Footer

Kagawad a naglabsing iti RA 10591, naarestar

SINAIT, ILOCOS SUR – Naikustodia ti maysa a barangay kagawad gapu iti panaglabsing iti RA 10591 babaen ti naggiddan a panagsukisok dagiti nagtipon a pannakabagi ti linteg ditoy nga ili idi bigat ti Enero 29 daytoy a tawen.

Naggiddan nga insayangkat ti Joint personnel ti Sinait MPS, ISPIDMB, ISPIB ken RMFB1 PRO1 ti panagsukisok babaen ti Search Warrants Nos. 011 ken 012, series 2018 gapu iti panaglabsing iti RA 10591 (Comprehensive Firearms and Ammunition Regulation Act) nga inyisio ni Hon. Raphiel F. Alzate, Executive Judge ti RTC Branch 24, Cabugao, Ilocos Sur, iti pagtaengan /arubayan da Arnel Villa y Miranda, 41, awanan asawa, mannalon; ken iti arubayan/pagtaengan ni Barangay Kagawad Eddieson Villa y Miranda, 34, addaan asawa, agpada a residente iti Brgy. Cabarambanan, daytoy nga ili.

Negatibo ti resulta ti panagsukisok iti pagtaengan ni Arnel Villa y Miranda ngem positibo iti pagtaengan ni Brgy. Kagawad Eddieson Villa y Miranda gapu ta nakaala dagiti pannakabagi ti linteg kadagiti sumaganad: a.) one (1) unit M16 Armalite Rifle bearing serial No. 147474; b) one (1) piece short magazine for M16 rifle; c) twelve (12) ammunitions for 5.56mm.

Naaresto ni Kagawad Eddieson Villa ket naipan, agraman dagiti naala nga armas kenkuana, iti Sinait MPS para iti dokumentasion ken umiso a disposision.

Sinaksian ni Brgy. Capt. Dionisio Ibe ken dagiti dadduma pay nga opisiales ti barangay ti panagsukisok.

ITI sabali a report, positibo ti panagsukisok dagiti polis ti Sta. Cruz MPS, Sta. Cruz, Ilocos Sur iti panagtungpalda iti pammilin babaen ti Search Warrant No. 01 Series 2018 a napetsaan iti January 26, 2018 nga inyisio ni Hon. Judge Richard T. Domingo, 11th MCTC Sta. Cruz-Sta. Lucia, Sta. Cruz, Ilocos Sur iti arubayan/pagtaengan ti agnagan Arnold Haseron Rosal, 30, naasawaan, mannalon ken residente iti Lantag, Sta. Cruz, Ilocos Sur a nagresulta iti pannakasarak dagiti polis kadagiti sumaganad: one (1) unit homemade 12 gauge shotgun (pistol type), nagkarga iti one (1) live ammunition for 12 gauge shotgun; maysa pay a live ammunition for 12 gauge shotgun; ken one (1) live ammunition for M16.

Awan ti naiparang ni Arnold Haseron Rosal a dokumento dagiti armas a naala iti ikutna isu nga impan dagiti polis ni Rosal iti Sta. Lucia District Hospital, Sta. Lucia, Ilocos Sur para iti medical examination. Kalpasanna, impanda iti Sta. Cruz MPS karaman dagiti nakompiskar nga armas para iti dokumentasion ken umiso a disposision.

Naipila ti kaso a violation of R.A. No. 10591, iti babaen ti Criminal Case No. 4092-C kontra ken ni Arnold Haseron Rosal. (Tawid News Team)