Footer

BANNER NEWS: New Minimum Wage rate iti Region I, inyetnag ti DOLE

LAOAG CITY – Baro a Minimum Wage rate iti Region I nga agepekto manipud idi Enero 25, 2018 nga inaprobaran ti Department of Labor and Employment National Wages and Productivity Commission,  Regional Tripartite Wages and Productivity Board – I.

Daytoy ti nayetnag kabayatan ti naangay a taripnong dagiti pannakabagi ti DOLE, management and labor sectors sadiay Java Hotel, Laoag City idi bigat ti Pebrero 9, 2018.

Indauluan ni DOLE Region I Director ken RTWPB Chairman Nathaniel Lacambra dagiti opisial ti board ken pannakabagi ti management and labor sectors a nagatendar iti pasken a pormal a nakaiyetnagan ti Wage Order no RB 1- 19 ken ti Implementing Rules iti pannakaipakat ti pammilin.

Nanayonan ti daily minimum wage dagiti agtatatrabaho iti pribado a sector (non–agriculature) large industry (dagiti addaan iti asset a nasursurok ngem P100 Million ti balorna) iti P30.00. Manipud iti sigud a P280.00, napagbalinen a P310.00 ti daily minimum wage rate.

Nanayonan met iti daily minimum wage dagiti agtatrabaho iti medium industry (dagiti addaan iti asset a P15,000,001 – P100 Million ti balorna) iti P20.00. Manipud iti sigud a P265.00, agbalinen a P285.00 ti daily minimum wage rate.

Agpada met a P13.00 ti nainayon iti daily minimum wage rate iti small and micro industries. Manipud iti P252.00 a daily minimum wage iti small industry (dagiti addaan iti asset a P3,000,001 – P15 Million) ket napagbalinen a P265.00. Manipud iti P243 a daily minimum iti micro industry, napagbalinen a P256.00.

Para iti Agriculture sector – plantation and non – plantation ket nanayonan iti P13 daily minimum wage rate. Napagbalinen ti sigud a P252.00 daily minimum wage rate iti plantation sector a P265.00. Napagbalin metten ti sigud a P243.00 a daily minimum wage rate iti non – plantation sector a P256.00.

Naipakaammo met a dagiti reklamo iti saan a panangtungpal dagiti employer iti Wage Order ket maipilada iti DOLE Regional Office I iti Rooms 202 – 203 Juanita Commercial Building, Quezon Avenue, San Fernando City, La Union; Contact Number (072) 607 – 8914; Email Address – [email protected], tapno mapakatan iti mandatory thirty (30) days conciliation  and mediation process iti Single Entry Approach. Ngem no mapaay ti settlement, agbalin ti kaso a subject ti enforcement proceedings kas sagudayen ti Article 128 ti Labor Code as amended.

Exempted met iti Wage Order babaen ti panagaplikarda ken panangaprobar iti Board mayataday iti National Wages and Productivity Commission Guidelines Number 2, Series of 2007, dagiti sumaganad: Distressed establishments; New business establishments; Retail/Service establishments a saan a nasursurok ngem 10 dagiti trabahadorna; ken Establishments a naapektaran kadagiti kalamidad.

Naammuan pay a sino man a tao, korporasion, trust or firm, partnership, association wenno entity a saan nga agtungpal wenno mapaay a mangbayad iti nailatang a nayon a sueldo iti dayta a pammilin. Madusa ti aglabsing iti saan a nakurkurang ngem P25,000.00 ngem saan a nasursurok ngem P100,000.00 wenno pannakaibalud iti saan a nabibiit ngem dua (2) a tawen ngem saan a napapaut ngem uppat (4) a tawen wenno agpada a panagmulta ken pannakabalud iti pangngeddeng ti korte mayataday iti Section 12 ti Republic Act no. 6727, as amended  by R.A. 8188.

Inlawlawag met ti pannakabagi ti Bureau of Internal Revenue nga iti implementasion ita a tawen ti Tax Reform for Acceleration and Inclusion law ket saanen nga agbayad iti personal income tax dagiti agsusueldo iti P250,000.00 iti tinawen, ken dagiti minimum wage earner uray no ngumatonton dagiti sueldoda.

,

Comments are closed.