Footer

SINURSURAN: Da Rina ken Kim… (Umuna a paset)

ITI panangpadalanko iti wall-ko iti Facebook iti dayta nga aldaw, limmabas ti post ti maysa nga ina a kailiak. Aw-awisenna dagiti kailianmi nga agbuya iti Good News, maysa a programa iti telebision nga imatonan ni Vicky Morales.

Sinurotko dagiti komento. Rummuar gayam ti balasang daytoy nga ina iti segment ti nasao a programa a kaduana ni Love Ańover.

Pinadaanak met ti nasao a programa a tunggal alas otso laeng iti rabii ti Lunes a mabuya. Malaksid a dayaw ti ilimi dayta, kayatko a maimatangan ti balasang daytoy nga ina. Madama daytoy nga agbasbasa iti Kamaynilaan, kas nadamdamagko, a paggiananda kalpasan ti nasaem a pagteng a nangisinay kadakuada iti patpatgenda nga adigi ti pamilia a nabayag a nagtaktakem a konsehal iti ilimi.

Ken am-ammok la unay ti ina, ken ti balasangna… ni Rina!

Kasla kaano la daydi panawen a nagtalek kaniak daytoy nga ina. Innalanak a tutor ti anakna idi adda pay laeng iti pampubliko a hayskul iti ilimi. Diak ninamnama daydi ta addaak iti pribado a pagadalan. Adayo a digo a madakamatak koma ta nagadu dagiti mannursuro iti Matematika iti pagadalan (a nagturposak met laeng iti hayskul) ni Rina. Kas met laeng idi in-tutor-ko ti maysa pay a balasangna.

Naklaatak laengen idi tinawagannak manen (naalana ti baro a numero ti selponko iti kabagiak nga am-ammona). Kayatna nga i-tutor-ko manen ti sabali pay a balasangna. Nagpakpakaasi ta saanna kayat a maudi daytoy iti klase. Aglalo ket kanayon nga awan iti pagadalanda gapu iti pannakisalsalipna iti kinnapintasan (nakoronaan a Binibining Cagayan ken nangibagi iti probinsia iti Regional Athletic Meet a nganngani manen nakasukdalanna iti kangrunaan a titulo).

Inawatko ti kiddawna ta kasapulak la unay ti nayon ti sangkabassit a masapsapulak iti pribado a pagadalan (a kadagidi a panawen, apagkapat laeng iti aw-awaten dagiti adda iti pampubliko a pagadalan). Numona ta dumakdakkel ti binangonko a pamilia.

Naragsakan. “Agyamanak, nakkong, a,” kinunana. “An-anusam la koman ‘ta adim nga isuro. Awanen ti ammok a pagsapulak iti mangisuro kenkuana. Sa maysa, inrekomendanaka ni manangna. Nagustuanna kano idi ti panang-tutor-mo kenkuana.”

Medio timmangar dagiti lapayagko idi. “Dagiti koma titserda iti pagadalanda, a, anti, uray ta adu met ti pagpiliam,” kinunak.

“Di kayat ‘ta adim, nakkong. Sa maysa, kayatko a limed laeng ti kaadda ti tutor-na. Diak kayat nga adu ti rumsua a saosao…”

Dita ti nangrugian ti panangisurok ken ni Rina tunggal malem a malpas ti klasena ken panaggapuk met iti pagadalan a yanko.

Immuna a nadlawak ken ni Rina, ti kinadayaw ken kinapakumbabana. Saan a maalumiim a makisango no pameriendaendak. Makigiddan. Kaduaennak agingga a malpasak.

Nalag-ananak met ta nalaka laeng nga isursuro. Apagbiit a maawatanna dagiti mayadal kenkuana. Saanakon a masdaaw ta immala kadagiti nagannak kadakuada.

Kalpasan daydi naudi nga aldaw a panang-tutor-ko ken ni Rina, saankon a nakitkita pay. Nadamagko laengen nga intuloyna ti kinahayskulna (senior high school) iti Kamaynilaan.

Ket iti pannakakitak kenkuana iti telebision, nagsubli dagiti lagip iti panunotko. Kasla kaano la dagidi panawen a panagtalekda nga agina kaniak.

Apaman a rimmuar iti telebision ni Rina, kalpasan ti sumagmamano nga aldaw, kimmontak ti inana. Sa simmaruno daytoy.

Limed a napayamanak ta iti las-ud ti naunday bassiten a panawen a dimi panagkikita, saanda latta a nakalipat.