Footer

EDITORIAL: OFW Total Deployment Ban Sadiay Kuwait

PAGIMBAGAN ngata wenno pagdaksan dagiti umili ti addang ti gobierno ti naan-anay a panangipawil ti panagpatulod wenno total deployment ban dagiti Overseas Filipino Workers sadiay Kuwait?

Daytoy a saludsod ti mamagsisina manen iti kananakem ken karirikna dagiti Pilipino kalpasan nga immandar ni Presidente Rodrigo Duterte ken ni Department of Labor and Employment Secretary Silvestre Bello III ti total deployment ban dagiti OFW sadiay Kuwait. Pinirmaanen ni Sec. Bello ti Administrative Order No. 54 para ti deployment ban.

Inyetnag ni Duterte ti pammilin kalpasan dagiti nagsasaruno a pito a pannakaabusar wenno pannakamaltrato dagiti OFW kangrunaanna dagiti agpapaay a domestic helper wenno katulong. Narurod ni Duterte iti pannakamaltrato dagiti adu nga OFW nangruna iti pannakadiskobre ti bangkay ti Pilipina a maid a ni Joanna Daniella Demafelis, agtawen iti 29, a naikabil iti freezer ken na-
suroken a makatawen nga awan ti komunikasionna kadagiti kameng ti pamiliana sadiay Sara, Iloilo.

Naduktalan ti bangkay ni Demafelis kabayatan ti panagimbestigar dagiti Kuwaiti police iti nagpanawan nga apartment dagiti sigud nga employerna gapu kadagiti kaso a nakaidarumanda. Naduktalan iti autopsia a ni Demafelis ket addaan-marka iti tengnged a nabekkel a gapu ti nakatayanna.

Kagiddan ti total OFW deployment ban sadiay Kuwait, nairugin ti repatriation wenno panangiyawid ti gobierno ti Pilipinas kadagiti Pilipino a kayatnan ti agawid. Agarupen a 500 nga OFW dagiti nakaawid a nanggundaway ti repatriation program ti gobierno ken amnesty program iti Kuwait. Addan nasurok a 2,000 nga OFW sadiay Kuwait a nalpasen dagiti clearance-da nga agawid. Impalgak ti Department of Foreign Affairs, a dumanon iti 10,000 dagiti OFW ti iyawid a libre ti gobierno ti Pilipinas babaen kadagiti commercial airlines.

Immandar pay ni Duterte ti pannakaited ti P60,000 ti kada napagawid nga OFW manipud Kuwait kas pakauna a tulong ti go-
bierno kadakuada. Binilinnan ti Philippine Overseas Employment Administration ken Overseas Workers Welfare Administration a tulonganda dagiti OFW sadiay Kuwait ken dagiti nakaawiden iti Pilipinas.

Adu dagiti naragsakan iti pangeddeng ni Duterte a pannaka-ipawilen ti panagipatulod kadagiti OFW sadiay Kuwait tapno malapdan ti pannakamaltratoda kadagiti abusado nga employer-da. Nabayagen nga adu dagiti report maipapan ti pannakamaltrato dagiti katulong a Pilipina kadagiti abusado nga Arabo nga employer-da ngem kurang ti aksion ti gobierno nangruna dagiti agserserbi iti OWWA tapno masaluadan ti pagimbagan dagiti OFW. Kurang met aksion ti gobierno ti Kuwait tapno masaluadan ti pagimbagan dagiti OFW nangruna dagiti domestic helper iti laksid dagiti adu a report ti pannakamaltratoda.

Adu met dagiti malidayan ken masayangan iti bilin a naan-anay a pannakaipawilen ti panagipatulod kadagiti OFW sadiay Kuwait nangruna dagiti nasayaat ti kasasaadna wenno napintas ti pannakatratoda. Masayangan dagiti OFW nga agpapaay kadagiti trabaho ti propesional, teknikal ken dadduma pay a sector a nasayaat ti kasasaad ken sueldoda. Maladingitanda iti total deployment ban ta uray isuda ket saanen a mapalubosan nga agtrabaho sadiay Kuwait no saan a maibabawi ti total ban wenno maikkan ti exemption dagiti kas kadakuada.

Impalgak ni Bello a nakasaysayang ti gundaway dagiti OFW sadiay Kuwait a nasayaat ti kasasaadda nangruna dagiti nagawid iti Pilipinas a nagbakasion ngem saadan a makasubli gapu iti total ban. Impasingkedna nga irekomendana iti Presidente a maikkan ti exemption dagiti Balik-Maggagawa ken dagiti agpabaro ti kontratana.

Napintas ti gannuat ti Presidente para iti OFW deployment ban sadiay Kuwait tapno mailisi ti pannakamaltrato dagiti Pilipino. Mabalin nga adda nauneg a gapu ti Presidente tapno ibilinna dayta tapno maikkan ti gobierno ti bargaining power tapno ma-pressure ti Kuwait government a mangipakat kadagiti mekanismo tapno masaluadan ti pagimbagan dagiti OFW ta tumultulongda iti pannakapadur-as ti Kuwait ken ti ekonomiada. No mapagawid amin dagiti OFW sadiay Kuwait, dakes la ketdi ti epektona iti ekonomiada.

Adda dagiti mamati a saan a tumutop ti total deployment ban ta sakupenna amin nga OFW uray pay dagiti nasayaat ti kasasaadna. Dagiti nasayaat ti kasasaadna nga OFW sadiay Kuwait kaykayatda ti agtalinaed nga agtrabaho sadiay ngem ti agawid gapu iti dakdakkel a sueldo ken ad-adu nga opurtunidadda a mangpadur-as ti panagbiagda. Adu dagiti agamak a no agawidda iti Pilipinas ket awanton ti pagtrabahuanda a mangparigat ti kasasaadda ken ti pamiliada.

Tingitingen koma a nasayaat ti gobierno ti umno nga addangda iti daytoy a problema dagiti OFW sadiay Kuwait. Saan koma a nagresulta iti kasta no saan a nagbaybay-a iti responsibilidad dagiti opisial dagiti maseknan nga ahensia nga akinsakup kadagiti OFW.

No agawid dagiti amin nga OFW sadiay Kuwait iti Pilipinas, ania ti sangpetanda a trabaho iti pagilian? Agingga ita ket agkurkurang pay laeng dagiti trabaho ken pagsapulan iti pagilian a mabalin koma a serkan dagiti agawid nga OFW. No saanda a makastrek iti trabaho wenno saanda a produktibo, ania ti pagbanagan ti pamiliada?

Ti pannakamaltrato dagiti OFW ket saan laeng a mapaspasamak sadiay Kuwait, ngem uray pay kadagiti sabali a pagilian a pagserserbian dagiti Pilipino. Adda dagiti dakes nga employer a ganggannaet, kas met laeng dagiti kadaraan nga employer iti Pilipinas. Saan kadi a nagadun dagiti naipadpadamag a panangmaltrato dagiti amo a Pilipino wenno gannggannaet kadagiti trabahador wenno katulongda ditoy Pilipinas?

Nagkas-ang a panunoten a mabaybay-an ti gobierno dagiti OFW a maibilbilang a bannuar iti moderno a panawen gapu kadagiti adu a sakripisioda para kadagiti pamilia ken ti pagilianda, ken dagiti ipawpaw-itda a doliar ket isu ti mangpatpatapaw ti malmalmes nga ekonomia ti Pilipinas.

No kayat ti gobierno a masaluadan ti pannakamaltrato dagiti OFW idiay ballasiw-taaw, nasayaat a padur-asenda nga umuna ti ekonomia iti Pilipinas, tapno inton umadun dagiti trabaho ken pagsapulan iti pagilian ket awanton ti Pilipino a mapilitan a mangpanaw ti pamiliana tapno mapan makigasanggasat nga agtrabaho iti ganggannaet a pagilian.

,

Comments are closed.