Footer

Riri dagiti opisial iti Philippine Charity Sweepstakes Office

ADU a tulong ti ipapaay ti Philippine Charity Sweepstakes Office (PCSO) kadagiti napanglaw nga addaan iti problema iti salun-at. Ngem iti panagririri wenno saan a panagkikinnaawatan da PCSO General Manager Alexander Balutan, retirado a heneral ti Armed Forces of the Philippines, ken Board Member Sandra Cam, ket mabalin nga agbunga kadagiti kontrobersia a mangapektar ti operasion ti PCSO.

Narugianen iti Senado ti imbestigasion iti kontrobersia iti PCSO nga idauluan ni Senador Panfilo Lacson, Chairman ti Committee on Games and Amusement. Inakusaran ni Cam ni Balutan iti panangisayangkat iti nabarayuboy a Christmas party ti PCSO iti maysa a five-star hotel a nakagastosan iti agarup P6 Million Pesos. Ngem naglibakan dayta ni Balutan. Inakusaranna ketdi ni Cam a daddadaelenna isuna ta kayatna a maala ti kangatuan a puesto iti PCSO tapno maipasolona iti gayyemna a ni Charlie “Atong” Ang, nalatak a negosiante ti sugal, ti panangpataray ti amin nga Small Town Lotteries iti pagilian. Impalgakna nga idi 2016 ket kinuyog ni Cam ni Ang, a napan iti opisinada tapno kayatna nga isu ti mangpataray kadagiti STL, ngem saanda a pinalubosan.

Dinillaw ni Senador Panfilo Lacson ti pannakaangay ti nagarbo a Christmas party ti PCSO iti maysa a five-star hotel ta saan a mayanatup dayta iti sanga ti gobierno a charitable institusion. Binabalawna ti kabassit ti mapaspastrek ti PCSO iti STL iti P1.7 billion a binulan a mabalin a dumanon koma iti P6 Billion.

Nasayaat dagiti paliiw ken kritisismo ni Lacson kadagiti mapaspasamak iti PCSO ta kas government charitable institution ket nasken a dagiti mangimaton ket agbiagda iti kinasimple, saan ketdi a kinabarayuboy kas ti napasamak a nagarbo a Christmas program. Mayanatup unay ti pammabalaw ni Lacson iti mapastrek ti PCSO iti STL a napagbalin a lehitimo nga operasion ti hueteng. Kabisadona ti magansia iti hueteng ta idi isuna ti Hepe ti Philippine National Police idi panawen ni Presidente Joseph Estrada ket isu ti nangimandar iti nainget a kampania kontra hueteng. Kabisadona ti inaldaw a maganansia dagiti mangimanmanehar kadagiti huetengan a napagbalinen nga STL.

Adu nga umili dagiti masmasdaaw iti panaglatak manen ni Atong An iti panangmanehar ti PCSO iti STL kalpasan ti panagulimekna iti adu a tawen. Maipalagip a naglatak ni Ang idi panawen ni Presidente Estrada ta kabayatan ti panagririda gapu iti pannakapataray ti hueteng iti Kailokuan ken ni sigud nga Ilocos Sur Governor Luis “Chavit” Singson. Nasinged nga agpagayam idi da Ang, Singson ken Estrada. Napadisi ken nabalud ni Estrada iti turay. Nabalud met ni Ang iti sumagmamano a tawen.

Nakaskasdaaw ta iti laksid a ti illegal a hueteng a pinadas a pinasardeng ni Lacson idi isuna ti PNP Chief, ken nagbalin a mitsa iti pannakapadisi iti turay ni Estrada, ket in-inut a napagbalin a legal babaen ti STL. Ngem uray nagbalinen a legal ti STL, isu manen ti gapu iti saan a panagkikinnaawatan dagiti opisial iti PCSO a da Balutan ken Cam. Uray legalen ti STL, ket adda pay laeng mapaspasamak nga illegal iti pannakamanehar dagitoy a sugal?

Kagiddan ti bumarbara a susik da Balutan ken Cam, kellaat ti panaglusulos ti sigud a Chairman a ni Jose Jorge Corpuz gapu iti salun-atna. Dagus met a nangdutok ni Presidente Rodrigo Duterte iti baro a PCSO Chairman a ni Anselmo Simeon Pinili, retirado a kameng ti Philippine National Police, ken kaklase ni Balutan sadiay Philippine Military Academy.  Iti pannakadutok dagiti retirado a heneral kadagiti dua kangatuan a posision iti PCSO, namnamaen dagiti umili a mapasayaat ti mapastrek ti charitable institution tapno ad-adu dagiti matulongan a napanglaw. Ngem mapasamak laeng dayta no maikkat dagiti kurap nga opisial iti ahensia?

Nabukel ti PCSO idi 1934 kas state lottery company. Maysa daytoy a government-owned and controlled corporation iti salinong ti Office of the President. Mandatona ti agisayangkat iti fund raising ken mangipaay ti pondo para iti health programs, medical assistance and services, ken mangipaay ti tulong iti nasional a panagkasapulan. Dagiti maur-or a pondo ti PCSO ket mapan iti Presidential Social Fund tapno mapadur-as ti social welfare ti pagilian. Dagiti pamataudan ti PCSO iti matgedan ket dagiti Sweepstakes Draw, National Lotteries (Lotto), Small Town Lotteries, ken Horse Racing.

Panawen pay dagiti Kastila idi nangrugi ti loteria iti Pilipinas idi 1833. Ni Jose Rizal ket nangabak pay iti loteria idi nagpaing sadiay Dapitan, ken indonarna ti inabakna para iti proyekto ti edukasion. Idi 1932, inwayat ti American Insular government ti sweepstake tapno makaur-or iti pondo para ti sports projects ti Philippine Amateur Athletic Federation. Naisaruno dagiti pangsuporta iti Philippine Anti-Tuberculosis Society babaen ti National Charity Sweepstakes.

Idi Marso 1935, inaprobaran ni Presidente Manuel L. Quezon ti Act No. 301 nga impasa ti Philippine Legislature idi Oktobre 30, 1934 para ti pannakabukel ti Philippine Charity Sweepstakes, kasukat ti National Charity Sweepstakes. Naamendaran ti corporate charter babaen ti Republic Act 1169 idi Hunio 18, 1954 bababen ken ni Presidente Ramon Magsaysay. Idi Septiembre 1979, naaprobaran ti Batas Pambansa Blg. 42 tapno mapataud ti Charity Fund ken pannakusar dagiti saan a naala a premio. Idi Enero 1995, kabayatan ti panagakem ni Chairman Manuel Morato, nairugi ti umuna nga online lottery iti pagilian babaen ti Lotto. Idi Marso 20, 2006, idi panawen ni Presidente Gloria Arroyo, nayusuat ti Small Town Lottery tapno kompetensiaanna ti hueteng a nalatak a sugal a kombinasion iti dua a numero manipud 1 – 38 a nagbalin a puon ti kurapsion dagiti opisial ken agserserbi iti gobierno.