Footer

Laborer, timmagbat iti kaarruba ken misis na

MAGSINGAL, Ilocos Sur – Maysa a mannalon ti tinagbat ti kaarruba na idi 7:55 ti bigat idiay Brgy Maratudo, Magsingal, Ilocos Sur. Nainaganan ti biktima a ni Bonifacio Pasco y Barrota, 58, naasawaan, residente iti nasao a barangay. Ti suspek iti panagtagbat ket ni Richard Pasco Y Pasco, 36, naasawaan, laborer, ken residente iti pareho a barangay.

Segun iti report ti polis, adda nangeg ni Bonifacio Pasco a komosyon iti balay ni Richard Pasco isu nga napan iti balay ti kaarrubana tapno aganawa. Ngem idi makastrek iti balay ni Richard Pasco ket dita metten a tinagbat ti laborer ti biktima iti ulona.

Tiniliw dagiti immuna nga nagresponde a PNP personnel ti suspek a naalaan iti bolo nga agatiddug iti 20 inches karaman iti pagiggaman. Dita met a naduktalanda nga pati gayam ti asawa ti suspek ket natagbat iti ulona ken dara-dara a nakailad iti pagturoganda.

Maag-agasan dagiti dua a biktima sadiay Gabriela Silang Hospital. Ti met suspek ket naipaan sadiay Magsingal Police Station para iti maibagay a disposision.

Saan nga nadakamat iti polis report no agkabagian da Richard Pasco ken Bonifacio Pasco. (Tawid News Team)

Comments are closed.