Footer

Agbilag ti irik, mais ken dadduma pay a produkto iti talon iti igid ti Nat’l Highway, agmulta wenno mabalud

BANTAY, ILOCOS SUR – Agmulta wenno mabalud dagiti matiliwan nga agbilag iti irik, mais ken dadduma pay a produkto ti talon iti igid ti National Highway.

Dayta ti impakdaar ni Chief Superintendent Romulo Sapitula, Regional Director ti Regional Police Office I kadagiti kameng ti Philippine National Police ken iti media kabayatan ti ibibisitana iti Ilocos Sur Police Provincial Office iti Camp President Elpidio Quirino, Bulag, Bantay, ilocos Sur.

Inlawlawag ti Police Regional Director a maysa a kangrunaan a gapu dagiti adu a mapapasamak nga aksidente iti National Highway iti Ilocos Sur ket gapu kadagiti nakalapped iti naannayas a trapiko kadagiti igid ti kalsada. Immandarna kadagiti chief of police kadagiti amin nga ili ken siudad iti Ilocos Sur nga idauluan ni Senior Superintendent Jovencio Badua, Provincial Director, nga ipakatda ti linteg, dalusan ken paritanda dagiti agikabkabil iti kadagiti makatubeng iti trapiko iti igid ti kalsada. Inawisna met ti publiko nga ipulongda kadagiti estasion dagiti polis dagiti makitada nga agibilag kadagiti irik, mais ken dadduma pay a produkto iti talon ken agikabkabil kadagiti dadduma pay a traffic obstructions iti igid ti National Highway tapno maaksionan ti PNP.

Sagudayen ti Department Order No. 41 Series of 2013 ti Department of Public Works and Highways: Banning of drying of palay and other farm produce along national highway, madusa dagiti matiliw nga aglabsing babaen ti panagmulta   iti saan a nasursurok ngem sangaribu a pisos wenno mabalud iti saan a napapaut ngem innem a bulan.

Inyetnag ti Police Regional Director ti bilinna gapu iti paliiwna a kaadu dagiti maibilbilag a produkto iti igid ti national higway kadagiti masakupanna a probinsia iti Region I a puon ti pannakalapped ti naannayas a taray ti trapiko ken aksidente iti lugan.

Nabayagen nga irekreklamo dagiti motorista dagiti agbilbilag kadagiti igid ti national highway nangruna dagiti traders wenno komersiante ken mannalon a no panawen ti panagaapit ti irik ken mais ket pagbilaganda dagiti atiddog ken agsumbangir nga abaga ti National Highway. Agrekreklamo dagiti motorista nga uray no napalawan dagiti National Highway gapu iti agtultuloy a road-widening projects ti DPWH, ngem kasla awan met laeng mamaayna ta saan met a mapasardeng ti panagbilag dagiti nasukir nga umili nangruna dagiti adda impluensiana.

Nabayagen a mairep-report dagiti panagbilag iti produkto ti talon kadagiti opisina ti District Engineering  ti DPWH iti Ilocos Sur, ken palpalagipan dagiti Maintenance Section personnel dagiti maseknan nga aglablabsing iti Department Order No. 41, ngem saanda a maipakat ti pagannurotan gapu iti kinaawan ti police power ti DPWH. Nagkiddawen ti DPWH ti tulong dagiti lokal nga opisial ngem adu latta dagiti nasukir nga agbilbilag kadagiti igid ti National Highway.

Babaen ti bilin ti Police Regional Director, ken pannakikaysa dagiti umili ken makasakup a PNP stations, manamnama a mapasardengen ti panagbilag ti irik, mais ken dadduma pay a produkto iti talon kadagiti igid ti National Highway tapno naannayas ti taray ti trapiko ken maliklikan dagiti aksidente iti lugan.