Footer

BANNER: Motu propio investigation maiwayat polis a nakapatay car washer

VIGAN CITY – Nadis-armaran ken nakakustodia ti polis a nangpaltog iti maysa a car washer kabayatan a maiwaywayat ti panagpalutpot mainaig iti nasao nga insidente.

Kinuna ni Police Supt. Marlo Castillo, hepe ti polis ditoy, a mangiwayatda iti fair investigation iti parte ni PO1 Jefferson Ardiosa ken iti parte ti biktima a ni Randy Fabrigas y Manoy-oyan.

Kas maibatay iti report, namindua a beses a pinaltogan ni Ardiosa ni Fabrigas, 31, awanan asawa, car washer, ken residente iti Barangay 9, Vigan City idi agarup 6:30 ti sardam idi Nobiembre 27 a nagsagrapan ti biktima iti sugat iti abaga ken ulona.
Intaray dagiti polis ni Fabrigas iti Ilocos Sur Provincial Hospital ngem naideklara a dead on arrival.

Iti inisial a panagimbestiga dagiti polis, nagramut ti insidente iti saan a panangpautang ni Erlinda Guzman, asawa ni Barangay Councilor Alejandro Laureta Guzman, 59, ken ni Fabrigas iti arak.

“Immay umutang iti arak ngem imbagak a saankami nga aglaklako, puro sitseria laeng,” kinuna ni Erlinda iti media.

Ngem mapapati a dayta ti nagrurodan ni Fabrigas ken nangdadaelanna iti kawayan a talaytayanda ken naggawidanna a nangala iti badang sa nagprobokar iti sanguanan ti tienda.

Mapapati a kinamat pay ni Fabrigas dagiti uppat a menor de edad a nairana nga adda iti asideg ti tienda.

Nagresponde da PO1 Jefferson Agcarao Ardiosa ken SPO2 Victorino Harold Gadut Baquirin, 42, naasawaan, ken kameng ti ISPPSC ngem mapapati a saan nga intaltalek ida ni Fabrigas ken dinarupna pay ida a nakaiggem iti badang.

Mapapati nga idi dinarup latta ni Fabrigas, inasut ni Ardiosa ti paltogna sana pinaputokan ni Fabrigas iti dua a beses a nakatiruan ti abaga ken ulo ti biktima.

Kinuna ni Castillo nga ipaimada dagiti dokumento kanaig iti nasao a pammaltog iti prosecutor’s office ket ti korte ti mangngeddeng no adda justification ti depensa ti polis a panangsalaknibna iti bagina. Kinuna ni Castillo a mangiwayat pay ti Internal Affairs Services iti motu propio investigasion tapno maammuan no adda lapses iti biang ti police officer mainaig iti pannakapaltogna iti biktima a puon ti nakatayan daytoy.

Ngem kidkiddawen ni Bernadette, asawa ti biktima, a maikkan iti hustisia iti pannakapapatay ti asawana. (Tawid News)

Comments are closed.