Footer

SINURSURAN: Mangrugi Koma Iti Pagtaengan (Maudi a paset)

Ania, narigat kadi pay laeng ti mamakawan?

Kalkalpas laeng ti no mano a lawas a riribuk idiay Cairo (Egypt). Ngem ita, adtoy manen ti kinaawan talna wenno urnos idiay Yemen, Bahrain ken Libya. Kanigid-kanawan ti rally. Yik-ikkisda dagiti kayatda a mapasamak koma met kadakuada a nabayagen a maibaddebaddek ti kalinteganda.

No kumaro dagitoy a pagteng, mano manen a kadaraan ti mapagawid/agawid nga imaima? Mano manen no kua a boksit ti agkiraos? No adda panagkiraos, addada met ngarud dagiti di maikanatad a banag a pasamaken daytoy.

Ditoy pagiliantayo, adda met dita ti di malmalpas nga isyu dagiti kakabsattayo a Muslim, ti korupsion iti gobierno, dagiti babassit a korupsion, pannakaipatli dagiti biag gapu iti holdap, panagtakaw, panagkarnap, aborsion; pannakarabngis ti dayaw; pannakabugaw a kasla manok dagiti babassit a kakabsat iti nariingandan nga umok; pannakaagaw dagiti daga, ken adu pay.

Sumagmamano laeng dagitoy a pasamak a mangrubrubrob iti atong ti pannakawarawara ti pagiliantayo, pannakasilmut ti mitsa ti di panaglilinnasin dagiti agkakadaraan. Napateg ngarud a panunotentayo daytoy.

Saantayo a kunaen a ditayo karaman kadagitoy a pagteng. Amintayo, adda pasetna a rumbeng nga akmen. Iti bassit a pamuspusam, adda maaramidam. No maysaka nga ina wenno ama, apay a dimo itag-ay ti pamiliam? No maysaka nga indibidual, apay a dika mamakawan kadagiti nakabasol kenka?

Dimo pay kunaen nga awan maaramidan ta maysaka laeng a nanumo nga umili. Ti bassit no mapagtitipon, isu ti pangrugian ti dakkel a banag a mabalin a ditayo matukod a panunoten ti ipaayna a pagimbagan.

Napintas a pagpampanunotan daytoy nga estoria:

Adda agkabsat a di agkasunguan. Napangatoda a dua. Idi matay dagiti nagannak kadakuada, biningayda a dagus dagiti nabati a sanikua. Nupay kasta, di latta nagpatingga ti dida panagin-innuni.

Nagpaaramid ti inaudi iti nauneg ken atiddog a kali iti nagbaetan ti daga a nagtakderan ti balayda nga agkaka. Rasonna, tapno di kano a magmagna ti kabsatna iti solarda.

Ti met inaramid ti inaunaan, nangayab iti karpintero tapno mangipatakder daytoy iti alad iti nagbaetanda nga agkabsat tapno dinan makita pay daytoy no kasta nga agriing iti bigat.

Siguraduem a nasurok a pagattao ti alad tapno awan makatan-aw, kinunana pay iti karpintero, tapno diak pulos makita ti adda iti
bangir. Makaammokan ta adda papanak ket makabulan nga awanak. Itedkonto amin kenka a tangdanmo inton sumangpetak. Kumpleton dagiti aramatem a ginatangko.

Nagtungtung-ed laeng ti karpintero.

Impasnek ti karpintero ti nagtrabaho. Kayatna a maragsakan ti nagpatrabaho kenkuana.

Idi sumangpet ti inauna kadagiti agkabsat, nasdaaw ta awan met ti makitana nga alad iti nagbaetanda nga agkabsat. Makapungtot a nangpaayab iti karpintero.

‘Yan ti pinaaramidko kenka? inamadna itoy idi makasangpet ti karpintero. ‘Yan ti alad?

Di a nagun-uni ti karpintero.

Loklokuennak kadi? imbikagna manen.

Intunda ketdi ti karpintero iti asideg ti kali. Nasdaaw ta maysa ketdin a nagpintas a rangtay ti nakitana a nangdeppa iti nauneg a kali a pagay-ayusan itan ti danum.

Agpungtot koma ngem isu met a makitana ti kabsat-
na iti ungto ti rangtay. Naka-
isem daytoy kenkuana.

Dina napuotan, agin-
innarakupda gayamen nga agkabsat. Manipud idin, nasayaaten ti panaglangenda.

Napalaus a panagyamanda iti karpintero.

Ipakita daytoy nga estoria, nga uray kasano ti kinanumotayo (ti karpintero), adda maaramidtayo para iti kaadda ti kappia wenno talna iti aglawlaw.

Mabalin nga iti inaldaw-aldaw a panagbiag-tayo, makasagangtayo met kadagiti pagteng a makasapul iti tulongtayo nga uray pay kasano ti kinanumona, dakkel met ti maitedna a pagimbagan saan laeng nga iti aglawlawtayo no di pay ket iti sibubukel a lubong.

Ti laengen panangpasardeng kadagiti agaapa nga ubbing a maimatangantayo iti kalkalsada, dakkelen daytoy a banag a pangrugian ti kappia. Aglalo la ngaruden no ibinglay bassit ti panawen tapno malawlawagan ti panunot dagitoy iti dakes nga itden ti panagaapa.

Dagiti mapaspasamak a riribuk iti lubong, wen, dakkel ti maaramidatayo. Aggunaytayo ngaruden. Mangrugitayo iti bagbagitayo. Iti pagtaengantayo. Mamakawantayo; itan — saan nga inton bigat!

Comments are closed.