Footer

EDITORIAL: Agtultuloy ti Panagserbi ti Tawid News Magasin

NAINDAKLAN a karit ken leddaang ti dimteng iti Tawid News Magasin iti isasangbay ti Tawen 2018 gapu iti kellaat nga ipupusay ti Founder, Publisher ken Editor-In-Chief a ni Salvador Aleson Espejo idi Enero 2, 2018.

Karit iti Pamilia Espejo ti pannakaituloy ti pagiwarnak a nagbalinen a paset ti kaamaanda manipud pay idi nangrugi a naipablaak idi 2002, ken nagbalin a maysa kadagiti kangrunaan ken kaanduran a lokal a pagiwarnak iti Amianan a Luzon.

Iti benneg ti panagipablaak kadagiti lokal a pagiwarnak, adu dagiti nayusuat a warnakan, ngem dagitoy ket saan a nagpaut wenno lumned-tumpawda gapu ta narigat ti panangimanehar ti regional newspaper gapu kadagiti nagduduma a problema kangrunaanna iti kasapulan a pondo wenno puonan tapno agtaray ken agpaut ti sirkulasion. Iti laksid ti nainget a kompetision dagiti pagiwarnak ken ti panaglatak ti social media, nalasatan ti Tawid dagiti adu a karit ken rigat ket nagtultuloy a nagserbi iti kagimongan ken iti Kailokuan iti panangidanon dagiti damag iti Ilocos Sur ken iti Pilipinas. Narigat a dalan ti naglasatan ti Tawid manipud iti daydi umuna a pannakaipablaakna. Ngem kas ti nayanak a maladaga, in-inut ti panagdakkelna ken nasursurona ti timmakder iti bukodna a saka agingga iti nagna.

Nagpaut ti Tawid gapu iti napalaus a suporta dagiti patrons ken agbasbasa iti daytoy a pagiwarnak. Naglatak met daytoy a pagiwarnak kadagiti sabali a lugar uray iti social media gapu iti regular a pannakaipablaakna iti blogspot iti internet nga uray dagiti adda iti adayo ken sabali a pagilian ket mabasa ken maammuanda dagiti kabaruanan a pagteng ken pasamak iti Ilocos Sur ken Pilipinas. Nagserbi ti Tawid nga instrumento ti pannakaidanon dagiti kabaruanan nga impormasion ken makaliwliwa a sarita, mangted-adal a salaysay babaen kadagiti nalaing a mannurat a tinubay ken minulin ti padas ken panawen. Nagpaay pay daytoy a pagiwarnak iti pannakaipablaak dagiti napateg nga anunsio ken legal notice manipud iti pribado a sektor, korte, civil registrar, lokal a gobierno ken dadduma pay nga ahensia. Nagbalin daytoy a warnakan a natibker a kabinnulig ti gobierno ken pribado a sektor iti panagserbi kadagiti umili ken kagimongan.

Iti ipupusay ti Founder, Publisher ken Editor-In-Chief ket dakkel a pukaw iti benneg ti print media iti Ilocos Sur ken iti sapasap a Kailokuan gapu iti nauneg ken nalawa a padasna iti panangimanehar iti pagiwarnak. Kayarigan ti Tawid ti natukkolan iti natibker nga adigi ket marigatan a tumakder. Ngem babaen ti pammatibker dagiti naayat a sumupsuporta iti daytoy a pagiwarnak a buyogan ti panagtalek iti Dios, inkeddeng ti Pamilia Espejo ti panangitultuloyda nga imanehar ken patarayen kas napateg a patawid a gameng ti pimmusay nga ama ken adigi ti pamiliada.

Saan ngarud a naisurot a naitanem ti Tawid News Magasin iti pannakaitabon ti Founder, Publisher ken Editor-In-Chief. Ngem agtultuloy daytoy nga agserbi iti kagimongan ken pagilian. Kas ti pagtaengan a naawanan iti natibker nga adigi, ikagumaan ti Pamilia Espejo nga ibangon ken patibkeren daytoy a pagiwarnak.

Mangnamnama ti baro a manarawidwid iti Tawid kadagiti naayat a mangsupsuporta iti daytoy a pagiwarnak iti panangitultuloyda a mangkibin ken mangsaranay agingga a lumagda manen ti baro nga adigina tapno natibker a sumaranget kadagiti dumteng a karit ti panawen.     Maitultuloy ti Tawid News Magasin a pagiwarnak a mapagtalkan ken mapangnamnamaan.

 


 

Iti sango ti panagragragsak ken panagbalin a positibo dagiti Pilipino iti panangpasangbayda ti Tawen 2018, ket adu dagiti nakapadas iti kellaat nga ingangato dagiti nagduduma a produkto a mangpadagsen ti biag dagiti umili nangruna dagiti kadawyan a tattao ken napanglaw. Resulta dayta nga ingangato ti presio dagiti produkto ti panagbalinen a naan-anay a linteg ti Tax Reform for Acceleration and Inclusion (TRAIN) Law a nangipalubos ti pannakainayon ti buis wenno excise tax kadagiti mailaklako a produkto pakairamanan ti gasolina, krudo ken dadduma pay a produkto petroleo, agraman Liquefied Petroleum Products ken coal a kasapulan dagiti power plants nga agpatpataud iti supply ti koriente. Naipangato pay ti buis dagiti arak, sigarilio ken dadduma pay a produkto. Timmayok met ti buis ti soft drinks ken dadduma pay a mainum nga agar-aramat iti asukar ken dadduma pay a taraon.

Naipalaon iti TRAIN Law ti saanen a panagbayad dagiti trabahador wenno mangmangged nga agsusueldo iti tinawen iti P250,000 agpababa. Nanayonan met ti bassit a buis dagiti nangatngato iti sueldona. Naipangato pay ti buis dagiti dadduma pay a serbisio ken dagiti kotse ken lugan, ken dadduma pay nga alikamen.

Ipampannakkel ti administrasion ni Presidente Rodrigo Duterte nga iti implementasion ti TRAIN Law ket adu dagiti mabenepisiaran gapu ta saanen nga agbayad iti personal income tax dagiti nababa ti matgedanna. Ngem ti dakesna iti pannakanayon ti buis dagiti kangrunaan a kasapulan a produkto ket pataudenna dagiti agsasaruno a dakes nga epekto. Iti pannakaingato ti gasolina, krudo ken produkto petroleo ket manamnama met ti pannakaingato ti plete ken nayon ti presio dagiti dadduma pay a produkto ta manayonan met ti gastos dagiti komersiante iti panagpartuat ken pannakaibiahe dagiti tagilakoda.

Nasayaat ti panggep ti TRAIN Law tapno makapataud iti nayon a pondo ti gobierno para ti Build, Build, Build Program, ken dadduma pay a programa ken proyekto ti administrasion. Ngem saan koma a dagiti kadawyan ken marigrigat nga umili ti mangibaklay ti nadagsen a buis a mangparigat kadagiti Pilipino.

Comments are closed.