Footer

Truck a nagkarga illegal a napukan a kayo, di nakalusot iti Sto. Domingo police patrol

STO. DOMINGO, Ilocos Sur – Saan a nakalusot iti police patrol ditoy ti maysa a truck a nagkarga kadagiti naragadi nga akasia a maidiskarga iti maysa a pagaramidan iti muebles iti ili ti San Vicente

Nagpatrolia dagiti polis iti national highway a sakup daytoy nga ili kalpasan a nakaawatda iti inpormasion idi agarup 7:30 ti sardam ti Disiembre 18 a lumabas ti maysa a truck a naabbongan iti amarilio a tolda a nagkarga kadagiti illegally cut a troso.

Apaman a napasungadanda ti Isuzu Elf truck nga addaan plate number XFL 398,  pinasardeng dagiti polis ti lugan sada sinukimat ti kargana a nakasukalanda dagiti 22 pedaso a naputed a troso ti akasia iti nadumaduma a kadakkel ken maysa a chain saw.

Iti panagsumaria dagiti polis, naammuan a napukan ti akasia iti Barangay Salapasap, Cabugao ket maidiskarga iti Iza Mary Furniture a kukua ti maysa a Serafin Melecia ti Barangay Poblacion, San Vicente.

Inaresto dagiti polis ti nagmaneho iti Isuzu Elf a ni Rafael Melecia  y Felipe, 18, baro, college student, ken residente iti Brgy. Poblacion, San Vicente, Ilocos Sur ken ti pahinantena a ni June Tugade y dela Cruz, 40, naasawaan, ken residente Brgy Lubong, San Vicente idi awan ti maipakitada a dokumento para iti pannakapukan ken pannakaibiahe ti akasia.

Kalpasan iti medical examination, impan dagiti polis dagiti suspek agraman iti truck ken napukan a troso, ken ti chain saw iti police station para iti dokumentasion ken disposision. (Tawid News)

Comments are closed.