Footer

EDITORIAL: Pannakaibasura ti kaso dagiti drug lord

NO dagiti babassit ken awanan-gaway a maatap nga adda pannakainaigna iti illegal a droga, dua laeng dagiti mabalin a mapasamak kadakuada – mapapatay wenno agpaut iti pagbaludan. Ngem no dagiti dadakkel ken maimpluensia a drug lord kas kada Kerwin Espinosa, Peter Lim, Peter Co ken dagiti dadduma pay a kakaduada ket nadaras a nawaswas dagiti kasoda.

Dayta ti nagkaykaysa a kananakem dagiti adu nga umili nangruna dagiti pamilia dagiti adu a nakabalud ken nagbalin a biktima ti pammapatay kadagiti anti-illegal drugs operations ken extra judicial killing wenno summary execution iti kampania ti administrasion ni Presidente Rodrigo Duterte kontra illegal a droga.

Nakaskasdaaw ti panangabsuelto ti National Prosecution Service ti Department of Justice iti kaso dagiti dadakkel a drug lord nangruna ken ni Espinosa a nangaklon a mismo kabayatan ti imbestigasion iti Senado idi Nobiembre 2017 iti maipabpabasol kenkuana a pannakainaigna iti illegal a droga kalpasan ti pannakayawidna iti Pilipinas manipud iti pannakatiliwna sadiay Abu Dhabi.

Ni Kerwin ket anak daydi Albuera, Leyte Mayor Rolando Espinosa a napapatay idi Nobiembre 4, 2017 babaen kadagiti operatiba ti Region 8 Criminal Investigation and Detection Group ti Philippine National Police kabayatan ti pannakaikulongna sadiay Baybay, Leyte Sub-Provincial Jail.

Inaklon ni Espinosa nga isuna ken dagiti kakumplotna ti mangpatpataray ti illegal drug trade iti Visayas. Innagananna dagiti kasosiona iti negosio a drug lord agraman ni Lim a supplier-na. Impalgakna pay ti panangpaspasuksokna tapno saan a magaraw ti operasionda ken ni sigud a Justice Secretary ken agdaman a Senator Leila de Lima a nakabalud itan sadiay Camp Crame.

Inraman idi ni Duterte dagiti agama nga Espinosa, Lim ken Co iti imbutaktakna a narco list wenno listaan dagiti drug lord ken protector-da iti Pilipinas. Nagpangta pay ti Presidente a matay ni Lim apaman a bumaba iti eroplano no sumangpet iti Pilipinas a naipadamag nga adda idi iti ballasiw-taaw idi irakurakna ti narco list. Kalpasan dayta a pagteng, naipadamag a nakipagkita ni Lim iti Presidente ken nagpalawag iti opisina ti National Bureau of Investigation tapno dalusanna ti naganna nga awan ti pannakainaigna iti illegal a droga. Naipadamag pay nga agkompadre ti Presidente ken ni Lim ta agpadada a nanganak iti kasar.

Masdaaw dagiti adu nga umili iti nagbanagan ti kaso dagiti drug lord nga idi pay laeng gayam Disiembre 20, 2017 a naiparuar ti resolusion ti NPS – DOJ, ngem itay laeng Marso 12, 2018 a nairakurak iti publiko kalpasan a nai-leak iti media ti kopia.

Iti kabayagen a naaramid ti resolusion, nakaskasdaaw a saan nga ammo ni Justice Secretary Vitaliano Aguirre ti pannakaibasura ti kaso ta adda iti babaenna ti NPS ken kontrobersial dayta a kaso ta ti testimonia ni Espinosa ti nagbatayan ti pannakaibalud ni De Lima nga agingga ita ket saan pay a nagkuti ti kasona.

Nakaskasdaaw a saan nga ammo ti Presidente ti resulta ti resolusion ta adda iti babaenna iti Executive Branch ti DOJ, ken flagship program ti administrasionna ti anti-illegal drugs. Iti pannakaibasura ti kaso ni Espinosa ken dagiti kakaduana, nakataya ti kredibilidad ti impannakkelna a narco list ken ti kampaniana kontra iti illegal a droga.

Kalpasan a nairakurak ti pannakaibasura ti kaso ni Espinosa ken dagiti kakaduana, nagbalin a naulimek ti Presidente. Saan a kas iti sigud a kinaagresibona idi ibutaktakna ti narco list. Naipadamag a nadismaya ken narurod ti Presidente ken ni Aguirre iti nagbanagan ti kaso ken minandarna ti DOJ a tratarenda a nasayaat ti kaso. Nangbukelen ni Aguirre iti espesial a komite a mangtratar iti kaso ni Espinosa ken dagiti kakaduana a drug lord. Minandarna payen ti NBI a mangimbestigar kadagiti prosecutor a nangibasura iti kaso.

Inabsuelto ti NPS – DOJ ti kaso ni Espinosa ken dagiti padana a big-time drug lord gapu iti kinakurang ti merito dagiti ebidensia nga impasa ti CIDG – PNP, ken saan nga agsusurot a testimonia ti kakaisuna a testigo. Iti pannakaibasura ti kaso, nangrugin ti CIDG – PNP nga agala iti natibtibker nga ebidensia para iti pannakarepaso ti kaso babaen kadagiti baro a prosecutor.

Iti laksid dagiti maipadpadamag a mandar nga inyetnag ni Duterte ken Aguirre mainaig iti kaso ni Espinosa ken dagiti kaduana ket narigaten a maikkat ti mantia ti panagdudua kadagiti panunot dagiti managamaris nga umili. Kidkiddawen la ket ngarud dagiti lider ti oposision ti pannakapadisi ken panaglusulos ni Aguirre. Iti pannakaibasura ti kaso, naksayanen ti pammati dagiti umili iti pannakaipakat ti hustisia, manipud iti partisipasion ti PNP iti panagaresto, ken panagurnong kadagiti addaan-merito nga ebidensia nga agtakder iti piskalia ken iti husgado. Saan a mailibak a maysa a mantia dayta iti a pagteng iti kabaelan ti PNP ta iti naglabas ket pangdarasan wenno short-cut dagiti ipakpakatda a mangrisut kadagiti kaso.

Saan a mailibak a ti kaso ni Espinosa ken dagiti kakaduana ket kinessayanna ti panagtalek dagiti umili iti piskalia a mangarisit kadagiti maipila a darum sakbay a mayulida iti korte. No maibasura pay ti kontrobersial a kaso ti nangaklonen iti krimen nga inaramidna, kalaksidan a nakaturong ti atension ti Presidente ken Justice Secretary, anianto la ketdin dagiti kaso a saan a nalatak iti imatang ti publiko?

Adu nga umili dagiti maburburtiaan ken agbirbirok iti sungbat no apay nga iti laksid dagiti rinibun a natay ken nabalud iti kampania ti agdama nga administrasion kontra illegal a droga ket agtultuloy latta ti panagsaknap daytoy a dakes a negosio a mangdaddael ti salun-at ken panunot dagiti tattao.

Idi panawen ti kampania idi 2016, inkari idi ni Duterte a solbarenna ti problema ti illegal a droga iti las-ud iti tallo agingga iti innem a bulan. Ngem ania ti gapu a duanton a tawen ti Presidente iti akemna, ngem agtultuloy latta daytoy a negosio? Gapu ngata ta dagiti laeng babassit ken awanan-gaway a maatap a drug pushers dagiti kaaduan a mapapapatay wenno mabalud, ngem maabsuelto met ken agtultuloy met ti negosio dagiti drug lord a dadakkel ken natibker ti kapetna iti gobierno? (Eden A. Alviar)

Comments are closed.