Footer

SINURSURAN: Dumanonka, 2018

(MAUDI A PASET)

Sabali laeng dagiti nabuyatayo iti telebision a biktima ti masaker ken panangrames. Kaudian dita ti agina a ti pay met nasinged a ‘gayyem’ ken kaklase ti ina ti suspek.

Ken ti maysa a good Samaritan a pinatayda gapu laeng iti panangisakitna iti maysa a nataengan a biktima ti panangholdap. Natulonganna ti baket. Pagdaksanna, ti suspek, binueltaanna daytoy a samaritano ket awan aniamanna nga inutangna ti biagna.

Isu a kasta la unayen ti ladingit ti pamilia ti nasao a Samaritano.

Kimmamakam pay iti Tawen 2017 ti maysa a babai ken construction worker a natay ta naratrat ti luganda. A polis dagiti kangrunaan a suspek.

Nagramut ti pasamak iti riribuk iti maysa a construction site. Binagaan kano dagiti construction worker dagiti agtrabtrabaho iti abayda a pasdek a dida unay agparnuay iti ariangga ta mariribuk ti panaginanada iti dayta a rabii. Aglalo ket nabannogda a nagmalem a nagtrabaho.

Pagdaksanna, napasamak ti gumilgil-ayab a sinnungbat nga immabot iti riribuk. Dagiti suspek, napaltoganda ti asawa ti maysa a construction worker. Gapuna nga intaray ti asawana, kaduana dagiti dadduma pay a construction worker, iti ospital ket nagluganda iti maysa a puraw nga Adventure.

Iti no ania a gapu, inreport kano dagiti barangay tanod kadagiti polis a maysa a babai ti napaltogan. Inlugan dagiti suspek iti panaglibasda.

Kas makita iti CCTV, sinurot dagiti tanod ti Adventure. Iti likudda, dagiti dimteng a nakamotorsiklo a polis.

Nakangngeg kano dagiti polis iti nagsaruno a kanalbuong a nagtaud kadagiti barangay tanod kabayatan ti panangkamkamatda kadagiti maatap a suspek. Isu nga inkornerda ti Adventure.

Yanna nga adat, idi nagsardeng ti Adventure, ket nakatapuak ti dua a karga daytoy a nagkunaanda nga adda pasienteda iti uneg ti lugan, nagsasarunon a kanalbuong ti nangngeg kalpasan a pinagpakleb ida dagiti otoridad.

Nagangayanna, ti babai a biktima a maitaray koma iti ospital, kasta metten ti maysa a construction worker, saandan nga immabot iti ospital. Nasugatan met ti asawa ti babai ken dagiti dadduma a kaduada.

Mistaken identity, nalawag dayta. A nangyeg manen iti saan a mailadawan a ladingit kadagiti biktima.

Ti saludsod, apay nga adda paltog dagiti tanod nga immuna a nagresponde? Apay a saan a pinennek nga umuna dagiti otoridad ti dimmanon kadakuada nga impormasion?

Over kill, kuna dagiti dadduma. Wen, a, ta nasurok a tallopulo ti gun entry iti Adventure. Iti maysa nga operasion, nalawag a no awan koma ti return fire dagiti maatap a managdakdakes, maisardeng ti panagpaltog. Ken sada la rumbeng nga agpaltog no adda nakatutok wenno naiputok kadakuada a paltog.

Ngem itoy a kaso, awan. Inayon payen ti kaadda ti dua a pinapaklebda nga agkuna nga adda pasienteda nga itaray iti ospital. Ken uray idi madama, ken simmardeng bassit ti panagpaltog, adda riaw iti uneg ti lugan nga adda pasienteda. Kaskasdi latta a pinaputokan ida dagiti otoridad kalpasanna.

Dagus a nasuspinde dagiti nasao a polis ken ti hepeda (command responsibility) kabayatan a maiwaywayat ti imbestigasion. Makidkiddaw met ti panagpalawag ti barangay captain no apay nga adda paltog dagiti tanodda.

Iti biagtayo, adda la ketdi met pagteng iti naglabas a tawen a mabalin a nangkeltay iti ragsaktayo. Nangsugat iti rikna ken panunottayo. Ket saan nga iti naminsan, pinabasoltayo ti Dios kadagitoy a pasamak.

Apay a siak pay, Apo? mabalin a kinunatayo pay.

Agbalin ketdi koma a tibkertayo ti kinababatayo iti imatang ti Namarsua. Saantayo a marukod ti planona iti tunggal maysa kadatayo. Ngem ammotayo nga iti planona, saan a ditayo agrag-o.

Dayta no ammotayo nga awaten dagiti pasamak!

Kadagiti met kakabsat a nakaawat kadagiti grasia ken pannakalag-an ti biag iti naglabas a tawen, saan koma a dagitoy ti panglipatantayo iti Dios.

Maitutop unay nga ad-adda ketdi a rumangen koma ti relasiontayo Kenkuana.

DUMANONKA, 2018! kunaentayo ngarud a siiisem iti baet dagiti nakasugatantayo iti Tawen 2017.

Itoy a baro a pangrugian, saan a dinatayo badangan ti Namarsua kadagiti pakasuotantayo. Ikawestayo laeng dagiti adal nga insurona. Saantayo a mangliplipat Kenkuana.

Mangbaruanan itoy a tawen. Saan koma laeng nga agpatingga iti New Year’s resolution dayta. Ibiagtayo.

Ta awanen ti kappapatgan a panangsarabo, panangpadanon iti Tawen 2018 no di ti natarnaw a puso ken panagpampanunot!

Naragsak a Baro a Tawentayo Amin!