Footer

BANNER NEWS: Bilin ti Police Regional Director: Solbaren dagiti panagubor iti lugan; ikkaten dagiti traffic obstruction

BANTAY, ILOCOS SUR – Solbaren iti las-ud ti 24 oras dagiti kaso ti panagubor kadagiti lugan kadagiti masakupan nga ili wenno siudad ta no saan ket marelibuan iti posision; ken ikkaten dagiti makasali kadagiti kalsada ta isuda ti maysa a gapu dagiti adu nga aksidente iti highway.

Dayta ti nainget a mandar ken ballaag ni Supt. Romulo Sapitula, Regional Director kadagiti Chief of Police dagiti municipal ken city police stations iti Ilocos Sur kabayatan ti ibibisitana iti IS Police Provincial Office, Camp President Elpidio Quirino, Bulag, Bantay idi Pebrero 20, 2018.

Nagballaag ti Police Regional Director gapu kadagiti nagsasaruno a saan a nasolbar a kaso ti panagubor dagiti lugan nga agdaldaliasat iti National Highway iti Ilocos Sur itoy a bulan ken kadagiti naglabas. Kaudianna ket ti pannakaubor sadiay National Highway iti maysa a GMW bus nga agturong iti Baguio City idi rabii ti Pebrero 8, 2018 a nakasugatan ken nakabulseken ti drayber gapu ta limsut ti bato iti sarming ti lugan ket naipunta iti matana. Nasukatanen ti chief of police ti Cabugao ket nadutokan ti deputy chief of police kas officer-in-charge.

Immandar pay ti Regional Director ti panangdalus dagiti polis kadagiti amin a traffic obstruction kadagiti kalsada nangruna iti national highways tapno saanda a makalapped iti naannayas a trapiko. Impaganetgetna a maysa a gapu dagiti adu a mapaspasamak nga aksidente ket dagiti traffic obstruction nangruna kadagiti adu a nabayag a nakaparking a lugan iti kalsada.

Inyetnag ni Sapituala ti direktibana ken ni Sr. Supt. Jovencio Badua, Provincial Director ti Ilocos Sur Police Provincial Office ken kadagiti amin a chief of police.  Impakaammona pay ti agtultuloy a nainget a kampania ti PNP kontra iti amin a krimen nangruna ti panangrisut kadagiti kaso ti pammapatay, illegal a droga ken loose firearms.

Bimmisita ni Sapitula iti ISPPO a nangsaksi iti turn-over ceremony dagiti nasurok a 1,000 a paltog a nagduduma ti kalibrena a naisuko wenno naipadulin manipud kadagiti police stations. Kaaduan dagitoy a paltog ket nagpason dagiti lisensiada ket naisuko kabayatan ti Oplan Katok ti PNP para iti natalged a pannakaidulinda kadagiti police stations agingga a mapabaro dagiti lisensiada tapno maisublinto met laeng kadagiti akinkukua.  Naidulin dagiti paltog iti armory ti ISPPO tapno nataltalgedda ken malapdan dagiti alegasion ti pannakasukat dagiti piesa ken tapno malapdan ti posible a panaggandat dagiti lawless elements a mangraut kadagiti estasion tapno alaenda dagiti nakadulin nga armas.