Footer

Baro, nabagsol

STA. MARIA, Ilocos Sur – Nabagsol ni Francis Dela Torre y Cabras, 19, estudiante, awanan asawa, residente ti Ag-agrao, Sta. Maria, Ilocos Sur, bayat ti panagmeriendana ken ti dua a kaduana, iti Frank’s burger house iti Brgy. Poblacion Sur, ditoy nga ili.

Napasamak ti pammagsol idi agarup alas 2 ti parbangon idi Marso 4 sadiay Poblacion Sur, Sta. Maria, Ilocos Sur.

Madama ti panagmerienda da Francis Dela Torre y Cabras ken dua a kaduana idi adda dua a di am-ammo a lallaki nga immasideg ket napasamak ti nabara a sinnungbat. Pagammuan immasut ti maysa kadagiti di am-ammo a lalaki iti natirad a banag ken binagsolna iti namin-ano daras ti barukong ken mamitlo a daras ti kannigid a sikigan ti biktima.

Naglibas iti di ammo a direksion dagiti bimmagsol awitda ti igamda.

Naitaray iti Reyes Clinic and Hospital ti biktima para iti pannakaagasna.

Gapuanan ti inum ken di panagkikinnaawatan ti pammagsol.