Footer

BANNER NEWS: Pannakaraem ti Human Rights, pinasingkedan ni Sec. Roque

VIGAN CITY – Iti laksid dagiti pasamak a pannakalabsing ti human rights iti nainget a kampania kontra illegal a droga ti gobierno, pinasingkedan ni Presidential Spokesman Harry Roque ken ni Arsobispo Marlo Peralta ti Arkidiosesis ti Nueva Segovia (Ilocos Sur) nga ikagumaanna nga allukoyen ni Presidente Rodrigo Duterte a maraem ti biag ken kalintegan dagiti tattao.

Naaramid ti pammasingked ni Sec. Roque kabayatan ti ibibisitana ken ni Abp. Peralta iti opisinana iti Palacio Arzobispado de Nueva Segovia, Vigan City idi Pebrero 2, 2018.

Impasingked ni Sec. Roque a kas human rights lawyer sakbay a nagbalin a kongresista ken Presidential Spokesman, ket adda pay laeng kenkuana ti ayat ken tarigagayna para ti pannakaraem ti kalintegan dagiti tattao nangruna ti pannnakarespeto ti biag. Inlawlawagna a kas human rights lawyer ket sigud a naasideg iti Simbaan ken adda dagiti kasingedna nga Obispo. Impatalgedna nga ikarigatanna nga allukoyen ti Presidente tapno saan a malabsing ti kalintegan dagiti tattao. Impasingkedna pay nga ikagumaanna ti makisaritanto ken ni Davao Archbishop Romulo Valles, Presidente ti Catholic Bishops’ Conference of the Philippines, tapno suminged ti panaglangen ti Simbaan ken ti agdama nga administrasion.

Natibker ti pagtaktakderan ti Simbaan Katolika iti Pilipinas a kontraenna ti panagraira ti illegal a droga gapu iti dakes nga epektona kadagiti tattao, ngem kalikagumanda ti umno a pannakaipakat ti linteg wenno due process of law, pannakaraem ti biag ken pannakarespeto ti human rights. Nainget a konkontraen ti Simbaan Katolika dagiti napaspasamak iti naglabas nga extra judicial killings wenno summary executions. Iti Arkidiosesis ti Nueva Segovia iti Ilocos Sur, naimontar kadagiti simbaan, kombento ken dadduma pay a lugar dagiti dadakkel atarpaulin a nakaisuratan dagiti mensahe a panangraem ti biag kas ti maika-lima a Bilin ti Dios a “Dika Mamapatay,” ken panangkontra ti Iglesia ti panagraira ti droga.

Bimmista ni Sec. Roque iti opisina ni Abp. Peralta kabayatan ti isasarungkarna iti Ilocos Sur kabayatan ti pannakarambak ti maika-200 nga anibersario ti probinsia. Indauluan ni Sec. Roque ti pannakalukat ti Ilocos Sur Bicentennial monument iti abay ti Govantes River iti asideg ti Quirino Stadium, Bantay. Nakikaysa pay iti dayta a pasken ni Gov. Ryan Singson ken dadduma pay nga opisial ti gobierno ken adu a bisita a nakipagrambak iti maika-200 nga anibersario ti probinsia.