Footer

Mapadisi ngata iti akem ni Chief Justice Maria Lourdes Sereno?

MAPADISI ngata iti akem ni Chief Justice Maria Lourdes Sereno a naidarum iti Impeachment iti House of Representives ken napilaan iti quo warranto petition iti Korte Suprema?

Inaprobaranen ti House Committee on Justice nga adda “probable cause” ti impila nga Impeachment complaint kontra ken ni Sereno kalpasan ti sumagmamano a bulan a panangtingitingda iti kaso nga impila ni Atty. Larry Gadon a “Culpable Violation of the Constitution” ken “Betrayal of the Public Trust.”

Nagpaut ti pananngisayangkat ti Justice Committee nga idauluan ni Oriental Mindoro Rep. Reynaldo Umali. Nagparang iti komite dagiti adda pannakainaigna iti reklamo agraman ni Sereno ken dagiti kakaduana a justice iti Korte Suprema, ni Gadon ken dadduma pay nga opisial ti gobierno. Napaayaban pay dagiti agserserbi iti Bureau of Internal Revenue ken dagiti psychiatrist a nangited ti neuro-psychiatric evaluation ken ni Sereno idi nainominar a Chief Justice.

Saan a nagparang iti Justice Committee ni Sereno. Inakusaran dagiti abogadona dagiti kongresista a nangisayangkatda iti imbestigasion a “fishing expedition” wenno agkatangkatangda nga agkalap iti ebidensia. Impatangkenda a ti kaso a nakaidaruman ni Sereno ket wagas tapno pagulimeken ken pastidiarenda gapu iti pangngeddeng ken pagtaktakderanna kadagiti kontrobersial nga isyu nga adda pakainaigan ti admininistrasion.

Nayendorson ti kaso para ti panagbotos dagiti kongresista iti plenario. Manamnama ti panagbotos dagiti kongresista iti panagsubli ti session kalpasan ti panagbakasionda ita a Semana Santa. No adda 2/3 iti kadagupan dagiti kongresista ti kumanunong iti Impeachment complaint ket mayulinton ti kaso iti Senado nga agserbinto kas Impeachment Court ken pagakemanto dagiti senador kas ukom.

Kagiddan ti pannakaaprobar ti Impeachment complaint iti Justice Committee, nangipila ni Solicitor General Jose Calida ti quo warranto petition iti Korte Suprema a nagkiddaw iti pannakawaswas ti appointment wenno pannakadutok ni Sereno a Chief Justice gapu kadagiti nagduduma nga alegasion kas iti saan a tumutop a kasasaad ti panagpampanunot kas indatag dagiti psychiatrist, ken panagliway a nagbayad iti buis ken panagipila ti Statement of Assets, Liabilities and Networth.(TO BE CONTINUED)