Footer

Pannakaisanud ti Brgy ken SK Elections, kontraen ti PPCRV

VIGAN CITY –  KONTRAEN ti Parish Pastoral Council for Responsible Voting (PPCRV) ti kalikagum dagiti dadduma a kongresista para iti maikatlo nga agsasaruno a daras a pannakaisanud ti masungad nga eleksion iti barangay ken Sangguniang Kabataan inton Mayo 14, 2018.

Inrakurak ni PPCRV National Chairman Rene Sarmiento a ti pannakaitantan manen ti eleksion a naangay koma idi 2016, ket awanan iti rason ken rabsutenna ti kalintegan dagiti umili nga agpili kadagiti mangidaulo kadakuada kadagiti bukodda a barangay ken kadagiti agtutubo. Impakaammona a ti pannakaisanud a kanayon ti eleksion ket kasla nagbalinen a kadawyan kadagiti nangato nga opisial ti pagilian ket makadakes daytoy iti demokrasia iti Pilipinas.

Kinuna ti mangidaulo ti PPCRV a citizens poll watchdog ti Iglesia Katolika a masurot koma ti linteg ken maangay ti eleksion kas normal a proseso tapno maikkan ti gundaway dagiti umili nga agpili kadagiti mangidauloda kadakuada tapno masukatan dagiti opisial nga awan ti maar-aramidanna kadagiti nasaysayaat nga agserbi iti barangay ken kadagiti agtutubo.

Ti reaksion ni Sarmiento ket sungbat iti gakat dagiti lider ti the House of Representatives a kayatda manen a maisanud ti May 14 elections kabayatan ti gannuat ti gobierno para iti pannakaamendar ti 1987 Constitution. Impalgak ni House Justice Committee Chairman Rey Umali a ti plebisito para ti baro a Konstitusion ket nasaysayaat no maigiddanto iti eleksion iti barangay ken SK.

Immuna a naisanud ti Barangay and SK Elections idi Nobiembre 2016 ken 2017, kabayatan ti nainget a kampania ti gobierno kontra illegal a droga tapno maliklikan ti panangabak dagiti
narco-politicians ta mapagam-amkam a mausar iti eleksion ti kuarta manipud iti illegal drug trade.

Ti PPCRV ket accredited a citizens’ poll watchdog ti Commission on Elections a nabayagen nga aktibo a makipaspaset para iti Clean, Honest, Accurate, Meaningful and Peaceful elections iti Pilipinas. Addaan ti PPCRV kadagiti election volunteers iti amin a parokia, ili, siudad ken probinsia nga agserserbi kabayatan ti eleksion.

Iti Ilocos Sur, aktibo ti Social Action Commission ti Arkidiosesis ti Nueva Segovia a mangbukbukel ti PPCRV iti amin a parokia tapno makapagserbida iti eleksion kagiti nagduduma a barangay,
ili ken siudad.

Comments are closed.