuak itan a nagbaknang gayam dayta a kanta a Bulong ti Apatot kadagiti imahe/simbolo a rumbeng a kupikop ti maysa a sinurat aglalo ti daniw. Ngarud, saan a rumbeng a maikanta a kas pangkantiaw wenno pangrurod. Nasao dayta ni Manong Jimmy Agpalo, Jr. iti kolumna idi ken nabasak iti librona.

Ti mapaskuami idi, pagbibingayanmi iti maudi a waiting shed a malabsanmi sakbay nga agsisinakami. Uray ti dimi naibus a kankanen. Malagipko a dagiti pannakabagik, nagdiretsoda iti tubongko a kawayan. A daytoy met ti rason a nakagun-odak iti Most Thrifty idi elementariak.

Saan nga asi-asi idi a maited ti maysa a Most nga award. Kas kadayta a Most Thrifty. Masapul a paneknekan a maitutop a maited kenka. Impaala idi ti maestrami dagiti urnongmi a kuarta.

Kakaasiak a nangbagkat iti dua a lawas ti kawayan a yan ti tubongko a naglaon iti binting, salapi ken piso. Iti eskuela, binettakmi dagitoy a tubongko. Awan pay idi ti lima gasut a pisos ti dagup dagiti naurnongko.

Dagiti kabalubalko? Ribu dagiti kuartada. Nagsisikkilda pay a pinapel. Nalpay ti abagak a nagawid ta siak ti kabassitan ti naipakita nga urnong. Ammok lattan a diak maala ti gamgamgamek a pammadayaw.

Ngem nasdaawak laengen idi naangay ti closing exercises. Siak ti nakaitedan ti pammadayaw!

Naammuak kalpasanna nga ad-adda a pinati ti maestrak ti bassit nga urnongko ngem ti ribu nga urnong dagiti kinabalubalko.

No malagipko daytoy a paset ti kinaubingko, saan a diak mangilangilan ita ti mapaspasamak kadagiti panagrikep ti klase. Nakaad-adu ti maikkan iti award. Saan laeng a maymaysa dayta Most Industrious. Kasano koma a “most” no dua wenno ad-aduda pay a mapadayawan?

Kapanunotak met la ketdi dayta.

Wen, pudno a ti Paskua, ad-adda a para kadagiti ubbing. Maysa nga ubing ti naipasngay iti kulluong tapno masubbot ti basol ti tunggal maysa kadatayo. Ubing nga awan mulitna. Naitao nga agibtur gapu iti di marukod a panagayat ti Ama.

Awanen ti umasping pay kadayta a panagayat.

Nalabit daytoy nga Ubing ti namagtignay iti rikna  a mangbukel kadagiti sinurat a para kadagiti ubbing. Mamatiak la unay nga iti panagsurat, adda dayta di naisurat nga akem. Akem a mangited iti adal ken mangiburay iti kapanunotan a mabalin a pagsarmingan wenno pagtuladan.

(Adda tuloyna)

 

 

Comments are closed.