Footer

Mamasapano clash ken ti Marawi crisis

MAILAGIP ita nga Enero 25, 2018 ti maikatlo nga anibersario ti nadara a ranget sadiay Tukanalipao, Mamasapano, Maguindanao, a nakatayan dagiti 44 a kameng ti Philippine National Police Special Action Force; maysa a sibilian, ken 18 a kameng ti Moro Islamic Liberation Front ken Bangsamoro Islamic Freedom Fighters.

Napapatay dagiti SAF commando opeatives kabayatan ti panangisayangkat iti Oplan Exodus tapno matiliw ti Malaysian ken international a terorista nga eksperto iti panagaramid ti bomba, ken wanted iti United States Federal Bureau of Investigation a ni Zulkifli bin Hir alias Marwan, ken Abdul Basit Usman. Napapatay dagiti SAF Commando ni Marwan, nakalibas met ni Usman. Ngem iti panagsanud dagiti SAF Commando, napasamak ti nadara a ranget a maibilang a missencouter iti nagbaetan ti SAF ken dagiti nagtitipon a puersa ti MILF ken BIFF.

Maibilang dayta a trahedia iti pakasaritaan ti PNP a kaaduan dagiti natay iti maysa nga insidente. Naglak-am iti nakaro a kritisismo ni sigud a Presidente Benigno Aquino III, suspendido a PNP Chief Director General Alan Purisima, ken SAF Commander Getulio Napeñas, iti nagbanagan ti Oplan Exodus gapu ta suspendido idi ti PNP Chief, ken nailimed ti operasion kada Interior and Local Government Secretary Mar Roxas ken PNP Deputy Director General Leonardo Espina.

Naisayangkat dagiti nagduduma nga imbestigasion iti ranget sadiay Mamasapano, babaen ti Senado, National Bureau of Investigation ken Commission on Human Rights. Natakuatan a napasamak ti trahedia gapu iti kaawan ti umno a coordination iti nagbaetan ti PNP – SAF ken dagiti tropa ti Armed Forces of the Philippines tapno nadarasda koma a nakaipatulod ti tulong. Awan met ti coordination iti MILF gapu ti implementasion ti ceasefire. Nailimed ti Oplan Exodus tapno agballigi ti mision a mangparmek ken ni Marwan ta napaay dagiti naming-adu a nasapsapa nga operasion a naipakaammo kadagiti unit ti AFP. Naduktalan pay a kabayatan ti ranget sadiay Tukanalipao ket nakaestambay laeng dagiti adu nga operatiba ti SAF iti igid ti highway sumagmamano a kilometro ti distansiana iti war zone iti kamaisan nga abay ti nalubo a karayan, ngem saanda a nagtignay kabayatan ti pannakiranget dagiti kakaduada.

Dinayyeg ti Mamasapano Massacre ti Aquino Administration gapu iti kaadu dagiti napapatay a SAF Commando uray no napatayda met ti kangrunaan a target a ni Marwan kas kinompirma ti FBI a positibo nga isuna ti natay maibasar iti DNA test.  Nakaro a protesta ken pammabalaw ti linak-am da Aquino, Purisima ken Napeñas kadagiti umili aglalo dagiti naulila a pamilia dagiti napapatay a SAF Commando.

Uray iti agdama a panawen nga agduan a tawen nga awanen ni Aquino iti turay ken nabayagen a nakapagretiro da Purisima ken Napeñas, ket kasla al-alia wenno batibat kadakuada ti trahedia sadiay Mamasapano gapu ta kalaksidan ti ibabangon manen ti lagip dayta a nadara a pasamak no dumteng ti anibersariona, ket agtultuloy ti panangsangoda iti Sandiganbayan kadagiti nakaidarumanda a kaso mainaig iti Mamasapano Massacre.

Biddut man ti pannakailimed ti Oplan Exodus ken panangtalek ni Aquino kada Purisima ken Napeñas, ngem kas Commander-In-Chief, desision dayta ti Presidente tapno masaluadan ti panagballigi ti operasion. Uray adu dagiti natay a SAF Commando, saan met a naan-anay a napaay ti Oplan Exodus ta napapatayda met ni Marwan a mabalin a no nakalibas ken sibibiag pay koma ket nakaisayangkat pay iti ad-adu a terorismo a mabalin a nakaibuisan iti ad-adu pay a biag, kas ti pannakalibas ti pasurotna a ni Basit Usman a  a natay kabayatan ti itutulongna kadagiti terorista a Maute Group ken Abu Sayyaf Group iti nadara a gubat sadiay Marawi City iti nagbaetan dagiti tropa ti gobierno ken dagiti mangid-idolo kadagiti terorista iti Islamic State of Iraq and Syria.

No ikompara ti ranget iti Mamasapano, nadardara nga amang ti gubat sadiay Marawi City ken ad-adu dagiti nadadael ta iti sentro ti siudad a nagpaut iti agpito a bulan, ken nakaigapuan ti pannakaideklarar ti Martial Law iti intero a Mindanao agingga inton agtapus ti 2018.

Agdagup iti 166 dagiti napapatay a soldado ken polis pakairamanan dagiti 12 a natay iti panagitinnag ti bomba dagiti eroplano. Nasurok met a 1,400 dagiti nasugatan iti tropa ti gobierno. Agdagup met iti 962 dagiti napapatay a terorista pakairaman dagiti 13 a ganggannaet. Agdagup met iti 87 dagiti napapatay a sibilian, 40 kadakuada dagiti natay iti sakit.

Napasamak ti nadara a gubat sadiay Marawi City gapu ti “failure of intelligence” iti benneg ti PNP ken AFP. Saan a naamuan ti nabayag a panagsagana dagiti terorista iti dayta a nadara ken napaut a gubat ta ti ipangpangruna ti administrasion ket ti gerra kontra illegal a droga. Ngem apay nga agkurang ti panangbabalaw dagiti Pilipino iti panagbiddut ti agdama nga administrasion?

Comments are closed.