Footer

Polis, dinisnog ti estudiante

STA. MARIA, Ilocos Sur – Estudiante pay laeng dagitoy ngem dida ammon a respetaren dagiti pannakabagi ti linteg.

Gapu itoy, nakasuan iti direct assault on an agent or person in authority ni Denmark Corpuz y Elefante, 21, baro, ken residente iti Barangay Langlangca, Candon City, Ilocos Sur idinto a alarm and scandal maikontra ken Jaylord Vincent Tioaya y Darang, 21, baro, ken residente iti Barangay Lucaban, Burgos, Ilocos Sur.

Mapapati a dinisnog ni Corpuz ti maysa kadagiti polis a nangaresto kadakuada bayat nga addada iti dalan nga agturong iti ospital para iti pisikal nga eksamenda.

Idi agarup 6:45 ti malem ti Nobiembre 27, nagresponde dagiti polis kalpasan a nakaawatda iti pulong nga adda riribuk iti sanguanan ti 7-Eleven Convenience Store a masarakan iti Barangay Poblacion Norte ditoy nga ili.

Positibo nga intudo dagiti nagpalutpotan dagiti polis a dagiti dua nga agtutubo nga adda iti uneg ti pagtagilakuan ken nakaiggem iti botelia dagiti nangparnuay iti riribuk.

Inyam-ammo ni SPO1 Benson Abacco ti bagina kadagiti dua a suspek sana impakaammo dagiti kalinteganda idinto a rinikisa ida da PO2 Carlo Barcena ken PO2 Joie Calixterio no adda ikutda nga armas.

Ngem bayat ti panagdaliasatda nga agturong iti Ilocos Sur District Hospital, mapapati a nagbassawang ni Corpuz sana dinisnog ti likud ti ulo ni PO2 Calixterio.

Kanaig daytoy, naipaima iti Provincial Prosecutor’s Office, Narvacan ti kaso a direct assault against an agent or person in authority maikontra ken ni Corpuz, kasta met a naipila ti isu met la a kaso maikontra kenkuana iti MCTC, Sta. Maria-Burgos, Ilocos Sur a naipababaen iti Criminal Case No. 2750-SM.

Naipila met ti kaso nga alarm and scandal maikontra ken ni Tioaya babaen ti CC No. 2781-SM.

Nawayawayaan ni Corpuz kalpasan a nagpiansa iti P12,000.00. (Tawid News)

Comments are closed.