Footer

SINURSURAN: Dagiti mapukpukaw a taraken

(Maudi a paset)

Idi kuan, nadlawna nga agpukaw manen dagiti bunga ti karabasa ken tarongna. Awanen ti tuduenna pay no di ni Mang Nato. Adayo dagiti dadduma a kaarrubada ket sigurado a maamakda nga agbasakbasak iti kanatengan ta ammoda ngarud nga adda iti asideg ti balay ni Mang Nato. Ngarud, awanen ti sabali a makaitured a limed a mapan agala no di ni Mang Nato.

Simmaruno a naikisap dagiti petsay a pagapitan koman ni Ama Berto. Inarab dagiti kalding ni Mang Nato.

Saanko metten a napuotan a nakatalawda iti aponda, manong, kunana laeng idi bagaan ni Ama Berto.

Iti maysa a malem, nadlaw ni Ama Berto nga adda sabali a kawitan a naitipon kadagiti nabatbati a manokna. Saanna a makitkita daytoy kadagiti manok dagiti kaanakanna iti dayaen ti balayda.

Gapu ta addada upa a nabati a taraken ni Ama Berto, saan a pimmampanaw ti lumabaga a kawitan. Nakikakaan iti sumagmamano nga aldaw iti balayda. Dayta laeng agmanmanada ti inubrana.

Iti panagburas ni Ama Berto iti bunga dagiti natengna kadayta nga agsapa, nangngegna ti panagsinsinnungbat da Mang Nato ken ti asawana.

Ania, awan latta a nakurkoram ‘tay kawitantayo?” sinaludsod ni Mang Nato.

Awan, lakay!” insungbat ni Manang Dalen.

Napnapananna ngatan?”

Pinulotanen, a, dagita a mammartek!”

Dida pay la ngarud maiddalan!”

Kunam, laglag, ket naglaingka met nga agsiblok iti manok ti akimmanok!”

Nakasaoka ket im-imasem met no maidasaren!”

Ania ngarud, buybuyaenka lattan nga agigup iti tinola?”

Nagawid a dagus ni Ama Berto apaman a nakaburas. Inkagumaanna a tiniliw ti simmangpet a kawitan iti pagtaenganda.

Awan ti sinayang nga oras ni Ama Berto. Nagturong iti balay da Mang Nato. Impakitana ti manok.

Manokmi nga agpayso daytoy, manong,” kinuna a dagus ni Manang Dalen. “Lakay, umaykadtoy man!” pinukkawanna ti lakayna nga adda iti yan dagiti kaldingda.

Mano nga aldawen nga agap-apon iti sanga ti tsikomi. Dinamagko kadagiti kaarrubami dita daya ngem saanda kano met a kukua. Isu a napanunotko a damagen ditoy ta dakdakayo met laeng iti laudenmi.”

Apay, ‘ya?” inamad ni Manong Nato idi makaasideg.

Adtoyen ‘tay nabayagen a sapsapulem, lakay! Immay impan ni manong. Nakikakaan iti yanda.”

Agyamanak, manong,” kinuna ni Mang Nato.

Manipud idin, saanen a napukpukawan iti manok ni Ama Berto. Di metten naal-alaan dagiti mulana a nateng. Ken sinerserrek dagiti kalding.

Dayta a persat iti biag ni Ama Berto, ti amak, saankonto a malipatan. Kangrunaan ti adal nga inyegna. Adal a yallawatko met iti binangonko a pamilia.

ITA a paspasungadentayo ti Nangina nga Aldaw, mabalin nga utobentayo ti bagbagitayo. Dagiti ar-aramidentayo iti inaldaw, maikanatad kadi pay laeng? Saan kadi a nayon a siit daytoy a maipabaklay manen ken ni Apotayo a Hesus?

Sika laeng ti makasungbat dayta, ka-Sinursuran! Ammomon ti aramidem.#