Footer

Pagalagadan (Maikadua a paset)

Imbatad a dagus ni Sir Terry ti isyu. Naummongkami iti pathway iti sango ti gym a pakaangayan ti taripnong. Managsaggaysa pay laeng dagiti kaduami. Balabalaen latta ti isipko ti isungbatko iti komento ni Manang Rolita.

“Naiteks kaniak daytan,” inyisem laeng ni Sir Omar. Tallo pay a kalgaw sakbay a sumagpat a singkuentana. Isuna ‘tay dimo kaamak nga asitgan uray dimo pay am-ammo. Nabiag dagiti matana a kasda la salputen ti kararuam. Mannakigayyem. “Isu a sinabetkayo ta kiddawek a pagkalmaenyo ti riknayo…”

“Ngem sobradan, swirrr…” nagkukulot manen a timek ni Sir Terry. “Wasko keri!” Kastana latta uray agklasklase. Pagtamdak ketdi ta kabisadona dagiti yad-adalna a panagkulot, panagmanekiur ken foot and hand spa. Ngem ti pakasusungegak no kua, ta agabay ti kuartomi no TLE period, isu ti sangkaduldolna a panagsingir iti maigatgatangna nga usarenda iti klasena.

“Terry, adingko, bay-anyo ta iruarda amin nga an-anek-ekda. Saantayo nga agpailuyos iti pungtottayo. Datayo ti ad-adda a makaammo kadagiti pasamak. Be a professional always!”

“Yes, sir,” napadumog ni Sir Terry.

“Adda manen nagkomento, sir,” insalingbat ni Ma’am Lichel. “Mukhang pera daw po kayo!”

Nupay saan a siak ti direkta a nakaiturongan dayta, kasla napateltelannak. Nagkubuar ti unegko. Ngem lineplepak.

“Kunak met, bay-anyo ta iruarda amin a marikriknada,” nagtalinaed ti kinakalmado ti prinsipalmi. Saan man laeng a maanninawan ti panagpungtot iti rupana.

Ireklamo natin sila sa DepEd… kaipampanalbaag manen a komento. Talaga a pagrarangasandakamin. Nabalabalakon ti isungbatko. Ngem pampanunotek la ngamin ti kinuna ni sir.

“Ulitek,” ni manen Sir Omar, serioso ti panangkitana kadakami, “igalutyo ‘ta riknayo. Saanyo a sabten ti apuy iti barukongda. Bayantayo, kas nakunakon, nga iruarda amin a rikriknaenda. Ngem no bilang man ta kayatyonto ti sumungbat, agtalinaedkay’ koma a kalmado. Saan a pinupungtot…”

Tung-ed laeng ti naisungbatmi.

Nagturongkamin iti pagrehistroan ta agsasarutsoten dagiti padami a delegado. Idinto a nakapilakami, ti latta selponmi ta sangkakitami.

W8 lng ntin mpirmahan cliranz mga anak ntin bgo tau mgreklamo…

Napangilangilak lattan. Namrayak ti nangisulbong iti headset-ko ket pinatokarko ti Journey of Our Dreams a kanta dagiti ag-moving up inton umay a lawas.

Iti di latta pannakapulsot ti komento, saanen a nasarkedan ni Ma’am Ferdina ti nagkomento apaman a nakapagtugawkami. Adda ni Sir Omar kadagiti kaduana nga school heads iti lamisaan iti kanawan a sango ti stage.

Ginagawa po namin ang alam naming nakabubuti sa mga anak natin. Kung walang rules na susundin ang school, saan patutungo ang mga bata? Nakasasakit lang ng damdamin ang mga sinasabi ninyo. Money-maker… mukhang pera… Kung may concern sana kayo, handa naman kaming makinig sa mga ‘yan. ‘Wag na rito sa facebook… Nakakahiya lang tayong lahat…

“Allaka, ma’am,” inkalbit kenkuana ni Sir Lando.

“Ayna, sir,” immisugsog ni Ma’am Ferdina, “agsakit laeng ti barukongko no diak maipeksa ti riknak. ‘Bag koma no matulongandak no agsakitak.”

“Truth… sis!” inkawiwit manen a timek ni Sir Terry. “Didatwayo matulongan no agsakittayo!”

Ket kasla kayatko metten ti agkomento. Mangrugi manen nga agburek ti riknak.

Ksano, sir, bwal sa ‘min ang magputol ng kahoy. Maintindihan sana ninyo…

Nagsubli ni Sir Omar iti ‘yanmi. “Calm down, please…” impalagipna. Nabasana la ketdi ti komento ni Ma’am Ferdina.

“Sorry, sir,” kinuna ni Ma’am Ferdina. “Nalabes ngaminen ti panagsasaoda.”

“Maawatanka. Ngem kas nakunakon, awan ti ma-
ganabtayo no makisinnungbattayo kadakuada. Kitaenyo dita chat room-tayo.”

Inalistuak a kinita ti chat room-mi. Adda naiskrinsiat a post ni sir. In-PM-na gayam ‘tay nagkomento a money-maker ti pagadalan. Duapulo minuto payen ti limmabas ngem di pay simmungbat idinto nga ACTIVE NOW met ngarud.

Sinublianak ti post. Ne, ket awanen ti komento a money-maker. Naikkaten!

Gapu ta in-PM ni Sir Omar? Wenno nautobna a mabalin a makasoan aglalo no awan ti natibker nga ebidensiana? Wenno awan ti “balls-na” kas kuna dagitay katribu ni Sir Terry?

“Nakaul-ulimekka met, Sir Teody,” kinitanak ni Ma’am Zianne. “Ay-ayamem met lattan dayta selponmo.”

“Dika pay naruam kenkuana, aya, ma’am?” ni Ma’am Lhen ti simmungbat. “Adayo manen ti nagteng ti panunot ni sir ta balabalaenna la ketdi itan ti aramidenna a sarita.” Ammoda ngaminen nga agsursuratak iti Bannawag.

“Pagsikatwem man gayam idwa, swerrr!” inyaklili ni Sir Terry. “Addadwa la komwa sanguanak ta makitada!”

(ADDA TULOYNA)