Footer

Pannakadadael dagiti luxury vehicles iti Bureau of Customs

NAISAYANGKAT ti pannakadadael dagiti nangina a lugan wenno luxury vehicles a sinamsam ti Bureau of Customs kabayatan ti maika-116 nga anibersario ti ahensia idi Pebrero 6, 2018.

Sinaksian ni Presidente Rodrigo Duterte ti pannakapitpit babaen ti bulldozer kadagiti segunda mano a 20 a luxury vehicles nga aggatad iti nasurok a P61 Million sadiay BOC ground, Manila. Naigiddan met ti pannakapitpit dagiti 10 pay a nangingina a lugan kadagiti puerto ti BOC sadiay Cebu ken Davao.

Mairaman kadagiti napitpit a nausaren a nangina a lugan ket dagiti Lexus ES300, BMW Alpina, Honda Odyssey, Mitsubishi Pajeros, Mazda Roadster, Mitsubishi MMC, Toyota SW Towage Noah, Corvette Stingray, Mercedez Benz S550, Ford Explorer, Nissan 350Z, BMW 745, Hyundai Equus JS350, Audi A6 Quattro, BMW Z4 Sports Car, Jaguar Type S, Jeep Wrangler, Audi S5, Mercedes Benz CLK350.

Immandar ni Duterte ti pannakadadael dagiti nangina a lugan a sinamsam ti BOC kas paset ti kampania ti agdama nga administrasion kontra smuggling. Imbilin ti Presidente ti pannakapitpit dagiti luxury vehicles, imbes a naisubastada kas kadawyan a maisaysayangkat iti naglabas, tapno maupay dagiti smuggler nga agiserrekton kadagiti luxury vehicles. Nagbalinen a modus operadi dagiti smuggler ti agiserrek kadagiti puerto iti Pilipinas kadagiti “undervalued” a lugan a no saanda a masaka ken mairuar iti BOC ket mailakodanto iti public aunction. Kaaduanna a dagiti met laeng smuggler ti mangab-abak kadagiti pannakaisubasta dagiti nangina a lugan.

Dagiti napitpit a lugan ket paset laeng dagiti adu pay a nayismagel a luxury vehicles a naiserrek iti BOC a nababa ti naideklarar a gatadna tapno mabayadanda laeng iti nababa a buis ken taripa iti pannakaiserrekda iti Pilipinas.   Saan a nairaman kadagiti nadadael a lugan dagiti nangina ken nalatak nga sport car a Lamborghinis ken Ferraris ta saan kano pay a naproseso dagiti dokumentoda ken madama pay laeng ti pannakarepaso dagiti kasoda.

Impalgak ni Duterte a dagiti napitpit a nangina a lugan ket maited kadagiti napanglaw nga aglanlandok tapno mabenepisiaranda ken mailakoda iti por kilo kadagiti junk shop.  Nasayaat ti panggep ti Presidente iti pannakapitpit dagiti nangina a lugan tapno upayenna dagiti smuggler. Imbes a napitpitda, saan ngata koma a nasaysayaat a dagiti nadadael a lugan ket naidonar laengen kadagiti agkasapulan nga ahensia ti gobierno nangruna dagiti mabalin pay a matarimaan ken praktikal nga usaren? Nagadu dagiti ahensia nga agkasapulan kadagiti lugan nga aggatgatangda pay kadagiti segunda mano a lugan tapno adda laeng nalaklaka nga usarenda.

Nairakurak nga adda dagiti nadadael a lugan a daanen ti modelona ken mabalin a saanen a praktikal ti pannakatarimaanda. Pumudnonto ngata a dagiti dadduma pay a nakompiskar a nangingina a lugan ket mapitpitdanto? Padaanan no saan nga agpatingga laeng ti rugi ti mandar ti Presidente ta adu pay a nangingina a lugan dagiti nakompiskar ti BOC.

Mabalin koma a pamastrekan ti pondo ken pakairanudan ti gobierno no naisubasta iti publiko dagiti nadadael a lugan. Adu a wagas ti pananglaban ti smuggling iti BOC a saan laeng a ti pannakadadael dagiti nangina a lugan wenno amin nga alikamen a maiserrek kadagiti Puerto. Nasken ti pannakaikkat ken pannakadusa dagiti rinuker nga agserserbi iti BOC a makikumkumplot kadagiti smuggler tapno mapasardeng dagiti illegal nga aramid iti ahensia.

Nabayagen dagiti mapaspasamak a technical smuggling iti BOC a gapu ti pakaaw-awagan ti ahensia nga umok ti kurapsion iti naglabas gapu kadagiti alegasion a pakapaspasamakan iti nakaro a panagpasuksok babaen ti tara tapno maiserrek dagiti imported a produkto agraman dagiti illegal a kontrabando.

Manipud itay 2017 agingga ita, saan pay a nalawlawagan ti kontrobersial ti P6.4 Billion ti balorna a shabu a naiserrek iti BOC Port iti Manila manipud China, ken nasamsam iti bodega sadiay Valenzuela City idi Mayo 28, 2017.

Dayta nga insidente ti puon ti panagikkat a Commissioner ni Nicanor Faeldon ken dagiti kakaduana nga opisial iti BOC ta saan a naiserrek ti kontrabando no saanda a nakikumplot kadagiti drug trader. Simmukat a BOC Commissioner ni Isidro Lapeña sigud a Director General ti Philippine Drug Enforcement Agency.

Ngem agingga ita iti laksid ti imbestigasion ti Senate Blue Ribbon Committee, awan pay ti nakasuan a sigud nga opisial wenno agserserbi iti BOC a nainaig iti pannakaiserrek ti P6.4 Billion ti pategna nga illegal a droga.

Napintas a pabuya ti pannakadadael dagiti naismagel a nangina a lugan iti BOC. Ngem napinpintas pay koma no adda met dagiti makasuan ken madusa a maduktalan nga agserserbi iti BOC a makikumkumplot iti pannakaiserrek dagiti illegal a produkto ken kontrabando.