Footer

2 motorsiklo nagdinnungpar, 3 nadundunor

SALCEDO, Ilocos Sur – Nagsaprap iti dunor iti nadumaduma a paset ti bagida dagiti naglugan iti 2 a motorsiklo a nagdinnungpar iti maysa a kurba iti Brgy. Road iti Poblacion Sur, Salcedo, Ilocos Sur idi bigat ti Marso 17 daytoy a tawen.

Nadunor ni Dionie Lacaden y Foronda, 30, naasawaan, trabahador, driver ti motorsiklo nga XRM; ti inluganna a kabsatna, Michelle Colting y Lacaden, 27; ken ni Razzel Jade Binaliw Lacaden, 1, a kaanakanna. Nadunor met ni Alex Castro y Barungay, 17, trabahador, awanan lisensia. Agpapadada amin a taga Lucbuban, Salcedo, Ilocos Sur.

Iti inisial nga inbestigasion, naammuan nga agpaamianan ti Honda ket agpaabagatan met ti SYM idi nagdinnungparda iti kurba, a gapu iti nakadundunoranda amin ket naitarayda iti Ilocos Sur District Hospital, Salcedo, Ilocos Sur a nakaagasanda. Nayalis ni Razzel Jade iti Candon City Hospital para iti naan-anay a pannakaagasna. Nagpositibo iti alcohol content ni Dionie Lacaden y Foronda iti naaramid a breath test. Agtultuloy ti inbestigasion. (Tawid News Team)

Comments are closed.