Footer

4 paltog, nadumaduma a bala, nasukalan iti search operation iti balay ti kagawad

SANTA, Ilocos Sur – Napilaan iti kaso a panaglabsing iti RA 10591 ti maysa a kagawad ti barangay a nasukalan nga agikut iti nadumaduma a paltok ken balbala bayat ti panagsukisok dagiti polis iti balayna sadiay Barangay Magsaysay District idi malem ti Nobiembre 27.

Kaarigna iti armory ti balay ni Barangay Kagawad Armando Garcia Tolentino gapu ta malaksid dagiti uppat a paltog, nakasukain pay dagiti nagtitipon a kameng ti CIDGR1 a lead unit ti Ilocos Sur CIDG, PIB, Maritime ken police station ditoy nga ili kadagiti sumagmamano a rounds ti balbala a nakalemmeng iti balayna.

Inwayat dagiti polis ti panagsukisok babaen ti bileg ti search warrant nga inyisio ni Judge Marita B. Ballogquing ti Regional Trial Court, Branch 72, Narvacan, Ilocos Sur a napetsaan iti Nobiembre 27.

Nakakumpiska dagiti polis ti Armscor Medallion Cal. 45 pistol a nagpason ti lisensiana; Llama Cal. 45 pistol; M14 rifle; ken Ingram nga addaan serial number 628349; magazine assembly ti cal. 45 pistol; 8 rounds ti bala ti cal. 45; 5 magazine ti cal. 45 pistol, 60 rounds ti cal. 45; maysa a pistol case, 2 standard magazine para cal. 45 pistol; 3 magazines ti M14 rifle; 57 rounds ti bala ti M14 rifle; maysa a magazine assembly ti Ingram; 28 rounds ti bala Ingram, maysa a pouch ken shoulder bag, maysa a gun guard ken maysa a holster para cal. 45.

Imbilin ni Judge Gina Juan-Chan ti RTC Branch 22, Narvacan a maruk-atan ni Tolentino manipud iti kustodia ti CIDT kalpasan a nagpiansa daytoy iti P80,000.00. (Tawid News)

Comments are closed.