Footer

Addan Spiritual Bond ti Papal Basilica ni Sta Maria iti Roma ken simbaan ni Apo Caridad iti Bantay

SAANEN a nasken a mapan sadiay Papal Basilica iti Santa Maria Maggiore, Rome, Italy tapno magun-od ti Plenaria Indulhensia wenno pannakapakawan dagiti basol ta mabalinen a magun-od daytoy babaen ti ipapan iti Shrine of Our Lady of Charity wenno simbaan ti Parokia ni San Agustin iti Bantay, Ilocos Sur.

Dayta ti nairakurak kabayatan ti Nasantuan a Misa a nakaiproklamaran ti spiritual bond ti Papal Basilica of Maggiore ken ti Shrine of Our Lady of Charity kasaruno ti rito ti pannakaidaton wenno “dedication” ti napangayed a simbaan ti Parokia ni San Agustin idi Enero 12, 2017.

Ti Misa ket indauluan da Arsobispo Marlo M. Peralta, Arsobispo Emeritus Ernesto A. Salgado, Bagued Bishop Leopoldo C. Jaucian, SVD, Nueva Segovia Vigar General Msgr. Cosmenio Rosimo Jr, ken Saint Augustine Parish Priest Msgr. Gary Noel Formoso, ken adu a papadi. Nakipagrambak pay dagiti mamadre, seminarista, estudiante dagiti eskuela Katolika, ken adu a laygo. Indauluan ni Vice Governor Jeremias Singson dagiti opisial ti gobierno a nakikaysa iti Misa. Saan a nakaanay dagiti tugaw iti nalawa a simbaan a nagyanan dagiti nakimisa ket adu dagiti nakipagrambak iti ruar babaen ti panangbuyada iti video screen a naimuntar iti templete iti sango ti imahe ni Apo Caridad.

Iti homilia ni Abp. Peralta, inlawlawagna ti kinapateg ti pannakaiproklamar ti spiritual bond ti Papal Basilica ni Santa Maria Maggiore ken ti simbaan ni Apo Caridad iti Arkidiosesis ti Nueva Segovia. Dinayawna pay ti napapintasen a simbaan ni Apo Caridad iti panangilungalong ni Msgr. Formoso ken suporta dagiti naayat a tumultulong iti simbaan.  Impaganetgetna ti kinapateg ti simbaan kas balay ti Dios a lugar a pakaangayan dagit Misa ken nagduduma a sakramento kas ti kasar, buniag ken pumpon. Inlawlawagna a napateg dagiti simbaan tapno adda pagkararagan ken pakisinnarakan dagiti tao iti Dios. Impaganetgetna a ti pagtaengan ti Dios ket saan laeng a dagiti simbaan, kapilia, katedral ken basilica ngem agtaeng met iti kaunggan ti tao.

Impasagepsepna pay ti kinapateg ti kaadda ti spiritual bond of affinity iti nagbaetan ti Papal Basilica ni Santa Maria Maggiore iti Roma, Italia, ken ti simbaan ni Apo Caridad tapno dagiti mamati ken deboto ket saanen a masapul a pumanawda iti Pilipinas tapno magun-odda ti Plenaria Indulhensia kas ar-aramiden dagiti mapmapan iti Papal Basilica. Indariragna a magun-od ti grasia a pammakawan ti Dios no dagiti sumrek iti simbaan ni Apo Caridad ket makimisa, agkompesar, agkararag ken agiwayatda kadagiti aramid ti kaasi.

Ti simbaan ni Apo Caridad ket maysa kadagiti kangrunaan a daydaywen dagiti pilgrim ken turista iti Ilocos Sur gapu iti kinadaan ken kinapintasna. Inaldaw-aldaw dagiti mapmapan a tattao iti simbaan ken iti pagkampanaan. Iti pannakapapintas ken kaaddan ti spiritual bond iti nagbaetan ti Papal Basilica iti Roma ken ti simbaan ni Apo Caridad ket manamnama nga umadu pay dagiti pilgrim ken turista a mapan iti dayta a simbaan.

, ,