Footer

Umuna nga opisina ti ARJOW iti Rehion 1, naluktan

AGOO, La Union – Tapno mayasideg kadagiti mannalon ti libre a serbisio-legal maipanggep ti problema iti daga, naluktan ti umuna nga opisina ti Agrarian Reform Justice on Wheels (ARJOW) iti Rehion 1 idi Pebrero 6, 2018 ditoy.

Inpaganetget ti Department of Agrarian Reform (DAR) ti pannakabuangay ti ARJOW kalpasan ti rationalization ti ahensia a nakaawanan dagiti opisina ti Municipal Agrarian Reform Office (MARO) iti La Union.

Kinunana ni Attorney Raul C. Laluan, agdama a Provincial Agrarian Reform Program Officer (PARPO) II iti La Union, a kas sagudayen ti Executive Order 366 wenno Rationalization Plan ti DAR, mapukaw amin nga opisina ti ahensia iti munisipio kadagiti probinsia a nababa ti Land Acquisition Distribution (LAD) area-na a kas iti La Union.

Daytoy met ti makagapu a naiyalis ti libre a serbisio-legal para kadagiti Agrarian Reform Beneficiaries (ARBs) iti opisina ti DAR iti probinsia manipud kadagiti munisipio.

Kinunana ni Laluan a serbian ti opisina ti ARJOW-Agoo dagiti mannalon manipud kadagiti ili ti Sto. Tomas, Pugo, Aringay ken Caba iti La Union.

Nakalukat ti opisina ti ARJOW tunggal Mierkoles iti maikatlo a kadsaaaran ti pasdek ti Agoo E-library.

Maibilang a ti ARJOW-Agoo a kas kaunaan a naluktan nga opisina iti Rehion 1.

Innayonna a maysa pay a trabaho ti ARJOW ti pannakabuangay manen ti Barangay Agrarian Reform Committee (BARC) tapno mapadaras ti pannakaresolbar dagiti problema ti “agraryo” iti barangay.

Mangnamnama ni PARPO Laluan nga addanto pay sumaruno nga opisina ti ARJOW a maluktan iti probinsia.

Naluktan ti umuna nga opisina ti ARJOW iti Rehion 1 babaen ti tulong da Mayor Stefanie Ann Y. Eriguel ken Konsehala Erwina Eriguel, agdama a presidente ti liga dagiti kakapitanes iti Agoo, La Union. (Freddie G. Lazaro – FGL/PIA-Region 1)