Footer

Ni Sadiri, ni Tata Roberto, ken ti Batonlagip

PANAGRIKNA ni Sadiri Marin, kasla adda pay laeng isuna iti kombension nupay asidegen iti balayda iti Balingit, iti ili ti Pamplona. Malaksid a nakapasiar idiay San Fernando, La Union, adu pay dagiti banag ken pasamak a dina pulos malipatan iti iyaatendarna iti maika-49 a Nasional Kombension ken Literary Workshop ti GUMIL Filipinas. Gunglo dagiti Mannurat nga Ilokano ti kayat a sawen ti GUMIL. Nagkuyogda ken Tata Roberto  Pacni a napan ken nagawid. Daytoy ti nangbayad iti registration fee-na ken ti pletena agpapan ken agawid. Napalaus ti yaman ni Sadiri. Immuna itay a bimmaba ni Sadiri iti GMW Florida ta idiay pay la Ballesteros ti pagdissaagan ni Tata Roberto. Nakastreken iti balayda ngem kasla mangmangegna pay laeng ti pannakaiwaragawag ti paulo ti nangabak iti maikatlo a gunggona iti on-the-spot a salip iti panagputar iti daniw. Saan a naigawid ni Sadiri ti panagarimasa dagiti matana.

Taga-Ammubuan ni Tata Roberto. Adun dagiti saritana iti Bannawag a nabasbasa ni Sadiri. Simmeksek iti panunotna daydi damo a panagam-ammoda iti selpon. Agdengdenggeg idi ni Sadiri iti radio: Ni Roberto Pacni daytoy, Sir Noel. Kayatko man a kablaawan amin nga agdengdengngeg iti programam. Kasta metten kadagiti kalugarak. Ay, ipatangatangmo man, sir, nga adda kopiak iti libro maipanggep iti ortograpia ilokano. No asino man ti mayat a maaddaan iti kopia, awagandak laeng iti numero ti selponko: 09264261287. Agyamanak, sir. . .

Wen, kas  kenkuana, arigna inaldaw kano met ni Tata Roberto nga agdengdengngeg iti Ilokanong Kowboy a programa ni Manong Noel Estrella iti Radyo Pilipinas. Ket nalabit, mangmangeg met daytoy dagiti daniw ni Sadiri.

Anian a ragsak idi ni Sadiri. Dina impagarup a makasangona iti mabiit ti mannurat a kaprobinsiaanna. Ti ammona idi ket agtawen la iti nakurang a tallopulo dayta a Roberto Pacni. Ngem idi pinalabsanna ti profile daytoy iti facebook, doble singko gayamen ti tawenna. Adda pay la taerna a nabatbati. Panagkuna ni Sadiri, dimmakkel ni Tata Roberto iti talon ken baybay. Adu la ketdi ti masursurona ken ni Tata Roberto maipanggep iti panagsurat.

Alisto la a nabirokan ni Sadiri ti balay da Tata Roberto ta naibagan daytoy iti panagtintinnextda.

“Addaak, ma’am” indayaw ni Sadiri idi makagteng iti balay da Tata Roberto. Immisem ti baket a nadanonna nga agsagsagad iti paraangan.

“A, sika ‘diay ibagbaga ni lakay nga umay ditoy, nakkong?” Immisem ti baket. “Nana, kunam lattan, Nana Ester.”

Intulnog ni Nana Ester  iti likud ti balayda. Nasangpetanda ni Tata Roberto a madama a mangtangtangad iti atep ti kalapaw nga ayanna. Madama nga agsurat. Inalamano ti lakay idi makaasideg ni Sadiri. Naisem daytoy a nangpalaem ken Sadiri iti kalapaw. Naginnestoriada.

Kasta ti pasamak ti damoda a panagkita ken Tata Roberto. Saanen a mabilang ni Sadiri no namin-anon a simmarungkar iti pagtaengan ni Tata Roberto sakbay ti idadar-ayda iti kombension. Adu a katkatawa, adu a saludsod ken sungbat. Nakaad-adu ti kuring ni Tata Roberto iti damo a daniw nga inpakita ni Sadiri. Idi damo, nakarikna pay ketdi ni Sadiri iti suron gapu iti kinaadu ti kuring dagiti manuskritona. Nupay kasta, pinagbalinna dayta a karit tapno dumur-as dagiti putarenna a daniw ken sarita. Bumaybayag, bumasbassit dagiti biddut a makita ni Tata Roberto. Namin-adu met a nangiyawid kadagiti libro nga urnong daytoy. Adda pay libro nga insagut ni Tata Roberto kenkuana. Naglaon daytoy iti sangapulo a sarita. Amin dagitoy ket nangabak iti pasalip. Addanto koma met librok, nakuna idi ni Sadiri iti panunotna. Tinangadna ti langit.

Saan la a maipanggep iti panagsurat ti nasursuro ni Sadiri. Adu pay ti insursuro kenkuana ni Tata Roberto maipanggep iti panagbiag ken pannakilangen iti pada a tao. Iti laksid ti kinaretirado a mannursuro dagiti agassawa ken kinapremiado a mannurat ni Tata Roberto, awan ti nakitana a kinapasindayag dagiti agassawa. Managparabur pay dagitoy. Abunaw ti mirienda nga ipasangoda: patupat, tinubong, suman, wenno pansit miki. Kasta met ti sidaen iti pangaldaw: tinola a netib, napalkang a kaggo, kilawen a taburkit, rasa, pasayan, dalag wenno igat. Idi damo, agkedked ni Sadiri a mangaldaw ngem pinilit dagiti agassawa.

Immisem ni Sadiri iti pannakalagipna iti ipapanna iti kombension. Nagmayat man ti naimatanganna a langenlangen dagiti mannurat. Kasla nabayagen a nakapulpulapolda iti kinasingedda kenkuana. Gimmayad ti isemna idi maam-ammona ni Roland Segurista. Ti ammona ket nataenganen daytoy. Ngem apagsagpatna la gayam a tallopulo. Naam-ammona pay daydiay lakay nga aw-awaganda iti Imingway. Gapu ngata iti agsangadangan nga imingna. Imbettak ni Sadiri ti kagagayadan nga isemna idi iyawat ni Imingway ken Lester Pablito ti Nikon DSLR D7200 a kamerana. Maysa met daytoy a mannurat. Ti ammo ni Sadiri ket natayag daytoy. Gayam ta din sa pulos nakaraman iti star margarine idi ubing, piman. Adu pay dagiti naam-ammona. Kas ken ni Apo Dionisio S. Bulong. Napalalo ti ellek ni Sadiri idi mabasana ti libro daytoy a ‘Fighting Pogi’ a ginatang ni Tata Roberto. Gayam ta saan met unay a maun-uni daytoy iti personal. Nalaingda ketdi nga agkilaw iti kaggo ken Reynaldo Andres. Arigna pagatsiket laeng ni Sir Ranilo Bautista idi nagabayda. Adda idi iti asidegna ni Bionic. Ni Apo Ariel S. Tabag a poetry editor ti Bannawag, ti ammona ket natayag daytoy ngem nalukmeg gayam a pamandeken ken atiddog ti buokna. Nalagipna ti kinuna ni Apo Tabag kalpasan ti pannakapadayawda a nangabak: Maipablaakto daytoy iti Bannawag, gagayyem. Ala, agurnoskayo ta alaannakayo iti ladawan ni Kaka Roy Aragon. Long hair met ni Apo Aragon.

Aglagto la koma idi Sadiri iti ragsakna ngem addada met iti entablado a kaduana dagiti nangabak, da Mayor Romy Aguinaldo ken SB Fidel Cabulisan nga isponsor ti pasalip, BM Valoria a president ti GUMIL, ken ni Apo Tabag.

SAAN pay la a mamati ni Sadiri nupay iggemnan ti kopia ti Bannawag a nakaipablaakan ti daniwna. Lima a kopia ti ginatangna. Mangipa-wood laminate-to iti maysa. Nalagipna ni Tata Roberto. Nagarimasa dagiti matana. Batonlagip ti paulo ti daniwna. Maikatlo laeng a gunggona. Ngem, para ken ni Sadiri, maysa daytoy a batonlagip. Batonlagip, ta damo a pannakisalipna ken damo a pannakagun-odna iti gunggona. Batonlagip met daytoy ken ni Tata Roberto– isuna a premiado ngem nanumo ken mannakitulong a mannurat. Iddenesna ti Bannawag iti barukongna.

Linawaston a gumatang ni Sadiri iti Bannawag. Gumatangto pay kadagiti libro maipanggep iti Literatura Ilokano. Masiguradona, maragsakanto la ketdi ni Tata Roberto no madamag daytoy a silulukat dagiti Bannawag ken dadduma a librona kadagiti amin a mayat nga agsursuro nga agputar iti daniw ken agsurat iti ababa a sarita ken salaysay.