Footer

SINURSURAN: Guardia laeng, dimo koma kuna!

“ADDA koma guardia ti pagadalan!” Suhestion idi dagiti nagannak idi nabiitak pay ditoy pangad-adipennan kaniak ti tisa iti agdama.

Nadanonak ngamin ti pagadalan nga awan ti guardiana. Makaammo dagiti lider-estudiante nga agbantay iti ruangan no kasta a panagseserrek iti agsapa ken sakbay ti panagaawid iti malem. Ta masapul a sumrekda kadagiti klaseda.

Rimmuar daytoy nga isyu idi maimiting kadagiti nagannak nga addada ubbing nga agliblibas. Ipasimpleda ti mapan iti ruangan sa sumiagdanton no awan ti makakita kadakuada. Wenno magnada iti likud sa manglikusda iti baybay iti amianan.

Sa pay adda report a napukaw a ramit ti pagadalan!

Napagnumuan ngarud ti pagadalan ken dagiti nagannak a pagbibingayan dagiti ubbing ti suelduen iti binulan ti alaenmi a guardia. Maipabaklay kadakuada ta saan a kabaelan ti pagadalan gapu iti kinabassit-usit ti MOOE wenno Maintenance and Other Operating Expenses daytoy iti binulan. Nasurok la a sangapulo ribu a pisos!

Ania ngamin, aya, ti akem ti guardia kadagiti pagadalan? Maitutop kadi a talaga ti kaaddada?

Kadagiti pagadalan iti agdama, aglalo iti kolehio, addaanen dagitoy iti guardia wenno bantay a mangkita iti taray ti linak ken kappia wenno seguridad dagiti ubbing. Kasta met iti haiskul, aglalo iti Kamaynilaan wenno kadagiti dadakkel a pagadalan. Ngem kadagiti probinsia, addada pay laeng dagiti eskuela a dagiti estudianteda  ti pannakaguardiada—dagiti lider-estudiante. No apay a kasta, umuna ditan a rason ti kaawan pondo a paggapuan ti maisueldo iti/kadagiti maala a guardia.

Iti met ngay elementaria?

Kas iti haiskul, dagiti met laeng dadakkel wenno pribado a pagadalan ti makabael a mangala iti bukodda a guardia a sueldoanda.  Ngem dina kayat a sawen daytoy a di kabaelan dagiti mannursuro ti mangsaluad kadagiti naitalek kadakuada nga ubbing. Paset latta daytoy iti di mabubos ken di magatadan nga akemda a kas mannursuro. Ta saan laeng a ti pannakayallatiw ti sirib ti akemda a kas mannursuro.

Ngem iti panaglabas ti panawen, pagaammotayo a nagbalbaliwen ti aglawlaw. Akuentayo man wenno saan, saanen a kas idi ti urnos wenno kinaulimek ti gimong a paggargarawantayo. Agsasamusam a krimen ti mapaspasamak iti inaldaw. Ket saan a mailaksid ditoy ti pagadalan a pakapaspasamakanda. Saanen a masigurado ti seguridad a kas kunada.

Nasayaat ngarud nga adda katulongan da ma’am ken sir a mangkita iti pagsayaatan dagiti ubbing a naitalek kadakuada. Ta iti kaadu ti obligasion wenno trabahoda iti inaldaw, maisaksakripisio no dadduma ti seguridad dagiti ubbing. Ditoyen a sumrek ti kinapateg ti guardia kadagiti pagadalan.

Ngem nakas-ang a panunoten nga adu nga elementaria ti awanan iti guardia. Nawaya ti asino man a sumrek ken rummuar iti solar ti eskuela. Namak payen no adda managdakdakes  a mangkidnap kadagiti ubbing? Adda ngata pay nababaelan da ma’am ken sir? Wenno ni prinsipal?

Ti rason, kas nasaon, nga awan guardia dagitoy a pagadalan ket gapu iti kinakisang ti pondo. Ibuntok payen ditoy ti panangipapan dagiti mannursuro a kabaelanda kano a kitaen wenno aywanan dagiti ubbingda. Ket dida kabaelan ti tulong ti asino man. Ta iti panagkitada, dakkel a pakaibabaan ti dayawda no maaddaanda iti gurdia ta kasla ketdin agparparang a dida maaywanan dagiti ubbingda. Nga ipaspasada ti akemda.

Ngem kas nadakamaten, saan nga iti amin a gundaway ket makita/maaywanan dagiti mannursuro dagiti ubbing.  Saan a mailibak a kadagiti kallabes, addada dagiti damag a napaltogan dagiti ubbing iti pagadalanda gapu iti panaghuramentado dagiti basta lattan simrek iti ikub ti eskuela. Wenno addada ubbing nga innala ti sindikato iti mismo nga uneg ti pagadalan. Ken ti panagraraira ti bisio iti uneg. Kinapudno itan nga uray iti elementaria, addadan dagiti ubbing nga agbisbisio.

Comments are closed.