Footer

BANNER NEWS: PGIS supiatenna ti mining exploration sadiay Cervantes

SAAN nga ipalubos ti Provincial Government of Ilocos Sur ti mining exploration sadiay Cervantes, Ilocos Sur, ken dadduma pay a paset ti probinsia ta dayta ket rugi laeng ti panagminas a dakes ti epektona iti aglawlaw ken nakaparsuaan.

Dayta ti impasingked ni Sangguniang Panlalawigan Member Atty. Pablito Sanidad Jr., Chairman ti Committee on Justice and Human Rights, kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan Iti Amianan Media Forum sadiay Provincial Capitol, Vigan City idi Marso 6, 2018.

Inlawlawag ni Atty. Sanidad ti pagtaktakderanna ken ti Provincial Government mainaig iti agtultuloy a gannuat ti kompania a Cordillera Exploration Company Inc. para ti pannakaaprobar ti aplikasionda iti Mines and Geosciences Bureau I iti Department of Environment and Natural Resources para ti pannakaited ti mining exploration permit iti nalawa a paset ti Cervantes.

Impakaammo ni SPM Sanidad nga idi pay laeng 2017 ket adda inesponsoranna a resolusion ken inaprobaran dagiti amin a miembro ti Sangguniang Panlalawigan ken ni Governor Ryan Singson a nangideklarar ti panangkontra ti Provincial Government iti naisingasing a mining exploration and exploitation iti ili ti Cervantes.

Dayta a resolusion ti Provincial Government ket kanunongan ken patibkerenna ti resolusion ti Sangguniang Bayan ti Cervantes a mangkontra iti exploration activities ti kompania a CExCi iti masakupan ti ili gapu ta saanda a kayat a madadael ti aglawlaw ken nakaparsuaan ti ilida a nabaknang kadagiti natural resources.

Adu nga umili iti Cervantes pakaibilangan dagiti Indigenous people ti komontra iti panagbukibok ken panagminas iti ilida ta maperdi dagiti nalawa a daga ken ancestral lands. Agamak met dagiti taga sabali nga ili iti Ilocos Sur uray dagiti agnaed kadagiti coastal towns iti umuna a distrito gapu ta no matuloyto ti panagminas ket adda dagiti tailing dams a pagbuguan kadagiti mineral, a nakakonektar iti Abra River ket mayanud dagiti kemikal a makasabidong nga agpapababa iti karayan iti Bantay, Santa ken Caoayan ken agturong iti kabaybayan iti probinsia.

Impakaammo pay ni SPM Sanidad nga awan met ti umili iti Ilocos Sur a pormal nangidanon iti opisinana iti pannakalabsing ti kalinteganda wenno human rights mainaig iti napainget nga anti-insurgency campaign ti Armed Forces of the Philippines, ken anti-illegal drugs Oplan Tokhang ti Philippine National Police iti Ilocos Sur. Impakaammona pay nga addan naisayangkat a question hours iti Sangguniang Panlalawigan a nakaawisan dagiti opisial ti PNP iti Ilocos Sur a nangilawlawaganda kadagiti operating procedures tapno masaluadan ti kalintegan dagiti suspek nga adda pannakainaigna iti illegal a droga.

Impalgak pay ni SPM Sanidad a kas kameng ti Free Legal Assistance Group, madadaan isuna a mangipaay ti legal advice kadagiti agkasapulan iti pammalakad mainaig iti linteg, ket mabalinda a makontak babaen ti panangi-add-da iti uray ania kadagiti facebook account-na tapno matulonganna dagiti kaprobinsiaan nga agkasapulan iti legal advices.

Natratar pay iti media forum dagiti nagduduma a topiko pakaseknan ti Divorce bill sadiay Kongreso a nangipeksaanna iti kapanunotanna a saan a rumbeng a diktaran ti gobierno dagiti agassawa iti aramidenda iti kallaysada no saandan a maurnos ti relasionda. Inlawlawagna pay a ti panagbaliw ti porma ti gobierno iti federalismo ket saanna a patalgedan a sumayaat ti kasasaad dagiti rehion ken pannakamanehar dagiti pondo.

Inlawlag pay ni SPM Sanidad a nasaysayaat a matuloy ti impeachment proceeding ni Chief Justice Maria Lourdes Sereno, ngem ti madesisionan ti quo warranto petition nga impila ni Solicitor General Jose Calida iti Korte Suprema tapno maikkan ti gundaway a mangdepensa ti bagina iti Impeachment Court a buklen dagiti senador a mangikeddengto no mapadisi wenno saan kas Chief Justice iti Supreme Court. (Eden A. Alviar)

(Photo by Jasper Allibang Espejo)

Comments are closed.