Footer

Pagtagilakuan ti sapatos, natakawan

VIGAN CITY – Mannamnama dagiti polis ditoy siudad a babaen ti natiliwda a suspek, matuntonanda dagiti lima a kumplotna a nagtakaw iti maysa a pagtagilakuan ti sapatos idi malem ti Disiembre 18.

Nabigbig ti suspek a maysa a Marilou Manzon Leocadio, 42, awanan asawa, ken residente iti Barangay Bacnar, San Carlos City.

Saan pay a naammuan ti kinasiasino dagiti kadua ni Manzon a pakairamanan ti tallo a lalaki ken dua a babai a nagipuslit kadagiti tagilako iti Footstep a kukua ni Mercedes Quitilen Ong, 50, residente iti Barangay San Pedro ditoy siudad a masarakan iti umuna a kadsaaran ti Landmark building iti Barangay 8, ditoy siudad.

Segun iti panagimbestiga dagiti polis, idi agarup 12:10 ti malem ti nadakamat a petsa, simrek iti pagtagilakuan da Manzon ken dagiti lima pay a kumplotna ket nagpammarangda a kustomer.

Idi nakaliway dagiti aglalako,  inlibas nga impisok da Manzon dagiti assorted a tagilako a pakaibilangan dagiti sandals, sinelas ken sapatos iti nangisit a bag sada dagus a rimmuar ken simmakay iti motorsiklo.

Ngem kinamat da Princess Rabara Quartley, saleslady, ken Armando Rutab Arcena, utility boy, ni Manzon ket naipiskotda daytoy.

Narekobre iti ikut ni Manzon ti dua nga Islander a sinelas nga agpateg iti P525.00.

Ngem segun iti polis, agdagup iti P20,000.00 dagiti tagilako a kinurimes dagiti suspek iti Footstep.

Nangiwayat met dagiti duty patrollers ken Intel operatives iti pursuit operation maikontra kadagiti sabali pay a kadua ti suspek ngem saandan a nasapulan dagitoy.

Kanaig daytoy, nagballaag ti kapolisan iti publiko a dida pampanawan ti balayda nga awan ti agbantay agsipud ta manamnama ti yaadu dagiti sangaili ken turista nga agpasiar ditoy siudad nangruna ita a panangselebrar iti Paskua ken Baro a Tawen. (Tawid News)

 

 

 

Comments are closed.