Footer

Ilocos Surians Grand Global Reunion ita Pebrero, awis ti Provincial Government

VIGAN CITY – Panagsubli iti Ilocos Sur ita a Pebrero 2018 dagiti nayanak ken nagindeg iti daytoy a probinsia nga agnanaeden iti sabali a lugar iti Pilipinas wenno ballasiw-taaw tapno makiinniliw, kitaenda ti nagdur-asan ti probinsia ken tapno agnegosio ken makatulongda kadagiti kaprobinsiaanda iti pannakapadur-as ti panagbiag dagiti umili.

Daytoy ti iyaw-awis ti Provincial Government nga inyetnag ni Vice Governor Jeremias Singson kabayatan ti naangay a Media Forum nga insayangkat ti Ilocos Sur Integrated Press.

Inrakurak ni Vice Gov. Singson a nakasaganan ti Provincial Government ken dagiti maseknan nga ahensia ti gobierno para iti daytoy naindaklan a pasken a mairana iti panangrambak ti probinsia ti maika-200 a tawen ti pannakabukelna inton Pebrero. Impakaammona a manamnama dagiti rinibribu dagiti dumar-ay iti Bicentennial Global Reunion a maisayangkat kadagiti nagduduma nga ili ken siudad iti Ilocos Sur. Inyawisna a saan laeng a dagiti naipasngay wenno nagindeg iti Ilocos Sur dagiti naawis nga agatender iti pasken ngem uray pay dagiti bukodda a pamilia.

Impakaammo ti Vice Governor nga adun a grupo ken gunglo dagiti naipasngay iti Ilocos Sur nga agnanaeden sadiay ballasiw-taaw ti nagkari ti idadar-ayda iti pasken ket manamnama a mapunpunnonto dagiti hotel, inns ken transient houses. Kiniddawna kadagiti umili iti Ilocos Sur nga ilukatda koma dagiti pagtaenganda a mangpasangbay kadagiti agatender iti Grand Global Reunion.

Impasingked ti Vice Governor a kabayatan ti Grand Reunion ket maisayangkat dagiti nagduduma a programa ken gannuat kadagiti amin nga ili ken siudad iti Ilocos Sur ket manamnama nga rumegta ti ekonomia ti probinsia nangruna ti turismo ken komersio.

Impatalged ti Vice Governor a naaramiden ti security plan ti Philippine National Police para ti urnos, kappia ken talna kabayatan ti pasken. Kiniddawda metten iti Department of Public Works and Highways ti napartak a pannakaileppas dagiti agdama a maisaysayangkat a proyekto kadagiti national roads and highways iti probinsia tapno naannayas ti trapiko. Nakitulagda metten kadagiti adda iti transportation and service industry para ti nasayaat a serbisio kabayatan ti Global Reunion.

Inrakurak pay ni Vice Gov. Singson ti natalged ken nasaysayaat a lugar a pakaangayan ti Kannawidan Festival sadiay Tamag, Vigan City nangruna ti pasilidad ken sanitasion tapno naurnos ken nadalus ti disso a pakaisaysayangkatan dagiti nagduduma a programa ken pabuya para ti panagrambak ti maika-200 nga anibersario ti pannakabukel ti Ilocos Sur.

, , ,

Comments are closed.