Footer

SINURSURAN: Guardia laeng, dimo koma kuna! (Maudi a paset)

Maadal pay ngarud ditoy ti kinapateg ti guardia. Isuda ti umuna a mangsaluad kadagiti ubbing kadagiti managdakdakes. Siguraduenda ti seguridad dagitoy. Kadagiti met mannursuro, dakkel a katulonganda dagitoy. Saan a mangipababa iti dayawda!

Kadagiti met nagannak, di koma sakiten ti nakemda wenno tubngaren ti riknada ti panangala ti pagadalan iti agbantay kadagiti annakda. Nayon la a paggastuan dayta, dida koma kunaen. Ta mano man met laengen ti binulan nga itagnawa para iti sueldo ti guardia kasukat ti karadkad dagiti annakda?

Ngem mabalin met a tuladen ti ar-aramiden dagiti dadduma. Mapatibker koma ti kinnayammet ti barangay ken ti pagadalan. Akmen dagiti barangay tanod ken kagawad ti panagguardia iti masakupanda nga eskuela. Rotation dayta. No kasta ti mapasamak, saan ngaruden a parikut ti panueldo. Addan iti pagadalan wenno ti PTA no nayonanda ti bassit-usit laeng a maaw-awat iti binulan dagitoy nga opisiales. Wenno saan, dagiti mismo a kameng ti PTA ti agserbi a guardia. Sinnublat! Di kad’ namaymayat pay.

Kadagiti met addan guardia ti pagadalan dagiti annakda, tratuenda koma a kas tao dagitoy. Saan a gapu ta guardiada laeng a masusuelduan, addantayon iti karbengan a mangikuspil iti kinataoda. Rumbeng ketdi a kitaentayo ida a kas katulongan a mangsaluad/mangtubay kadagiti annaktayo. Maymayat pay ketdi no napigket ti pannakilangentayo kadakuada. Agbalinda a pannakamatatayo iti uneg ti pagadalan. Ket ita ta haytek ti panawen, napintas no ammotayo ti numero ti guardia (ken ammona met kadatayo) tapno madamagtayo ti kasasaad dagiti annaktayo no sumken ti panagdanag.

Iti met mangimatmaton iti pagadalan wenno kadagiti kameng ti PTA, napateg nga ikonsidera iti panangala iti guardia ti pisikal ken mental a kasasaad daytoy. Saan a basta asino la ditan. Kitaen a naimbag ti kinataona. Saan a gapu ta asideg ken ni pulano wenno pulana, isun ti maala nga agbantay. Ta iti udina, ti karadkad wenno masakbayan dagiti ubbing ti nakapusta.

Masapul pay a daytay koma awan bisiona. Narigaten no isu pay ti mangisungsong kadagiti bantayanna nga ubbing.

Iti biang ti barangay, no mangibaon man kadagiti konsehal wenno tanodna nga agbantay kadagiti pagadalan, penkenna a naimbag ti kinatao daytoy. Paritanna nga agpayubyob dagiti baonenna. Pagaammotayo ngamin a dagiti nataengan ti agbalin a modelo dagiti ubbing. Tuladenda dagiti makitada.

Maitutop pay a nadalus a kitaen ti asino man a guardia. Ken naisem. Iti inaldaw a makapulapolna dagiti ubbing, napateg unay a mayasidegna ti bagina kadakuada. A daytay gayyemda, saan a masapul a pagbutbutngan.

Dayawen koma met dagiti mannursuro dagitoy a guardia. No dadduma ngamin, kasla man nagbaba a tao ti pangibilbilanganda kadagiti guardia. Pagsasawanda no nagkibaltang bassit. Wenno saan, ti la pangibabaonanda kadagitoy, uray saan a paset ti trabahoda.

Laglagipen, padapadatayo iti imatang ti Namarsua. Guardiada laeng, saantayo a rumbeng a kunaen kadakuada.

Comments are closed.