Footer

SINURSURAN: Da Rina ken Kim… (Maudi a paset)

ENERO itoy a tawen, maysa pay a pagpampannakkel ti ilimi ti rimmuar/nabuya iti telebision— ni Kim.  Pinagrukbabna dagiti uppat a hurado ti Pilipinas Got Talent wenno PGT idi agkanta a kinompaniaranna iti arpa (harp).

Kadagitoy a panawen, mapukpukawan ti arpa… manmanon dagiti agus-usar kadaytoy. Ngem adtoy ni Kim, agtawen iti 26, a nangipakitaanna iti siribna nga agtokar iti nasao nga instrumento.

Saan laeng a pinatung-ed ni Kim dagiti uppat a hurado. Kinulding, kinalbitna ti rikna ti tunggal maysa a nakabuya kenkuana. Adda daytay rikna a naabbukay iti pagteng iti biagna ken no kasano nga insakad dagiti dua nga apongna a baket (nasapa a naulila iti ama).

Ngem saan ketdi a makuna nga asi laeng dagiti hurado kenkuana a pannakapatung-edna kadagitoy. Ta pudno man met nga adda siribna nga agpatokar iti arpa. Nagtsampionen iti sabali a pagilian a nakisalipanna.

Ita, awan sabali a dawat dagiti kailianna no di ti pannakaalana manen iti YES dagiti hurado iti sumaruno a rikus ti salip.

Nagsubli la ket ngarud manen kaniak ti napalabas. Baroak pay idi, addaak iti immuna a pribado a pagadalan a nagisuruak ditoy ilimi. Adda nangkontak kaniak nga adda mayat nga agpa-tutor. Estudiante kano iti pampubliko a hayskul (a nagbasaan met laeng ni Rina).

Bassit-usit laeng ti katukad ti agmalem a pannakaadipen ti tisa kadagidi a panawen. Isu a diak nagpangadua a nangawat iti diaya.

Dita a nangrugi ti panang-tutor-ko ken ni Kim. Naulimek ken managbabain, dayta ti immuna a nadlawko kenkuana. Iti likudan ti rimat dagiti matana no kasta a madama ti session-mi iti balay da apongna a baket (ti kaduana iti telebision), agan-anninaw ti liday a sagsagabaenna (ti nasapa a pannakaulilana iti ama gapu ti aramid ti tao).

Nupay kasta, saan a nagbalin a tubeng kenkuana dayta. No adda saanna a maawatan iti maisursuro kenkuana, saan nga agpangadua a mangsaludsod. Kasla daytay sakiten ti nakemna a lumabas ti gundaway nga awan ti maadalna.

Itoy, saan a naiturong ti isipko kadagiti agdama nga ubbing nga aglablabas iti dakulap kas adipen ti tisa. Kasla aleng-aleng iti kaaduan kadakuada ti panagbasada. Iti panangad-adalko iti agdama a situasion, dagitoy ti naammuak:

Nakapsut ti pundasion ti edukasion kadakuada. Umaydan iti hayskul ngem saanda pay gayam a makabasa. Kasanon daydi pagalagadan a nagdalanan idi agbasbasaak pay? Pulos a di maawat iti sumaruno nga agpang (Grade) ti di makabasa. Kadagidi a panawen, amin nga agturpos iti elementaria, ammonan a lasinen ken basaen dagiti naisurat. Kakaasikami ngarud ita iti hayskul a mangyallatiw iti adal kadagitoy nga ubbing.

Napanuynoyanda kadagiti nagannakda. Agpapan kadagitoy, adu latta a nagannak ti mangal-ala kadagiti annakda uray agdadata payen a biddut/basol ti anakda. Isuda pay ti adda ganasna a makaunget no mapaayabanda iti pagadalan tapno maipakaammo kadakuada dagiti maikaniwas nga inaramid ti anakda. Sayang la kano ti aldawda nga agsapul koma. Isu kano nga imbaonda dagiti annakda tapno isuromi ida.

Dakkel ti pakainaigan ti mass promotion a pammilin kadakami iti di panangikaskaso dagiti ubbing nga agbasa. Makapasakaminto latta, dayta ti nagdakes a pagsamsammakedanda. Ti napateg kano, adddada iti uneg ti pagadalan. A kaaduanna, agpapaanawa, cutting classes, ken buong ti ulo ti ar-aramidenda. Saan met a mabalin a pagsawan ida iti dakes, wenno madissuan koma no aglablabesdan ta adda manen dayta Child Protection Policy.

Isu a kasta la unayen ti panagtep-teppel kadagiti ubbing a sobra ti kinabastosda!

Isu a mabalin a husto ti ibagbaga dagiti nataengan a naimbag pay idi panawenda ta natudio dagiti ubbing. Malaada iti maysa a sao. Saanda nga ammo ti sumeppeg kadagiti mannursuroda. Ta mabutengda a mapaayaban dagiti nagannakda!

A mabalin a nagsingsingpetanda iti husto ta dinto alaen ida dagiti nagannakda!

Ngem ita? Mapangpangilangilak latta no kuan. Kinayatmo ti nagmaestro, anusam, a, guapo, pangpalpalag-an iti rikna no dadduma.

Ket iti pannakakitak manen kada Rina ken Kim kalpasan ti manon a tawen a panangiyallatiw iti sangkamaregmeg nga ammo kadakuada, mapatpatibker ti rikna tapno itultuloy latta ti mangtarabay kadagiti ubbing a maitaltalek kadakami iti tinawen.

Paset ti sinapataan nga akem a dinto matallikudan!

No adda agbalin nga uray maysa iti masanguanan, umanayen dayta a ragsak. Saan a magatadan a ragsak!