Footer

133 a ganggannaet mainaig iti telecom fraud, naarestar iti raid iti Ilocos Sur

VIGAN CITY – Agdagup  iti 133 a ganggannaet manipud China ken Taiwan  dagiti inaresto ti autoridad  a maatap a mainaig iti illegal nga operasion iti telecomunnication fraud sadiay San Vicente, Ilocos Sur idi bigat ti Enero 13, 2018.

Iti nagtipon a puersa ti Philippine National Police Anti-Cybercrime Group, Special Action Force, ken Bureau of Immigration ket inarestoda dagiti ganggannaet iti raid sadiay Brgy. Nagtupacan ken Bayubay Sur, San Vicente.

Dagiti naarestar a suspek ken dagiti nakompiskar nga ebidensia a telecommunication  equipments ket dagus a naibiahe sadiay PNP ACG headquarters, Camp Crame para iti naan-anay nga imbestigasion.

Maibasar iti report, nagpatulong dagiti Chinese police iti PNP idi pay Nobiembre 2017  idi ma-monitor-da dagiti nasurok a 100 nga internet protocol a naggapu iti Pilipinas ken naka-address iti China.

Dagiti suspek ket isaysayankatda dagiti illegal nga operasionda babaen ti pananglimlimoda a polis, prosecutor ken judge kadagiti tawaganda a biktimaenda iti telepono sadiay China tapno makikilan wenno dawatanda iti dakkel a kantidad. Mairaman kadagiti adun a biktimada dagiti  akinkukua kadagiti dadakkel a negosio ken kompania.

Inrakurak ni PNP-ACG spokesperson Chief Insp. Artemio Cinco Jr. a dagiti biktima ket mabagaan nga adda kasoda mainaig iti numero dagiti teleponoda wenno bank accounts-da a kasapulan a maimbestigaran.  Dagiti suspek ket agdawatda iti bayad agingga iti $1.2 million manipud kadagiti biktima a mayakar kadagiti intedda a bank  account.

Nadiskobre ti raiding team iti maysa a bunkhouse  sadiay Brgy. Nagtupacan dagiti improvised soundproof telephone cubicles. Natakuatan pay dagiti improvised booth telephone iti maysa a hotel sadiay Brgy. Bayubay Sur.

Impalgak dagiti BID officials a dagiti naaresto a ganggannaet ket simrek iti Pilipinas a nagaramat iti tourist visa ken awananda iti working permits.

Comments are closed.