Footer

Ilocos Sur Provincial Communication Officers Network, nayusuat

VIGAN CITY – Pannakapatalged ti nasamay ken nadaras a pannakaidanon ti impormasion manipud iti Office of the President ken dadduma pay nga ahensia ti National Government a dumanon kadagiti lokal a gobierno ken academia.

Dayta ti panggep ti pannakayusuat ti Ilocos Sur Provincial Communication Officers Network (PCO Net) sadiay Provincial Capitol, Vigan City idi Pebrero 2, 2018.

Indauluan ni Presidential Communication Operations Office Secretary Martin Andanar, dagiti undersecretaries ke director ti PCCO kabayatan ti launching ti PCO Net. Dinar-ayan met daytoy dagiti information officers dagiti nadumaduma nga ili, siudad ken ahensia ti nasional a gobierno iti Ilocos Sur. Dinar-ayan pay daytoy dagiti kameng ti local ken nasional media.

Iti press conference sakbay ti PCO Net, linawlawagan da Sec. Andanar, Undersecretary Lorraine Badoy ti isyu ti kontrobersial a fake news a pakainanaigan dagiti blogger nga opisial iti PCOO. Inlawlawag ni Andanar nga iti benneg dagiti lehitimo a media a rehistrado iti Security and Exchange Commission wenno Department of Trade and Industry, dagiti mairakurak a damag ket saan a maibilang a fake news ngem inaccurate news no adda dagiti biddut a paset ti damag.

Imbagasan met ni Badoy a ti fake news ket saan a factual wenno awan ti kinapudno a pagbatbatayanna. Inlawlawagna a namarisanen ti politika iti panangtimbang no ania ti pudno a damag wenno fake news ta agdepender dayta iti pakaibilangan ti mangam-amiris iti damag.

Nailawlawag pay iti presscon ti pakaseknan ti Charter Change, pannakabalbaliw ti sistema ti gobierno manipud Unitary System agingga iti Federal System. Nairakurak met a ti isyu ti saan a pannakatuloy ti eleksion no mapasamak ti Charter Change ket agdepender kadagiti kameng ti Kongreso – dagiti kongresista ken senador.

Nasaludsod no adda plano ti PCCO a mangbangon ti station ti Radio ng Pilipinas iti Ilocos Sur kas kadagiti kabangibang a probinsia, ken padur-asen ti operasion ti People’s Television (PTV Ilocos) tapno mapadur-as ti media network a mayataday iti panggep ti PCO Network.

Inrakurak ni Sec. Andanar a kayat ti PCOO a bangonan koma ti radio station dagiti amin nga 81 a probinsia iti Pilipinas ngem saanda a kabaelan gapu iti kurang a pondo. Impakaammona nga iti agdama ket awan pay ti panggepda a mangpabangon iti radio station iti Ilocos Sur, ngem iramandanto ti plano iti masakbayan.

Saanna met a naipalgak ti plano ti PCOO no padur-asenda ti operasion ti PTV Ilocos nga iti agdama ken manmaneharen ti Provincial Government.

, , ,

No comments yet.

Leave a Reply