Footer

EDITORIAL: Internal Cleansing iti PNP

RUMBENG laeng a saan pay nga agisayangkat kadagiti operasion kontra illegal a droga kabayatan ti panna-kaisayangkat ti internal cleansing iti Philippine National Police.

Daytoy ti nagkaysa a tarigagay dagiti adu umili kalpasan ti nasurok a makabulan manipud idi Oktobre 10, 2017 nga immandar ni Presidente Rodrigo Duterte a ti laengen Philippine Drug Enforcement Agency ti agmaymaysa nga ahensia nga agisayangkat kadagiti operasion kontra ti panagraira ti illegal a droga iti pagilian.

Iti memorandum ni Duterte, pinawilannan ti PNP ken National Bureau of Investigation nga agisayangkat kadagiti anti-illegal drugs operations. Immandarna iti PNP nga isayangkatda ti panagdalus kadagiti rinuker a polis ken ipamaysada a solbaren dagiti kadawyan a mapaspasamak a krimen. Binilin met ti Presidente ti NBI nga ipamaysada a trataren dagiti naisangsangayan a kaso a saan a magabenan ti PNP.

Impaulog ti Presidente ti Memorandum kalpasan a nairakurak ti resulta ti Social Weather Station survey a nagsuek ti public satisfaction rating-na gapu kadagiti nagsasaruno a pammapatay nga adda pakainaiganna iti illegal a droga nangruna kadagiti menor de edad.

Iti nasurok a makabulan a ti PDEA ti kakaisuna nga agisaysayangkat kadagiti anti-illegal drugs operations ket saanen a kas kadara iti naglabas a panawen a dagiti polis ket inaldaw a nagadu dagiti napappapatay a suspek a maatap nga adda pakainaiganna iti krimen.

Kabayatan ti panagtakem ti baro a PDEA Director a ni Retired Chief Supt. Aaron Aquino, iti laksid ti kinabassit ti bilang dagiti ahente ti ahensiada, adda dagiti natakuatan ken naarestoda a big-time nga agnegnegosio iti illegal drug trade.

Mairaman kadagiti natakuatan ti PDEA ket ti nakabalud ken kombiktado a maaw-awagan nga Illegal Drug Queen a ni Yuk Lai Yu, 72. Iti selda ti ganggannaet a balud sadiay Correctional Institution for Women iti Mandaluyong City, natakuatan dagiti adu a droga ken drug paraphernalia. Nakakompiskar ti PDEA iti nasurok a dua a kilo a mapapati a methamphetamine hydrochloride wenno shabu a naikabil kadagiti plastik a pakete ken burnay, ken maysa a million a kapsula a naglaon iti illegal a droga.

Nakaala pay ti PDEA iti 19 a tseke nga agpateg P633,593, maysa a blank checkbook, lima nga ATM cards, maysa a bank book account nga addaan iti deposito a P1,501,934.36 a nakanagan ken ni Anna Sy Balmeo, lima a mobile phones, maysa a tablet, maysa a pocket WIFI, saan a nausar a foil ken pakete ken nagduduma a kuarta ti ganggannaet a pagilian.
Naisaruno ti panagaresto ti isu met laeng a PDEA team iti anak ni Yu Yuk Lai a ni Diana Yu Uy iti pagnaedanna iti condominium unit sadiay San Miguel, Manila iti asideg laeng ti Malacañang Palace.

Nakakompiskar dagiti PDEA agents idi dua a kilo a mapapati a shabu nga agbalor iti P10 million iti dayta nga operasion. Ti nakaskasdaaw ket naduktalan nga adda dua a police escorts wenno bodyguard ni Uy.

Nasdaaw mismo ti PDEA Director a ti anak ti maibilang a reyna ti illegal a droga ket addaan iti dua a bodyguard a polis iti piton a tawen a da PO3 Walter Vidad ken PO2 Faizal Sawadjaan a sigud a nakadestino iti Police Security and Protection Group.

Inimbestigaranen ti PNP no kasano a napasamak ti pannakaidestino dagiti dua a polis kas security escorts ti drug dealer suspect manipud pay idi 2010, uppat a tawen kalpasan a nagbalin a biktima ti kidnap-for-ransom idi 2006 a rason ti nakaaprobaran ti aplikasionna. Naikkaten iti destino ken naimbestigaranen dagiti dua a polis. Saanda kano nga ammo ti illegal a negosio ti guguardiaanda.

Dakkel a burburtia ti pannakaaprobar ti aplikasion a maaddaan iti police security escorts ti maibilang nga anak ti kombiktado a drug queen ta daytoy ket agdalan iti nainget a pannakasagat. Aglasat daytoy iti nainget a background check ken imbestigasion iti opisina ti Director for Intelligence ken nasken ti panangaprobar ti PNP Chief.

Pribilehio dagiti umili uray dagiti pribado a tattao iti maaddaan iti police security escort ken agpatulong iti PSPG para kadagiti addaan iti pangta ti seguridadda. Ngem agdalan dagitoy iti naistrikto a proseso manipud iti pormal a panagkiddaw ti maseknan, pannakaimbestigar ti pangta iti biagna ken kinataona, agingga iti panangaprobar ti PNP Chief.

Iti kaso ni Uy, nalawag a saan a nasurot ti umno a proseso. Adda kadi dagiti padrino wenno nangtulong kenkuana tapno maikkan iti dua a bodyguard a polis a saan laeng a nangsaluad ti seguridadna, ngem uray pay ti panagnegosiona iti illegal a droga?

Nakalkaldaang ti natakuatan dagiti operatiba ti PDEA a kaadda dagiti polis a security escorts ti anak ti kombiktado nga illegal drug queen ken mismo nga agnegnegosio iti droga ta dagitoy a kameng ti PNP ket naarmasan ken nakawesan iti turay a mangipakat ti linteg. Susuelduan ida ti gobierno a nagtaud iti buis dagiti umili. Ngem adda met gayam salsalaknibanda a negosiante ti illegal a droga. Mano pay ngata a polis ti kastoy ti ar-aramidenda? Mano pay ngata dagiti nangato nga opisial ti adda pakainaiganna iti illegal a droga?

Immunan nga inakusaran ti Presidente nga adda dagiti rinuker a polis a mangipapaay iti proteksion kadagiti drug lord. Adda payen dagiti lima a heneral nga awanen iti serbisio dagiti binirngasanna iti narco generals. Iti inaramid ni Duterte a panangipasolona iti PDEA kadagiti anti-illegal drugs operations ket rumbeng nga agtalinaed kabayatan a ti PNP ket saanna pay a nadalusan dagiti rinuker a kamengna. Kasano a matalek dagiti polis nga agtiliw kadagiti agnegnegosio iti illegal a droga no mismo nga adda met dagiti kakaduada a kakumplot dagiti sindikato ti droga?

Karit ken ni PNP Chief Director General Ronald de la Rosa ti mangdalus kadagiti rinuker a polis tapno mapasubli ti naan-anay a panagtalek ken panagraem dagiti umili kadakuada. (Eden A. Alviar)

Comments are closed.