Footer

Sinursuran: Dios ti Mangkibin, Manong Buddy!

ANIA man a panagpakada, adda daytay liday/leddaang, saem/sanaang nga ukriten ken ibatina. Rikna/karirikna a di mailadawan uray pay ngata ti kalalaingan a pintor wenno mannaniw.

Ket kasta ti nariknami, Manong Buddy, iti pettat lattan nga ipapanawmo wenno panagpakadam.

Nadayyeg ti kinataomi, kasta metten dagiti ipatpategmo ken aminen a mangipatpateg kenka itoy a di ninamnama a pagteng.

Saan a di nagubbog dagiti mata dagiti mangay-ayat kenka. Wen, ta sika, Manong Buddy, a naragsak a makadendennada, makasarsarita ken kasinsinnukat ti kapanunotan, simminan itoy a biag.

Nadumaduma a dana ti inusatam. Rinaatam ti dana dagidi ubbing a tinapayam ti masakbayanda; ubbing a di laeng kapamilia wenno kabkabagian ngem ubbing a saanmo a kap-apin-ano. Iti kinaadipenmo ti tisa, saan a mabilang no mano ti nagraniag ti masakbayanda—aglalo kadagiti gingginget ti bantay a nakaipalpalladawam. Imbatim kadakuada ti kinapateg ti edukasion. Linuktam ti biag kadakuada.

Inusatam met ti dana dagiti mabukel a balikas. Impasngaymo dagiti nadumaduma a sinurat– sinurat a nangted ti adal, uray maregmeg a kuna ti dadduma; sinurat a nagsarmingan ken nangiburay kadagiti ray-aw ken pannakalinglingay. Kadagiti nakapulapolmo itoy a tay-ak, saan a di naimaldit kadakuada dagiti istilom, dagiti parsiak ti pammagbaga a nagpangalanda met a timmayaktak.

Ken adu pay a dana nga inusatam.

Ket tunggal dana wenno dalan, addaka a nagraniag. Addaka a di nakalipat kadagiti babassit, addaka a silalagip Kenkuana iti tunggal balligim, addaka a nangbaybayabay latta iti pagtaengan a binangonmo.

Isu a kasta la unayen a sanaang, leddaang, Manong Buddy, ti kellaat nga ipapanawmo.

Iti nabiit laeng a panawen a panagam-ammota, nagdakkel a banag ti impaay wenno imbatim.

Bay-annak man, Manong Buddy, ta taldiapak bassit dagiti naglabas.

Addaak idi iti hayskul idi damok a mabasa dagiti sinuratmo iti Bannawag. Saanak pay idi nga agduyos nga agsurat. Ngem managbasaak iti nasao a magasin.

Kadagidi a tawen, agsasaruno dagiti mabasbasak a saritam. Awan palabsek. Ti nagbalin a nakallalagip kaniak, daydi sarita nga Iti Kapanagan, Nalunes Dagiti Sabong.  No diak mariro, nakagun-od daytoy iti pammadayaw iti maysa a pasalip.

Nakalamlamuyot ti pannakaiparang dagiti pagteng iti nasao a sarita. Nupay naundayen a panawen ti naglabas, napatak latta ditoy lagip a daydi a sarita ket napnapno iti simbolo maipanggep iti maysa a biktima ti panangrames.

Ti ammok idi, Manong Buddy, saanto nga agtugmok ti dalanta. Ngem iti kombension dagiti Ilokano a mannurat iti Narvacan (Ilocos Sur), dita ti malagipko ti immuna a nakakitaak kenka. Kas agdadamo idi, wenno mannurot laeng, saanta a naikkan ti gundaway a nagsarita. Ngem addaak la idi a pasalsali a dumdumngeg kadagiti bangolan (maysaka kadakuada, Manong) no kasta nga agiistoriada. Isu pay a maadal, kinunkunak iti unegko.

Daydi ti immuna ken maudi a gundaway a nagtugmok dagiti dalanta iti nasao a kombension. Saantan a pulos a nagsarak kadagitoy a taripnong dagiti mannurat.

Nupay kasta, ad-adda pay gayam a panagtugmok ti mapasamak. Babaen ti panangawis kaniak ni Manong Jimmy Agpalo, Jr., nasarakak ti bagik a nagsursurat met iti pagsursuratanna. Iti panagsisina dagiti mangimaton kadaydi a pagsursuratan (no diak mariro maysaka kadakuada, Manong), isu metten ti panangipatakdermo iti bukodmo a warnakan-magasin.

Iti kaadda ni Manong Jimmy a kabadangmo, naisursurotak met. Nalabit, itoy a gundaway ti pannakakitam ti reggetko nga agsurat. Isu a kasta la unayen ti ragsakko idi awisennak nga agregular iti magasin-warnakan nga imatonam. Saan laengen a dagiti sarita ken daniw (adda pay laeng idi daytoy a klase ti sinurat nga iruruarmo) laeng dagiti namnamaek a maipablaak a sinuratko.

Kinunam idi Manong Buddy a tapno matulongam ti pamiliak, uray sangkabassit la ti adda kadakayo, agkolumak no kayatko.

Nagpangaduaak idi no awatek ti awismo, Manong. Ta kunak, maikariak ngata nga agkolum?

Ngem pinatibkermo ti riknak, Manong. Ita, aglima tawento gayamen ti kolumko itoy a Pebrero. Naundayto metten bassit. Ngem kaskasdi a dimo tinungday gapu iti panagtalekmo.

Ngem ita, nagpakadakan. Awan ti nakarawak a balikas idi naammuak dayta ken ni Manang Rose a kaingungotmo. Nariknaak lattan ti naukrit a leddaang iti barukongko. Numona ket nabiitta pay laeng a nagkita iti personal. Itay laeng Nobiembre 25!

Malaglagipko ti kinasam-it ti isemyo ken ni Manang Rose a nangpasangbay kadakami(kaduak dagiti padak nga adipen met ti tisa)  iti pagtaenganyo iti dayta a panag-benchmarking-mi. Nariknak iti dayta a gundaway a kasla nabayagtayon nga agaammo. Naglag-an man ti riknak. Nakasingsingedak a pinasangbayyo.

Ngem dayta gayamen ti maudi a panagkitata!

Awanen ti mabalinanmi a nabatim, Manong Buddy. Uray pay agluakami iti dara, saanmin a mapasubli pay ti karadkadmo. Ketdi, ammomi a plano ti Dios daytoy. Ta saantayto a pulos a matukod dagiti planona—planona nga iti ngudo, pagsayaatan ti tunggal maysa kadatayo.

Balonem laengen, Manong, ti kararagmi— ti panangidawdawatmi iti Namarsua ti panangkibinna kenka iti pagarianna.

Palubosandakan, Manong. Agingga iti panagkikitatayto manen!

Dios ti mangkibin, Manong Buddy!