Footer

SINURSURAN: Mangrugi Koma Iti Pagtaengan (Maikadua a paset)

(MAIKADUA A PASET)

Daytoy nga adalan, nagtaud iti adda ibagbagana iti ilimi. Maited amin a kayatna. Naisungsong iti maiparit nga agas gapu itoy. Ket dayta ti nangiduron kenkuana tapno maaramidna ti nakaam-ames a banag.

Idi mapagsaludsodan no apay a naaramidna ti kasdiay iti mismo a titserna, ken nagbalin nga adviser-na pay, kinunana a dina ammo ti inar-aramidna. Anian a nagbileg ti gita ti droga ta pukawenna amin a kinaimbag ti maysa a tao!

Dayta nga inaramidna ti nangted iti dakkel a riribuk iti biagna. Nauray ti umno nga edadna sa nabalud. Dakkel ti panagbabawina ngem naladawen ti amin. Kasta met dagiti nagannak kenkuana. No kano la koma ta dida binaybay-an bayat ti panagdakkelna… no dida kano la koma nagdepende iti kuarta a mait-itedda iti anakda. Ken adu pay a no la koma.

Dakkel met ti akem dagiti mannursuro iti pannakaragpat ti naan-anay nga urnos wenno kappia. Gapu ta isuda ti maikadua a nagannak dagiti ubbing, dakkel ngarud met nga akemda ti pannakamuli dagitoy. Saan a barengbareng. Rumbeng a maikkan iti pateg. Di nga agpatingga laeng ti mannursuro iti panangyallawat iti adal kadagiti leksion iti uneg ti pagadalan. Napangpangruna koma pay ti panangibisikna kadagiti nabalitokan nga adal a mangyasideg kadagiti ubbing iti narimat a masakbayanda. Kangrunaanna, ti panangilagana iti isip dagiti adalanna ti kinapateg ti kinapakumbaba, ayat, ken panangpakawan kadagiti nag-basol.

Panangpakawan. Forgiveness.

Wen, maysa met daytoy a rason iti kinaawan talna iti agdama. Ta pudno man met a narigat ti mamakawan! Nalaka kad’ lattan a lipaten dagiti babak nga inaramid ti padatayo a parsua? Nalaka kad’ lattan nga itanem ti panangilupitlupitda kadatayo? Nalaka kad’ lattan a baybay-an ti panangidadanesda kadatayo?

Gura la ketdi ti rumusing iti pusotayo no kasta nga adda dakes a naaramid kadatayo ti padatayo a tao. Daytoy a gura ti mangpagil-ayab iti rissik a manguram iti kinatao ti nagbasol kadatayo… kangrunaan la unay iti kinataotayo.

Apay ngamin ta nagrigat la ketdin ti mamakawan?

No marigatanka a mamakawan, adtoy dagiti sumagmamano nga aramiden/ammuen tapno mapukaw dayta gura iti barukongmo ket nalaklakanto laengen a mamakawan:

Umuna, adalam ti bagim iti kinapateg ti mamakawan. Awan ti perpekto a tao. Amintayo, managbasol. Maitutop ngarud a mamakawantayo tapno pakawanenda met dagiti nagbasolantayo. Kangrunaan la unay, tapno pakawanen ti Apo dagiti basoltayo ket maikaritayo a makipagnaed iti pagarianna.

Kitaentayo daytoy: Agiin-nanus ken agpipinna-kawankayo no adda pagkunaan ti maysa iti sabali. Masapul nga agpipinna-kawankayo a kas iti panangpakawan ti Apo kadakayo (Colosas 3:13).

Maikadua, mangilatangka iti uray sumagmamano a kanito iti inaldaw tapno dalusam ti panagpampanunotmo. Pukawem dagiti negatibo; suktam iti positibo. Dimo ipalubos a gura wenno pungtot ti agtaeng iti kinataom.

Maikatlo, sursuruem ti mangrugi a mamakawan kadagiti babassit a banag. Kas pangarigan, adda nakainnipit iti trapiko, bay-am koma lattan. Kasta met no adda nangsingit kenka iti pila. Dimo palugodan ti pungtot a mangarakup iti pakinakemmo. Mama-kawanka. No nagbalinen a paset iti biagmo ti mangpalabas kadagiti babassit a biddut, saan a dimonto maaramid ti mamakawan kadagiti dadakkel a banag a naaramidda kenka.

Maikapat, ti kinaawan ti pammakawan kadatayo, mangted laeng iti gundaway kadagiti sabali tapno rimbawandatayo. Gapu iti panangadipen kadatayo ti gura isu a ditay mamakawan, saantayo a makaaddang. Saantayo a mairusuat dagiti narimat a sirmata. Idagelnatayo ti gil-ayab iti barukongtayo.

Maikalima, itabonmo ti dakes a marikriknam iti padam a tao — iti literal a panangimutektek. Imbes nga agbuongtayo kadagiti alikamen iti balay wenno agbugkabugkawtayo wenno agsaosao (a mabalin a pagtaudan ti nakankana a situasion) kadagiti di malamlamut ti aso, napipia kano no isurattayo iti papel dagitoy a rikrinaentayo ket ikalitayo iti arubayan. Kasla ang-angaw ngem segun kadagiti eksperto, dakkel ti maitulong daytoy tapno lumag-an ti riknatayo ket ditayon makaaramid pay iti pagbabawyantayo iti udina.

Maikanem, rumbeng a maammuam ti dakkel a madi nga ibunga iti salun-at ti panangkepkep iti sakit ti nakem. Dadaelenna ti sibubukel nga emosion a mangisangbay iti sakit iti puso. Wen, sakit iti puso! Adda met dita ti depression. Ken sakit iti kudil segun kadagiti eksperto. Kayatmo ngarud ita a lak-amem dagitoy gapu laeng iti dimo panangpakawan kadagiti nagbasol kenka?

Maikapito, padasem ti mamakawan a dagus. Narigat iti damo. Ngem no masanaykan, mariknam a nalag-an ti panagbiagmo iti inaldaw. Awan ti pampanunotem a kabusormo, nga adda ti sakit ti nakemda kenka. Di kad’ nagsayaat ti tunggal aldaw a sagut ti Dios kadatayo no kastoy?

Maudi, ti kano panangpakawan ket dakkel a sagutmo iti bagim. Wen, met ngamin. Asino, aya, ti di mangayat iti natalinaay a panagbiag? Ti biag a natalna? Ti biag a nainkappiaan?

Laglagipentayo pay: Tumakderkayo nga agkararag, pakawanenyo ti siasino man a nakabasol kadakayo tapno pakawanento met ni Amayo sadi langit dagiti basbasolyo (Marcos 11 :25).

Comments are closed.