Footer

EDITORIAL: Panagsubli ti PNP iti Anti-Illegal Drugs Operations

MAKAPUDNO ngatan ti Philippine National Police iti panangibaklayna iti akemna iti kampania ti gobierno a mangpaksiat ti illegal a droga?

Kalpasan ti namindua a daras a temporario a pinasardeng ni Presidente Rodrigo Duterte ti pannakipaset ti PNP iti anti-illegal drugs operations gapu kadagiti kontrobersial a nakainaigan dagiti polis iti naglabas ket minandarna manen ida nga agsubli iti kampania kontra illegal a droga gapu ta saan a magabenan ti Philippine Drug Enforcement Agency a solbaren ti nagrairan a droga iti pagilian.

Nagsubli manen dagiti polis a mangisayangkat iti mapagduduaan nga Oplan Tokhang ken Oplan Double Barrel kontra kadagiti maatap nga adda pakainaiganna iti illegal a droga. Impasingkeden ni PNP Chief Director General Ronald Dela Rosa nga adun dagiti baro a pagannurotan wenno guidelines iti pannakaisayangkat dagiti anti-illegal drugs operations dagiti polis tapno malisian ti pannakalabsing dagiti kalintegan dagiti tattao wenno human rights. Impatalgedna ti pannakapili dagiti nadalus ti integridadna a polis a makipaset kadagiti operasion kontra droga. Naparegta metten ti pannakikaysa ti pribado a sektor nangruna dagiti kameng ti media ken human rights advocates kadagiti anti-illegal drugs operasion.

Iti laksid kadagiti pammasingked ti liderato ti PNP nga iti panagsublida iti anti-illegal drugs operations ket maliklikanen ti pannakalabsing ti human rights
nangruna ti pannakapapatay dagiti masuspetsa nga adda
pannakainaigna iti illegal a droga ket adu latta dagiti tattao ti agbuteng gapu kadagiti napasamak a nadara a police operations ken extra judicial killings iti naglabas manipud idi nagakem a Presidente ni Duterte idi Hulio 1, 2016. Maibasar iti record ti PNP, manipud iti panangrugi ti kampania illegal a droga ket nasuroken a 7,000 a kaso ti pammapatay pakairamanan dagiti agarup 2,500 a biktima kadagiti police operations ken kaso a mapapati a biktima ti extra judicial killings.

Immuna a pinasardeng ni Duterte dagiti amin a police anti illegal drugs operation idi Enero 30, 2017 agingga koma iti saan a madalusan ti PNP kadagiti rinuker a polis a mangdaddadael ti imahe ti institusion kabayatan idi ti kontrobersia a nakainaigan da Supt. Raphael Dumlao II, SPO3 Ricky Sta. Isabel, ken dadduma pay a polis iti nawaran a PNP Anti-Illegal Drugs Group iti panagkidnap iti negosiante a Koreano a ni Jee Ick-Joo iti balayda sadiay Angeles City, Pampanga idi Oktobre 2016, ken pannakapapatayna iti uneg ti Camp Crame, ti PNP National Headquarters.

Iti imbestigsion idi ti Senate Committee on Public Safety and Illegal Drugs nga idauluan ni Senador Panfilo Lacson, naibutaktak pay ti panangabusar dagiti dadduma  a polis ti Oplan Tokhang tapno kikilan wenno kuartaanda dagiti suspek. Imbulgar idi ni Lacson a saan nga isolated ti kaso ti Koreano ta adu dagiti naawatna nga impormasion kadagiti Filipino-Chinese a biktima iti “Tokhang For Ransom.”

Narurod idi ni Duterte kadagiti rinuker a polis ket impalgakna nga agrup 40 a porsiento dagiti kameng iti PNP ket kasapulan ti pannakadalusda. Kinontra ni Dela Rosa ti pattapatta ti Presidente a kaadu dagiti rinuker a polis. Patienna a dua a porsiento laeng iti kadagupan dagiti nasurok a 100,000 a puersa ti PNP dagiti police scalawags, ket immandarna ti pannakadalus  ti institusion.

Impasolo ni Duterte iti PDEA ti gerra kontra illegal a droga iti laksid ti kinabassit ti puersa dagiti operatibada, iti makabulan. Iti las-ud ti makabulan, naisardeng dagiti inaldaw a napappapatay kadagiti illegal drugs operations.

Immandar manen ni Duterte idi Marso 2017 ti panagsubli dagiti polis iti anti-illegal drugs operations ta saan a nagabenan ti PDEA ti pannakapasardeng ti panagraira ti illegal a droga. Impatalged idi ni Dela Rosa a nadalusanen ti PNP kadagiti rinuker a kameng, ken iti panagsublida iti kampania kontra iti illegal a droga ket ikagumaanda a saanen a nadara dagiti operasionda.

Nagbalin manen nga aktibo ti PNP iti nainget a kampania kontra illegal a droga. Idi Agosto 2017, napapatay ti menor de edad a ni Kian Loyd de los Santos kabayatan ti naisayangkat a police anti illegal-drugs operations sadiay Baesa, Caloocan City. Ni Delos Santos a senior high school student ket naammuan nga inosente kadagiti pammabasol kenkuana ken pinapatay dagiti nangarestar a polis nga awanan-gaway. Nagbalin a kontrobersial ti kasona nangruna idi adda pay dagiti dua a simmaruno a napapatay a menor de edad a maitudtudo a gapuanan dagiti polis.

Kalpasan ti pannakapapatay dagiti menor de edad, nagsuek ti survey popularity rating ni Duterte a gapu iti panangpasardengna manen iti PNP a makipaset iti anti-illegal drugs operations manipud idi Oktobre 2017. Naipasolo manen iti PDEA iti kampania iti illegal a droga iti liderato ti baro a Director General a ni Aaron Aquino. Iti las-ud dagiti sumagmamano a bulan, nakappia dagiti operasion ti PDEA ngem saan a nakatubeng tapno naballigi a maisayangkat ti misionda ta nakakompiskarda kadagiti big-time a drug lord ken billion ti balorna a droga. Ngem saan a mapnek ni Duterte iti gapuanan ti ahensia, ket minandarna manen ti PNP a makikaysa iti gerra kontra illegal a droga.

Napateg ti panagsubli dagiti polis iti anti-illegal drugs operations ta ti PNP iti addaan iti naan-anay a puersa tapno masolbar dagiti krimen agraman ti panagraira ti illegal a droga. Iti pannakanayon ti sueldo ken benepisio dagiti polis, rumbeng laeng nga aramidenda dagiti akemda a napudno tapno saan a masayang ti pondo ti gobierno a nagtaud iti buis dagiti umili.  Ngem nasken a naan-anay koma a madalusan ti PNP kadagiti rinuker a polis. Pasingkedan koma a nasayaat ti liderato ti PNP a saanen a maulit pay ti nakaro a pannakalabsing ti human rights dagiti suspek nangruna ti pannakakettel dagiti adu a biag. (Eden A. Alviar)

Comments are closed.