Footer

Nayon a benepisio kadagiti regular a miembro ti GSIS ken SSS, nairakurak iti ECC Seminar

CANDON CITY – PANNAKAIPAAY kadagiti adu a nayon a benepisio kadagiti agtatrabaho iti gobierno ken pribado a sektor kalaksidan dagiti ipapaay ti Government Service Insurance System wenno Social Security System.

Daytoy ti nairakurak kabayatan ti naangay nga Employees’ Compensation Program advocacy seminar nga insayangkat ti Department of Labor and Employment – Employees’ Compensation Commission. Naangay ti seminar sadiay Aloha Nui Hotel, itoy a siudad idi Pebrero 22, 2018.

Nailawlawag iti seminar a ti ECC kas ahensia iti salinong ti DOLE ket nabukel tapno mangiwayat ken itdenna iti nagbaetan dagiti employee ken employer ti kultura ti kinatalged ken nasalun-at nga aglawlaw iti lugar a pagtrabahuan; tapno pakaammuanna dagiti trabahador kadagiti kalintegan, benepisio ken pribelehioda nga ipaay ti ECC; ken saluadanna ti integridad ti State Insurance Fund a pagtaudan ti pondo a maipaay a benepisio kadagiti miembro ti GSIS wenno SSS.

Nailawlawag a ti Employees’ Compensation Program ket programa ti gobierno a mangipaay iti compensation package dagiti agserserbi iti gobierno ken pribado a sektor agraman dagiti dependents-da no agsakit, masugatan wenno matayda mainaig iti panagtrabahoda ket karbenganda ti umawat kadagiti benepisio ken serbisio. Mairaman iti programa dagiti compulsory members ti SSS (malaksid kadagiti self-employed); overseas seafarers; dagiti agpapaay iti gobierno a rehistrado a miembro ti GSIS pakairamanan dagiti nabotosan nga opisial nga umaw-awat ti regular a sueldo, ken dagiti unipormado a miembro ti Armed Forces of the Philippines, Philippine National Police, Bureau of Fire Protection and the Bureau of Jail Management and Penology.

Naibinsabinsa a nailaw-
lawag dagiti kaso a sungsungbatan ti ECC: dagiti nagduduma a klase iti sakit a naala kabayatan ti panagtrabaho, dagiti pannakasugat wenno pannakaasikdente kabayatan iti trabaho wenno iti dalan a mapan agtrabaho wenno agawid kalpasan ti panagtrabaho, ken ipapatay nga adda pannakainaigna iti trabaho.

Nailawlawag nga iti ECP, ti agsakit, masugatan wenno matay a regular a miembro ti GSIS wenno SSS ket mabalinna a makagun-od ti Loss of Income Benefit, Temporary Total Disability Sickness Benefit, Permanent Total Disability ken Permanent Partial Disability; Carer’s Allowance (supplemental pension); Medical Benefits; Death and Funeral Benefit; ken Rehabilitation Services. Naipakaammo a dagiti claim for compensation ket maipila iti opisina ti GSIS wenno SSS iti las-ud ti tallo a tawen manipud idi napasamak ti panagsakit, pannakasugat wenno ipapatay.

Nagpaay a resource speaker iti seminar dagiti opisial ti ECC a da Atty. Jonathan Villasoto, Deputy Executive Director; Ma. Cecilia Maulion, Chief of Information and Public Assistance Division; Dr. Melba Sacro, Chief of Work Contigency Prevention and Rehabilitation Division; ken Alicia Borres, IPAD Information Officer.

Para iti ad-adu nga impormasion, mainaig iti ECP ken ECC, mabalin ti agdamag iti ECC Region I Office, Room 503 Juanita Commercial Building, Quezon Avenue, San Fernando, La Union. Mabalin ti umawag iti Tel. No. (072) 607 – 0045, wenno ag-email iti [email protected] Mabalin pay nga i-like wenno i-follow ti Facebook account ti ECC para kadagiti kabaruanan nga nga impormasion.